الحكايه مش جديده و بما انو احنا في تونس استانسنا و انو كل حاجه جديده (ولو تكون باهيه و تصلح) لازم نعطيوها متاعها و نوكلوها ما اكل الطبل يوم العيد...
قلت مش جديده على خاطر و على حسب ما نتذكر بدات مع مسلسل "بيت صدام" نتفكرو الناس الكل الضجه إلي صارت وقتها ع القناة و قضايا في المحاكم و ناس عروقاتها شرتلّه لسبب وحيد "كيفاش تعديو مسلسل استهزأ باحد اعظم القياديين العرب؟؟" (لهنا هاو نحل قوس و نقول ما فهمتش تو ثبتولنا رواحكم صدام بطل و إلا ديكتاتور؟؟ مره يتذكرو آش عمل في الشيعه و كل حد سولتلو نفسو باش يقول لا... و مره كيفاش كان هو رمز الصمود وين قال للاماريكان لا حلال عليه حرام عليهم !!!)
نرجع عاد وين كنت قلت كانت ضجه كبيره ياسر حول بث المسلسل تقولش عليها نسمه هي إلي انتجت ها الاربعه حلقات!!!
من شيره اخرى سمعت برشا كلام حول انو المسلسل عطى فكره خايبه و مس العرب في برشا نقاط سلبيه فيا حبذا لو كان حد يوضحلي ها النقطه هاذي خاطر فيبالي السيناريو تكتب بالاعتماد على وثائق و شهادات متاع ناس واكبت "العايله المالكه" (بون العراقيه) في الحقبه هاذيكي و زيد انتاج البي بي سي ناس يعرفو آش يعملو !!!
فمعناها سمعت برشا كلمات طايشين استهزاء...تزييف حقائق...محاولة تغيير التاريخ... إلى غيرو من العبارات إلي نتصور جل الناس سمعوها.....
لهنا نحب نوقف و نسأل روحي كمواطن عربي(ما ينجمش ينحي خشمو من وجهو) زعمه وضعيتنا كعرب سياسيا و اقتصاديا و إلي تحب تسمي سمي زعمه وضعيتنا باهيه ؟؟؟ مشرفه ؟؟؟ شنوه محلنا م الاعراب في مصاف الشعوب و الدول؟؟ إذا كان باش نجاوب و نقول و انو سمعتنا "في الحضيض" يولي من البلاده(في معناها الفقهي) باش نقول و انو المسلسل اساء للعرب
و إذا كان باش نقول إلي احنا شعب عربي و باهي و هات من هاك الشعارات إلي تتقال في اخبار الثمنيه متاع الليل نوليو نقولو انو نكذبو على رواحنا و اي حد يدعي العكس هات يعطينا نشوفو...
فهاذايا باب و نسكروه متاع اساء للعرب.
نرجع تو للمسلسل إلي تصور منو 90% منو في تونس و نحب نأكد على النقطه هاذي بالذات.
