الجمعة، 19 فبراير 2010

شنيه الحكايه؟ الجزء الثاني



حكينا في التدوينه إلي فاتت على بوادر الحمله على قناة نسمه و بدينا مع حكاية مسلسل بيت صدام (بالنسبه للي ما شافش التدوينه نزله ظريفه لهنا).
عاد هاوينو كيف ما قلنا و انو فما ناس قعدو واقفين في الدوره للقناة هاذي و بدى عاد الهزان و النفضان متاع برشا ناس تبارك الله عليهم وقت جا سيلڢيو بيرلسكوني لتونس و كيفاش كان ضيف في برنامج ناس نسمه(بالاماره الحلقه تعدات في رمضان) عاد هاوينو الناس في عوض يحكيو على كيفاش نسمه كان عندها سبق من نوعو و انهي اول مره تقدم رئيس دوله في مساحه حواريه بعيده ع الخطابات السياسيه و كيفاش زاده اول مره يقدمو رئيس دوله (او ما يعادله بما انو برلسكوني رئيس وزراء) و هو يحكي بلغه غير لوغتو. ابسط حاجه و انو قناة نسمه عداتلنا سياسي يحكي موش كي بعض المراحيم إلي ما تشوفو في التصاور كان و هو يتمتم ما غير صوت لين تولي تشك بإلي هو بكوش !!!
قلت عاد في عوض الناس هاذم ياخذو الميضوع من الناحيه إلي كنت نذكر فيها، خذاووه كيف ما راجت و عبرت كيف ما حبت ها العباره "الاستقواء بالاجنبي" يا وخياني منين يستنبطو فيهم ها الجمل متاع اللوح هاذم !!! قول انتي ياخي برلسكوني جايبينو باش يتدخللنا في امور البلاد ياخي ؟؟ تي ماهو جا يعمل في طله على تونس قالولو ايا تجي ؟؟ قاللهم ما فيها باس ولات استقواء بالاجنبي !! يا سيدي ميسالش خليها استقواء بالاجنبي مادام "الداخلي" مطفي العريبه الكل و ما تشوفو كان في الاخبار...
لحقيقه تعدات حكاية برلسكوني بشوشره اقل بياسر من شوشرة مسلسل صدام و ذلك لسببين ساهلين لا محاله:
اولهم و انو التوانسه في الوقت هاذاكا كانو لاهين في كروشهم و ما فماش برشا ناس تبعت نسمه و خاصة برنامج ناس نسمه خاطر كان يجي مع وقت المسلسلات إلي تتعدى في حنبعل و تونس سبعه
و السبب الثاني و هو انو حكاية الاستقواء ببرلسكوني جات مبشوله ياسر (دايور فما برشا توانسه ما يسمعوش بيه سمع)...
نجيو تو لحكاية سؤال الحلقه إلي الناس قريب يطيحو فيه الارواح و هو: هل انت مع او ضد العلاقات قبل الزواج؟؟
لهنا و هاذا شي ما يخفاش ع التوانسه و انو الانسان البسيط و خلينا بشويه تفاؤل نقولو و انو 60% ع الاقل ديما تخديم المخ يمشي للبلاصه المزيانه...
تو زعمه كيف يجيك واحد يقلك راني عملت علاقه آش معناها ؟؟ تعرف على وحده ؟؟ تي ماو بالعربي رقد معاها فما نبداوش نفلمو ع الناس و شوف كيفاش يغلطو في الراي العام و هاو بانت حقيقة قناة نسمه إلى غيرو م الشعارات إلي كسرولنا بيها البطاطا ...
بالنسبه للسؤال في حد ذاتو: الناس الكل تعرف و انو ها "الاشيات هاذي" (كيف ما يقول ابيّك الراجل) موجوده و الصغير يفهمها قبل الكبير ياخي علاش موضوع كيف يتلمو يحكيو عليه جماعه في قهوه ميسالش و كيف يتطرح قدام الناس الكل في التلفزه يولي عيب و احشم و ما يجيش ؟؟ يا اخي فيبالنا تعديناها ها المرحله تو موش كيف قبل !! قبل الشي هاذا ما كانش تو ما توعيش و ما تحسسشي الناس تمشي فيها بالبلاء إلي كل نهار طالعلك من شيره...
حاجه اخرى بالله: ياخي نسمه جات قتلك برا عيث فيها فساد و ما تفلت شي ؟؟ تي هو سؤال و تطرح انت مع و إلا ضد ؟؟ ما فيها شي الحكايه
