توّا مدّة قرابة 6 شهور و انا نتبّع في الزميل زياد طارق بن يوسف سواء في الفايسبوك او في المدونه متاعو (بون لا محاله مش كان هو برك نتبّع فيه ..) عاد خوكم بصراحه حرت حبّيت نشوف شنيّه المرجعيّات متاعو نلقى وخينا من جماعة القصيمي و وفاء سلطان و نوال السعداوي (على فكره انا من اشد القراء للكاتبه الاخيره) لحد لهنا نفهمو و انو سي زياد انتهج سلك الالحاد لكن "بخلفيات اسلاميه" كيف ما هو يحب يسمّيها و لو انّي بيني و بين روحي ساعات نبقى نضحك و نقول و انّو في عام 2009 فما شكون مازال يشك في وجود خالق !! لكن هاذا بالطبيعه ما ينقّصشي في احترامي للاشخاص و خاصة اراءهم و افكارهم ...
عاد من شيره اخرى نشوفو و انّو زياد يتبنّى في كثير من الاحيان اراء الدكتوره الفه يوسف و يدعوها باش ترجع تزاول نشاطها الفايسبوكي و ان شاء الله ترجع !!
لهنا نشوف شويه تناقض كيفاش ملحد يتابع في نشاط مفكره لا طالما ارتبطت اراءها بمسائل تخص الدين !!! يقول قايل بسذجة السؤال تو انتي كي ماكش مؤمن بحد لواش تلوج عليها تكتب و لا تقعد عدى ان تكون المسأله مسأله حرية تعبير
عاد هاوينو اليوم دخلت ع الفايسبوك فمّاش ما انّبّر شويّه و نقيّد الاحوال نلقى خونا زياد عامل ڨروپ مسمّيه "الجمعية العالمية للدفاع عن المومسات" و نلقى زاده "لمثليه الجنسيه لواط ام حريه شخصي..." عاد صراحة تسائلت: كان زياد هاكا حد نيتو راهو يولّي مصنّف في خانة خالف تعرف اما اذا كان يستبله فينا فحكايه ما تجيش !!! شنوّه محلاك معنّق راجل بلحيتو و شلاغمو و عامل معاه علاقه جنسيّه و تقولي رومنسيّه ملاّ رومنسيّه !! (هاوكا ما غير ما ندوروها مرجعيّات دينيّه باش ما يردني حد خوانجي)
بالنسبه لحكاية المومسات المعروف و انهم منبوذين في العالم اجمع موش كان في المجتمعات العربيّه لعدّة ضوابط منها الاخلاقيّه و منها الإجتماعيّه و ابسط دليل و انو ها المومسات يعتبرو انفسهم (في الغالب) غالطين و يتفهمو كيفاش يتم ها النبذ هاذا عاد الواحد في 2009 باش يجيب فيها عيرود و فحل باش يجي يغيّر العرف و العاده و الاخلاق ؟؟؟ زياد بالطبيعه حر في روحو و كيفاش يفكّر اما يلزمو ( و لهنا نعطي في رأيي البسيط مانيش داخل في الراجل) ما يخلّيش الفانطازيا متاعو تخرج عن اللّزوم بدون موجب
على كل من خلال ها التدوينه هاذي و كيف ما حكينا على مظاهر الانغلاق الديني و الرجعيّه و غيرو حبّيت نقول و انّو اذا الواحد باش يكون علماني او حتّى لا ديني موش بالضروره باش يختلف في افكارو كلّيّا مع من لم يتبنى وجهة نظر متاعو اي بمعنى ما غير ما الواحد يولّي يقلب في كل شي رأسا على عقب متخلصين من كل الظوابط الاخلاقيه و الاجتماعيه و السياسيه على غرار جمعيّة الصداقه التونسيّه الإسرائيليّه ياخي مني نعرفوهم احنا ؟؟ و شنيّه مجالات التعاون مع البلاد هاذا دون غيرو ؟؟
وقتها نولّيو نقولو و انّو ولّينا نستهدفو و نستفزّو في ايديولوجيا معيّنه و طرح مشكل نحن في غنى عنّو
اخيرا تحيّه إلى كل الملحدين و اللادينيين لانّي اؤمن بانّو ها الناس معبّين في مخاخهم و البلوڨسفير معبّي بيه ديجا
هناك 8 تعليقات:
سامحني من رواحنا الملحدين كان ولاّ زياد طارق يمثلنا... ما فهمتش برشة شنوة الهدف مالتدوينة بصراحة
لا يا عيّاش انا ما قلتش انّو زياد يمثّلكم انا خذيتو كمثال لكن نرجع و نقول راني ما عمّمتش بيه على كل الملحدين بالرغم انّو فمّا شكون يعمّم في تصرفات بعض المرضى على الإسلام كدين و بالرغم انّو فمّا بااااااارشا م إلي يتبنّاو برشا من مواقفو اما راني ما عمّمتش و كانك ع الهدف م التدوينه عند عنوان التدوينه و كان باقي مافهمتش جوست نعطي في رأيي في ما قاعد نتابع و نشوف فيه
التطرف في الالحاد والتطرف في التدين مشاكل موجودة ف التن البلوغ
ولكن مهما اعتدل اللحدين في طرح افكارهم فالمتدينون يعتبونهم متشددين ف حقهم
خونا هاشوش السلام عليكم
يعطيك الصحة على هالبوست
اما عندي ملاحظات، تتعلق بهالراطسة متاع المنحرفين الي يسمو في ارواحهم ملحدين
يا اخي انت تشوف ثمة فرق بين ملحد واخر، يا اخي هاذومة ناس اصلا ماادعو الالحاد الا لانهم ناس غاطسة لشوشتها في الفساد والموبقات: مخدرات ووزنا وشذوذ، وعلاش نبعدو ماشيك تقرى في المدونات متعهم
وعلاش تستغرب انو يدافع عن الشذوذ، ياخي الملحدين المسخين الاخرين عملو شوي، ياخي التهجم على الاسلام وخالق الكون شوي، ياخي الزناء والخمر والدعوة للتقارب مع اسرائيل والتمني بزيارتها والدعوة للاباحية الجنسية شوي هذا
واشكون قالك انو حتى الاخرين ماهوش شواذ، مادامهم يدعو للاباحية الجنسية كيما كتب قداش من مرة زعيمهم عاشور
وعلاش تتحدث وتقول انو ماتعممش على كل الملحدين، كانك تحترم البعض منهم، هاذومة الكل كلاب منحرفين
وحد منهم مايستحق الاحترام
"امض نحن معك على الدرب"، ولاتخف من هؤلاء ومن ردودرهم
لانهم اصلا ماهمش عباد تستحق الالتفات
مشكور يا انونيم ع التفاعل اما يا حبّذا كيف تكتب تعليق تخلّي اسمك حفاظا على شويّ مصداقيّه ...