ياخي زعمه الفنانين التوانسه إلي شدو الصف باش ياخذو "دويور" في المسلسل مش دور !! زعمه ما يفهموش ؟؟ هوما عرب من نوع خاص ؟؟ (للامانه احسن دور تعطى لفؤاد ليتيّم هاك الولد إلي يعمل في الشيطان في ناس نسمه للي يتبع ناس نسمه عطاوه دور وزير و ضهر في ما مجموعو دقيقتين على اربعه سوايع) ما نحكيوش عاد على منافس جاد المالح إلي نهار الكل و هو يبص علينا و الدور العزيز الغالي إلي عملو(م التجلطيم متاعو ولى يتجلطم على نصر الدين لين خرجلو اليوم ع الموزاييك و عطاه برجو)
ايه تو كي المسلسل تصور في تونس و مثلو فيه توانسه و لو ادوار بسيطه (وديما على افتراض انو المسلسل اساء للعرب) ماو فما رقابه في وزارة الثقافه و تصاريح و ڢيزا باش الناس تصور و إلا زعمه عمار وزارة الثقافه عندو فلسفه مغايره لعمار حبيبنا إلي نعرفوه ؟؟
زعمه الممثلين كيف قراو السيناريو عجبهم و بعد بطلو ؟؟
باختصار شديد التوانسه وقتاش ولّى المسلسل مش باهي عندهم: وقت عداتو نسمه في مرحله اولى و في مرحله ثانيه و هاذا جوهر الموضوع هو الممثل العالمي إلي قام بتجسيد دور صدام إلي هو إيڨال ناعور الإسرائيلي الجنسيه فكل الشوشره إلي تم إحداثها م الاول سببها ما كانش المسلسل في حد ذاتو و إنما الممثل هاذا بالذات و لهنا باش نسأل و نقول علاش التوانسه تشكاو م المسلسل كان في الصيف لخراني وقت هو المسلسل هبط في البي بي سي و ع الانترنات عندو اكثر من عامين؟؟ السبب كيف ما قلت و هو انو كيف ما نعرفو احنا التوانسه نموتو على بعضنا و نحبو بعضنا ديجا كان تلقى واحد يخدم راهو فما وراه عشره يمقصو فيه و يحطولو العصا في العجله و حديثنا قياس كيف تعمد بعض الصحفيين و منهم واحد (ظلفاوي هو تو) باش يتركزو على القضيه الفلسطينيه و الناس إلي عندهم حساسيه للموضوع هاذا علاش ؟؟ لتو نسأل و ما لقيتش جواب !!!
من غادي عاد بدات حكاية نسمه صهيونيه (لوغه جديده هاذي تشوف حد ما عندكش نفس النظره متاعو قلو يا صهيوني!!).
مسلسل الاستهداف هاذا متاع القناة الفتيّه هاذي تواصل كيف ما باش نشوفو في التدوينه الجايه و ملاحظه بسيطه بربي لو كان تسمحو خاصة للناس إلي اول مره تقرالي: انا تونسي و مسلم و حتى حد ما ينجم ينزع مني ها الحاجتين فبالله اخطاونا من لوغة يا عميل يا صهيوني و ما لف لف من الشقاشق اللفظية الجوفاء من هذا النحو...
نتقابلو في التدوينه الجايه ان شاء الله
هناك 11 تعليقًا:
يا هشوش، المشكلة مع نقمة تي في أكبر من حكاية المسلسل. كلامك بخصوص المسلسل أغلبو معقول. إحنا بالحق في حاجة لنقد وضعنا ومشاكلنا وحكامنا اللي يمصو في دمنا. مشكلتي مع المسلسل هي في دور الإسرائيلي اللي هي دور رئيسي. هذاك بالفلاقي يتسمى "تطبيع" أو محاولة دفع المشاهد للتطبيع اللاواعي. من حيت, المبدأ ما يلزمش بأي شكل من الأشكال "الترويج" لأي فكره, أو منتوج إسرائيلي ولو مجرد إسم ممثل مع,مور.
يا هشوش لكلنا نعرفو انو المسلسل كلو حشوات.. و موش هذا موضوع الحملة هاذي..لكن اعتبرو لحكاية تمس الدين والتربية..ايا ما تبداش تخلوض مالا
يا هشوش يا خويا يهديك ويجعل منك، يجي منو تتفرج انت وأمك ولا أختك على هاك الشلاكة اللي تحكي على فواز والنص ميترو اللي في كلصونو؟؟؟ ملا انحطاط تقول عليها قاستّو بالديسيماتر. تفوووووووووووووه على اللي ما يحشمش
سلام عليكم
بالله تعملو مزيه كل واحد ميسالش يحط حتى اسم كيف ما جا جوست باش ع الاقل كيف نجي نجاوب اولا انجم نفرق و ثانيا باش نعرف نجاوب على كل واحد بون مسألة شكليات لا علينا
بالنسبه لخونا انونيم لولاني: ما يعبر عنو بالتطبيع باش تقعد إلى امد بعيد مسألة اختيارات علاش اختيارات؟؟ جوست خاطر إذا كان فما شكون يرفض اي علاقه مع دولة اسرائيل و هاذا حق من حقوقو و ما ينجم حد يقلو لا !! راهو فما زاده شكون يقول اذا كان فما حد ينجم ينفعني بفكره و إلا باي حاجه كانت مهما كانت انا ناخذها من عندو بغض النظر على شكونو هو و إلا منين جا و إلا آش يعمل في دنيتو و هاذا زاده حق من حقوقو و حتى حد ما عندو الحق باش يمنعو زاده و لو من منطلق التطبيع إلي انتي حكيت عليه...