نجيو تو لموضوع سوسن معالج: كيف ما قلت في احد تعاليقي ع التدوينه السابقه و انو العباره مش جديده بمعنى و انو عبارة "نص ميترو استيك في ڨلصونه" او في روايه اخرى بالڢيرسيون الجديده "نص ميترو استيك في كلصونو" وردت في قصيده ولات في الموروث الشعبي و كيف ما وردت في الاصل: بورڨيبه ربي يصونه نص ميترو استيك في ڨلصونه...
و في نفس القصيده: تحيا الكاف و إماليها و سيدي المتعمد ها بورڨيبه سيدي حني دني لينا بحر فيه الحوت و السردينه الخ الخ (هاذا مع تحياتنا لمنطقة الكاف و سكانها و كل شبر من تونسنا)
عاد الناس إلي تحكي ما تتقالش في تلفزه نعذرهم و نعطيهم الحق خاطر و الحق يقال فما ناس تبدى مع والديها القدر قد قد و اللعب لا. اما هاذا ما يمنعش زاده و انو صارت قبل في تلافز اخرى و انو كلمات زرفت و إلي هي في بعض المناطق كلمات خايبه ياسر و توحي بالجنس كيف كلمة "تتمنيك" إلي تعتبر كلمه قبيحه ياسر في الجنوب خاصة دونك حديثنا قياس نوليوش نعملو بث خاص لكل جهه باش ما فماش كلام يمكن تأويلو و هات من هاك اللاوي...
مختصر الحديث يعني و انو قد تكون سوسن معالج غلطت كيف استشهدت بالقصيده إلي حكينا عليها اما شخصيا ما نتصورش و انو كانت تقصد منها ايحاء جنسي جوست قالتها للجو (دايور الجمهور الحاضر شاخ عليها)
نجيو تو لحكايات بالرسمي معناها "الور لا" كسرولنا بيهم روسنا إلي هي حكايات قناة نسمه صهيونيه و تتلقى في تمويل اسرائيلي الخ الخ الخ ...
زعمه ها إلي يحكيو هكا عندهم دليل ملموس ع إلي يقولو فيه ؟؟ شاعرين برواحهم فاش قاعدين يقولو ؟؟
المشكل و انو فما برشا بهاليل قاعدين يصدقو اي حاجه قاعده تتكتب لا و اكثر من هكاك يوصل باش يولي يحاجج فيك و يردك انتي عميل و آش باش يسلكها عاد من هاك الكلام إلي ينفخ بعض الاعضاء...
لهنا نحب نستحضر كلمات كان قالهم بيڨ تراپ بوي و إلي صراحة تلخص الوضع الكل:"ممكن أن أتفهّم إنزعاج بعض "المحافظين" من برامج قناة نسمة، ولكن وصفها بالصهيونيّة فرد مرّة ظاهرلي مبالغ فيه شويّة باش ما نقولش حاجة أخرى، المرّة الجاية إلّي باش يحلّ كعبة دلاّع يلقاها ماسطة باش يعمللنا جروب على فايسبوك ويدعو للقضاء على الدلاّع الصهيوني.. ما هذا يا هؤلاء؟"
يا وخياني ها الجماعه إلي هبط عليهم التخونيج على حين غرّه هاذم آش كسرولي كرايمي آي آي آي ناس ولات تخاف حتى من رواحها شنوه ها الخنار !!!
تو بعد زوز تدوينات في الموضوع هاذا وصلنا لبيت القصيد و إلي هو: اي حد و اي هيكل عمرو ما تخلق باش يعجب الناس الكل قد يجلب بعض الناس و قد يتغشش عليه بعض الناس و يرفضوه و هاذا معقول بل اكثر من هكاك نقول و انو هاذا صحي و كيف ما يقول الفرنساوي: الاختلاف يخلق الثراء...
اما هاذي باش تجي تبدى تؤلّب في رأي عام على موضوع ما فهاذا من السخف بمكان معناها سيادتك وليت ولد كذا ع الناس باش تقوللهم تفرجو على هاذا و اخطاكم من هاذا ؟؟ عاد هاو ولات نوعيه جديده م الصنصره هاذي تي علاش نلومو على عمار ؟؟ آشنوه مشكلك انتي ما عجبكش إلي قاعد تتفرج فيه؟؟ هاو عندك حلين: اقعد دور لين تلقى حاجه تعجبك سينون إلي صنع التيليكوموند تفكرك بفلسه حلوه ياسر هاويني غالبا ما تكون ملونه بالاحمر

