بون صحيح مازلت كيف قمت و بما اني يقعد عندي ديما هاك الحنين لإذاعة تونس الدولية (الآر تي سي إي) و إلي تو ولات تتبث حتى ع الساتليت دونك ما عادش محصوره في تونس برك و إنما حتى في اوروپا ينجمو يسمعوها (و لو شخصيا ما نتصورهاش) عاد هاوينو حطيت نسمع شويه خاطر ديما نقول ها الإذاعه تبقى محافظه على جانب من المصداقية...
ايا يا سيدي يا بن سيدك تو مدة نص ساعه لتالي معناها مع 13:30 كيف ما هو معروف فما اخبار ناطقه بلوغة موليار برا هاوينو نسمعو آش عندنا ما نعملو ايا جات اخبار السپور و لهنا مشى في بالي إلي انا مازلت راقد!!! المذيعه تخبّر على ماتش حمام سوسه و صفاقس إلي هي مقابله متقدمه باش تتلعب اليوم في حمام سوسه مع 14:30 لحقيقه لهنا تكونسيت خاطر خوكم الماتش تفرجت فيه البارح في الستاد زاده !! و ربحت فيه حمام سوسه واحد بشي و بالاماره إلي مركى البونتو محمد امين العويشاوي (ولد الصحافي ابراهيم العويشاوي)!!
قلت بالكشي اخبار البارح هاذي ؟؟ قعدت نتصنت ياخي المذيعه تخبر كيفاش سي سمير لعبيدي مشى اليوم الفجر يستقبل في عناصر منتخب كرة اليد!! تي شنيه لحكايه زاده !!! يا وخياني مخي وقف !! بعععععععععععععع ماينه وفى لحديث !!!
تي لا ما وفاش هو لا محاله تي هاو تسجيل و سايسو رواحكم م الدم الفاسد و السكر و التاي و كل الامراض المستعصيه الاخرى
إلي عندو اي شك في الحكايه انجم نبعثلو النشره إلي تعدات كامله
هناك تعليق واحد:
يا هشوش يا خويا هذيكا هي صحافة الديكتاتورية. الصحفيين اللي يصلحوا الكل هجو م البلاد وأهوكا عاملين فارع في القنوات الأجنبية، نفس القنوات اللي "الديمقراطية التعددية" الجربوعية تسب فيها ليل ونهار. قعدو كان الجماعة بودورو، بهامة ونفاق وانتهازية. وإذا تجي تشوف. الكعبات اللي يصلحوا في الميادين الكل تقريبا فصعوا م البلاد. ما قعد فيها كان الانتهازي و القفاف والجبان الا من رحم ربي.
إرسال تعليق