تقولي انتي من حيث المبدأ ممكن نسمعك و نحترم اختيارك اما زاده من حقي باش ما نوافقكش بون ما نحبش نطيح في متاهات القضيه الفلسطينيه و كيفاش في اواخر اربعينيات القرن الماضي و اوائل الخمسينات منه الناس تبيع في ارضها و خرجو منها برضاهم الشي إلي شجع اليهود و غيرها م التفاصيل إلي هي ماهياش موضوعنا تو..
تبقى في الإخر مسألة اختيارات اما شنوه إلي نرفضو في هاذا الكل و انو على خاطر انا مستعد باش نتقبل فكره من اسرائيل نولي انا خاين و صهيوني و كذا و هات من هاك اللاوي بمعنى انجمو نختلفو في آراءنا اما موش باش نوصلو كي الوليدات الصغار انتي ماكش معايا دونك ضدي
موضوع طويل حكاية فلسطين هاذي و لو انو حديث يجيب حديث و حاولت باش نختصر اكثر ما يمكن(نتصور فشلت باش نختصر كتبت برشا حتى لتو) المهم ان شاء الله تكون تقبلت و فهمت بعض ما حبيت نقولو ع الاقل...
بالنسبه لخونا الآنونيم الثاني:
خويا او اختي بون ما نعرفش!! قلت المسلسل بكلو حشوات فين مثلا تنجم توضحلي الشي هاذا ما فهمتكش بالظبط خاطر؟؟؟
قتلي موش هاذا موضوع الحمله: بون ممكن اما انا كيف ما حكيت قلت و انو مازالت تدوينه اخرى باش نكمل نحكي فيها ع "الحمله" كان انجمو نسميوها هكا جوست انا خذيت معناها اصل الحمله و باش نستعرض حسب الترتيب الزمني إلي صارت فيه الاحداث و ريت انو باش نخففو شويه ع القارئ باش نقصم الموضوع على جزءين و كان لزم ثلاثه خاطر تعرف احنا في تونس عنا الصبر ما شاء الله ميسالش ان شاء الله اتبع التدوينه الجايه ممكن تلقى ما يشفي غليلك...
بالنسبه لصديقنا (كي العاده او صديقتنا) الانونيم الثالث:
حكاية نص ميترو استيك في ڨلصونو هي (و هاذي ممكن برشا ما يعرفوهاش) من الموروث الشعبي بما انها قصيده هجائيه تقالت باللوغه العاميه في الزعيم الراحل بورڨيبه دونك ماهياش "مايد اين نسمه تي ڢي" تبقينا تو في مشكل تنجم تتفرج فيها انتي و العايله و إلا لا ؟؟ لهنا باش نتخالفو شويه انتي و البيئه انتي و العايله و ما إلى ذلك...
إلا انو ها النوعيه هاذي متاع البرامج ما تجي كان هكاك معناها التلقائيه هي سيد الموقف(إلي تنجم زاده في بعض الاحيان ما تروقش للبعض) اما فاش قام ها التهويل هاذا الكل !!! و نعطيك مثال بسيط: علاش انطوني كاڢانا كيف حضر و قام بحوايج(بون انا شخصيا نتفرج مع الوالد حشمت شويه) ما صار حتى شي و لا حرف تقال او تكتب عليه ؟؟ زعمه علاش ؟؟ زعمه موش على خاطر احنا في تونس ما نضويو كان ع البراني ؟؟ زعمه موش على خاطر احنا نموتو على بعضنا ؟؟
ملخص الحديث هو انو قد يكون فما حوايج تقلق الناس وهاذي ظاهره طبيعيه ديجا التلافز التونسيه الاخرى ما خلاو ما عملو فينا !! قلت عاد قد يكون فما قلق اما موش باش ناخذو منها مواقف متطرفه قال شنوه صهيونيه !! معناها شي اجبد و حط هز م الخابيه و هات في الجابيه!!