هناك 4 تعليقات:

illusions يقول...

Bravo pour cette note. Moi même j'ai lu toutes les attaques à propos de cette chaine télévisée et je sentais que c'est trop exagéré, comme si notre lexique et nos idées sont si perfectionnés et tout le monde a la même vision des choses.
Je regardais depuis des mois ness nesma, et personnellement je la trouve très innovatrice comme émission, ce qui n'est pas étrange pour un animateur comme fawaz qui a toujours eu des idées exceptionnelles depuis qu'il était élève au lycée.
Des parties ou des émissions peuvent ne pas me plaire mais ça ne veut jamais dire que tout est mauvais.C'est une autre vision des choses et celui qui se trouve offenser n'a qu'utiliser la télécommande.

جربوع بالبيفيدوس المنعش يقول...

يا هشوش يا خويا نحترم رايك. لكن سامحني مانيش موافق على كلامك. رؤيتك للي قاعد يصير سطحية شوية. نقمة تي في ماهي كان الجزء الظاهر من جبل الجليد ويلزم تتحط في سياقها. مش اشكالية نظرية المؤامرة أمى يلزم تربط برشة خيوط مع بعضهم. آخر خيط هو فرانسوا فيلون اللي كرم مجموعة من اليسار الأصفر اللي مسيطرين ع "الثقافة" في البلاد. ما فيهم حتى حد عروبي أو قومي أو مضاد للصهيونية. وهلم جر. موش مشكل يا صاحبي.يجي نهار و تتكشف الأوراق الكل والصبح لناظره قريب قال الراجل. بخاطرك

هشوش يقول...

اهلا بيك خويا و مرحبا بيك محسوب في دارك:
باهي اول حاجه حكاية النظره السطحيه: يا اخي تحبني ندخل في شي الله اعلم موجود و إلا موش موجود ؟؟ في بالي بالوحي وقف مع سيد النبي !! انا ديما نقولها الله يتولى السرائر و نحن نتولى الظواهر !! بمعنى كيفاش تحبني نحكم و نحلل شي انا ما ريتوش و إلا ما صارش فعليا و إلا حتى سمعت منو كلمه طايشه هكاك ؟؟؟ وكانك ع السياق متاعو انا عطيت تفسيري(وهاذا ما هوش حقيقه في حد ذاتو لكن يبقى تفسيري الشخصي) و شنيه الخيوط بربي إلي باش نربطها ببعضها ؟؟ كان فما حاجه انتي تعرفها(و نرجع ونقول للمره الالف كان عندك ادله واقعيه و ملموسه اكون لك خير الشاكرين اما موش مجرد تخمينات) هات اعطينا و نورنا...
بالنسبه للي قلت انتي آخر الخيوط نتصورك كنت تقصد فريديريك ميتيران(خاطر بصراحه الاسم إلي انتي ذكرتو اول مره نسمع بيه) وزير الثقافه الفرنسي وقت كرم مجموعه من الثقافيين و خاصة مسرحيين: زعمه توفيق الجبالي و الفاضل الجعايبي و جليله بكار ناس نكره ؟؟ ما ساهموش باكثر من عمل في الساحه الثقافيه ؟؟ اعمالهم مش ناجحه ؟؟ و حتى كان اعمالهم مش ناجحه فما شكون خدم اكثر منهم ؟؟ الثلاثي هاذا بالذات تونس كامله تشهد بانو اسس مدارس في المسرح و إلي تشوف فيه في تونس من سينما و مسرح كان ما هوش السبب فيه الجعايبي راهو الجبالي و ابدى عاد انتي م التجارب الناجحه للفاشله الكل خرجو من تحت يديهم لمين النهدي بن يغلان عبد القادر مقداد فرق الكاف و ڨفصه و تونس المسرحيه الخ الخ الخ ....
فسامحني لهنا باش نقلك إلي م العيب او حتى من العار باش نقزمو الاستحقاقات متاع الناس هاذم إلي الى حد كتابة ها التعليق ما تكرموش و لو بورقه !!
تقلي انتي مسيطرين ع الثقافه نقلك فما شكون جا باش يخدم و هوما قالولو لا ؟؟ تي شبي الواحد كيف ما ينجمش يعمل حاجه يدور يسب في الناس ؟؟
انا م اشد الناس إلي تكره اليسار كتيار سياسي لكن نحترم برشا المثقفين اليساريين و إلي نجاحهم يحكي عليهم كيف مثلا الطاهر الفازع راجل كيف تقرالو الكتب متاعو تشيخ في مخك بالحق !! النوري بوزيد إلي وين يعمل فيلم يخلق بيه ضجه و يتناول مواضيع "متاع سيب علينا ما تحكيش فيها"
معناها انجم نكون مختلف معاك في افكار اما كيف تحكي معايا في امور اخرى و تقنعني انجم نكون فيها معاك بحيث موش بالضروره يا نكون معاك على طول يا نكونو مختلفين جمله و تفصيل !!
و قلتهالك و نعاودها كان انتي قلت فما امور خفيه و الواحد "يلزم يربط الخيوط" اربطها انتي و قدمهالي كيف انا طلعت الله غالب عليا...
سلام من ارض الجرابيع الطيبه

هشوش يقول...

اختي إيليزيون مرحبا بيك و شرفتني بالمرور متاعك: في الحقيقه هاذا إلي الناس ما حبتش تفهمو و هو انك اذا كان انتي ما توافقش الشي الي قاعد يتقدم موش لازم ها الهيجان و الشوشره في البلاد تقول شديت سارق !!! ثم إذا كان ما عجبكش برنامج معناها القناة الكل في الزبله ؟؟ ما هاذا يا وخياني !!! تي تجاوزناه في بالي لعب الذر هاذا و احنا عيينا و نقولو إلي التوانسه بلغو درجه م النضج ما يخوللهم باش يعرفو يحكمو و خاصة يعرفو كيفاش يردو الفعل !! تجي تشوف تلقى واحد يكتب حاجه تلقى العشرات يتبعو فيه في فكره ممكن ياسر هوما ما همش فاهمين منها شي غير برا هكاكه و نرجعو لفلسفة القطيع...
مرحبا بيك مره اخرى اختي و شكرا على التفاعل