ان شاء الله نكون جاوبتكم الكل و مشكورين ع التواصل متاعكم و لو انو نحب نزيد نقرالكم تعاليق اخرى باش تزيدو توضحولي وجهة النظر متاعكم كيف ما طلبت بكل لطف م الانونيم الثاني و مرحبا بيكم مره اخرى و شرفتونا
سلام عليكم
يا سي هشوش أدامك الله ذخرا للشعب الجربوعي
آنا متفق معاك من ناحية المبدأ بحيث خذ العلم ولو من جربوع كيفي. نورمال المهم تسلك أمورك. لكن يا هشوش كي يبدا الجربوع اللي باش تاخو منو العلم عدو ليك تعدّا على سيادتك الوطنية عديد المرات (1985 و1988 إلخ) أعتقد أنو ما فما حتى مجال للتفاهم. بالنسبة لي ع الأقل، لا يمكن التحاور مع المحتل ولا التفاوض ولا حتى شيء. احنا الجرابع التوانسة ربي يحيينا ويخلينا ذخرا للتجربيع العربي ما عاونا فلسطين حتى بشيء كان بالتجغجيغ والحكايات الفارغة فأضعف الايمان أنو الواحد يقطع علاقتو بالكيان اللقيط اللي توا يحاول يخترق المغرب الكبير عبر الإنترنيت والميديا وهذا مش مجرد كلام. اللعبة كبيرة يا هشوش ولا تحتمل حسن النوايا خويا العزيز.
فك عليك يا راجل من لغة الحوار والتفاوض والإنفتاح ع الآخر. تي لعرب عندهم ستين سنا وهوما ينفتحوا آش ربحوا؟ القدس وراحت وفلسطين محتلة والجولان محتل واللاجئين وماهمش راجعين والحكومات الجربوعية تعمل في التطبيع تحت حس مس والشعوب ويني؟ الشعوب تبوس في الواوا........ يزّي يا راجل قلوا حوار وتفتح وتثاقف!
اهلا بالجربوع هههههه تبارك الله صديقي حلوه الكنيه !!
باهي نبدى معاك: المرات إلي حكيت عليهم و انو الجربوع الاكبر تعدى ع السياده الوطنيه اغلب الظن تحكي على حكاية حمام الشط (كان غالط صلحني) كاينك نسيت و انو العمليه كانت منسقه مع قياديين تونسيين !!! و بالاماره الدوسي الموجود متاع قائمة الجواسيس المعتمدين في تونس و غياب ادنى ردة فعل للحكومه التونسيه في الوقت هاذاكا !! تي هاو الشي منا فينا آشبينا نلوجو ع الغير ؟؟
احنا صحيح ما عاوننا فلسطين بحتى شي اما هوما باش عاونو رواحهم ؟؟ بخروجهم الطوعي من اراضيهم ؟؟ بتقراق "مسهولينهم" ببعض الاطراف "باش الضرب ما يوقفش" ؟؟ آش دخلي فيهم انا ؟؟ عاونوني بحاجه ؟؟ نفعوني بحاجه ؟؟ هاذا إذا نحبو نردوها علاقات انفعني و ننفعك !! قتلي انفتاح اناهو الانفتاح ؟؟ بيعان طرف الڨاز ولات انفتاح ؟؟ تي هاو انغلاق ما عادش انفتاح !! هاذا إذا تحبني نجاوبك...
باهي تو نرجعلك آش دخل اسرائيل في نسمه تو ؟؟ الراجل جربوع كيفنا كيفو نعرفوه تربية يدينا منين جات اسرائيل؟؟؟(نحكي على موضوع محدد: قناة نسمه)
بالنسبه للي يبوسو في الواوا كيف يلقاو شكون يشجعهم ع الواوا تحب انتي تمنعهم ؟؟ كان جماعة الواوا ما لقاو شكون يسمعهم راهم انقرضو من هاك العام يقعدو يبوسو ف الشايح...
تعملشي عليّ مزية خويا هشوش تقبلني عندك لاجىء إفتراضي وتنشرلي هالنصيص بالطبيعة كان تنجم. كان ما تنجمش ميسالش راهو.
المقامة الجربوعية في هجاء أزلام الصهيونية
كان يا مكان وسالف العصور والآوان، كان فمّا بلاد من البلدان، فيها سلطان ذكر وشعب جبان. وكان زادا فما كيان، تزرع ك السرطان في جسم الإنسان. كيان جابو المحتل ورحبوا به العربان الغربان.هاالكيان يعمل في عمايل يحشم منها الشيطان، يذبح في النساء والصغار ذبحان وما يروي عطشو كان دم العزّل رجال ونسوان، يتلذذ بالقتل والسحل وجريان الدم وديان.
هالكيان دمّر الديار وجرّف الأراضي وحاصر بني الإنسان. سرق الماء والأرض واحتلّ البلدان. جيشو متجبْر متوحّش كالحيوان. جيش وكيان في العالم مكروهين، من الأحرار والصادقين، والناس اللي تعرف العدالة وتحكم بالبراهين، إلاّ في بلاد العربان فإنهم غير ملومين، كل وين يحلّ ركبهم بيهم مرحّبين، وليلهم الراس موطّين راكعين خاشعين حكّام ومواطنين.
وخصوصا في بلاد السلطان، وين نادى الوزرة وحرّش الغزرة وقال حياتي ومالي لبني صهيون وأمن وأمان الكيان. جرات حاشية السلطان تطلب في الرضا والغفران، وتبوس في يد بني صهيون، تعقد في الإجتماعات السرّية وتستدعى في مجرمي الكيان للإجتماعات الأممية ووزراء الكيان لزيارة بلاد الحنّة والرمان ومواطني الكيان لزيارة المعابد وتقديم القربان تحت حماية جند السلطان وبفلوس الشعب الجربان.
Contre la mutilation et la confusion contre "amazighité
Vous voulez la vérité: le sketch de sawsen maalej (il est vrai qu'il a été déplacé surtout si on sait très bien les gens qui attendent cette chaine au tournant)était un prétexte qui est tombé du ciel pour ceux qui sont contre le concept de la chaine à savoir "chaine du grand maghreb".
Ces personne qui sont très connu sur facebook et sur la blogsphère (3amrouch, titof, karim mokhtar, tomy chelly, med sghaier dridi.....) ont formé un clan arabo-islamiste pour contrer toute forme d'unioon ou rapprochement maghrébin au dépens du suivisme idéologique, religieux et artistique au moyen orient, égypte et pays du golf.
Ces personne qui sont en train d'orchestrer une campagne de mutiliation à tout ce qui a rapport avec le mot "amazigh".
Ces personne veulent que le projet maghrébin reste noir sur blanc, ils veulent garder seulement de ce projet l'appelation "maghreb arabe" pas plus.
Ces personnes sont en train de défendre l'égypte farouchement et dembellir son image pour qu'on reste sousla tuelle de ce pays et de l'orient en général. Ces personnes sontn en train de diffuser intelligemment des idées salafistes et islamistes (pas musulmanes).
SVP, réveillez vous et soyez vigilant.
ردي ع الانونيم لخراني إلي جوست فوق التعليق متاعي هاذا:
خويا هاذا هو بيت القصيد إلي نحب نوصلّو اما بالشويه بالشويه لحديث هاذا بالذات إلي انا انا نقصدو بغض الطرف ع الاشخاص إلي تحب و إلا هاذيكي اختياراتها باش توظف الشي هاذا...
نكمل نحكي لخويا ان شاء الله في الجزء الثاني
c'est moi le dernier anonyme, voici le reportage sur le quel se base ces minables dans leur sale et douteuse campagne: le vrai reportage et pas le reportage déformé et truqué:
http://www.facebook.com/video/video.php?v=1316685750954&ref=mf
A diffuser svp
جوستومون يا صاحبي ها الروپورتاج هاذ تبعثلي و تحط قدامي قرابة 30 مره و كان هو السبب الرئيسي باش نكتب في الموضوع هاذا...
كانك ع النشر متاع الڢيديو هاذي اتهنى هي بلا منازع اكثر ڢيديو منتشره ع الفايسبوك المده لخرانيه قبل ما يعملو الڢيديو متاع المونتاج
إرسال تعليق