بالنسبه للكلام إلّي سيادتك قلتو حسّيت و انّو عندك شويّه تحامل و هاذا نفسروه بانّك ما ريتش ملحدين "صحاح" كان صح التعبير بمعنى و انو الملحد اذا كان ما يؤمن بحد فمن الواجب عليه و انو يحترم كل المعتقدات الاخرى المتواجده و هاذا ما افتقدناه عند برشا ملحدين إمّا لاسباب سياسيه (ما تطلّبش هاذي تفسير خاطر التونسي ذكي..) و إمّا لاسباب شخصيه مثل انو الواحد يحب 'يعمل جو' او يحب يلفت الانتباه بحوايج قد تكون غير نابعه من مرجعيّاتهم الاصليّه وقد تكون زاده كنوع من اقناع الذات باش هاوينو سوا ديزون كيف يحارب فكره و يورّي ما نشوفو انا نواقص يكون هو الصحيح و منّو "تڨرع"
على كل فمّا زاده برشا ملحدين كيف تقرالهم مواضيع غالبا ما تكون في الثقافه و السياسه تعمل عليهم جو و تشيخ ايه بالرسمي تشيخ و منهم برشا زاده اما الله غالب ستانسنا كيف ما يقول المثل التونسي "فار ينجّس خابيه" اما ما نوافقكش الراي كيف تقول إلي هوما الكل فرد خانه و لا محاله مانيش نعمل في الديبلوماسيه كيف صنفتهم نوعين و كان جيت مصنفهم الكل على بعضهم راني قلت اما لاني خايف لا منهم و لا من غيرهم و هاك تشوف اغلب تدويناتي من غير تعاليق دونك كيف نكتب نعبّر على رأيي بكل تجرّد و كان سبّوني في تعليق يبقى هاذا رأي و كان فمّا شكون استحسن فكره من افكاري راي اخر و ملزوم في الحالتين باش نقبل الاراء الكل يبقى اخي الكريم (مع امل انّك تعرّف بروحك) نحنا مش في خنڨه باش نمضي او لا علاش ديما افكارنا ما تتناقشش و نلوجو طول على لغة العنف ؟؟
مع تحياتي
بالنسبه للزميل ال پادرينو:
تقولّي مهما اعتدل الملحد ديما باش يبقى المتديّن يغزرلو هاك النظره الدونيّه تي عاد علاش هاذا الكل و علاش ما نخلّيوش ديما مجال للحوار و التسامح بمعنى التفهم من قديم الزمان موجوده حكاية الإلحاد و الإسلام و النصرانيه و اليهوديه ياخي قبل ماهم عاشو لاباس عليهم تبقى إلي تبدل من قبل لتو انو قبل كان كل واحد يحترم معتقدات الاخر اما تو هاك تشوف في تجلطيم بعض الملحدين على المقدسات الدينيه (غالبا الإسلاميه) لكن ديما نبقى نقول و انو ديما يلزم التصدي لمثل ها الاشخاص ...
الاخ هاشوش السلام عليكم
اخي انا ليس لي مدونة، واصلا لا اهتم كثيرا بالتدوين ، ولا التفت ال لبعض التدوينات ومنها مدونتك انت والبعض القليل الاخر
بالنسبة لتعليقك حول هؤلاء المنحرفين، اوافقك عليه اجمالا ولكن اذا اخذنا الامر من ناحية مبدئية، فليس هناك ملحد صحيح و آخر دون ذلك يعني ليس هناك ملحد لايستوجب الاحترام واخر يستوجب الاحترام، كل ملحد هو منحرف نقطة للسطر لان حتى ماقد يترائى لك على انه كلام منمق ومنطقي يصدر منه، فهو ذا خلفية وارضية باطل وهشة تحارب الله ورسوله وتدعو لمايغالب الاسلام، مادامت تعمل في النهاية على رفض منظومة القيم، وبالتالي لافائدة من تلك الافكار وان بدت ذات ظاهر براق
اما اننا يجب نقاش الاخرين، هذا كلام قد يقبل من اول وهلة، ولكنه لا معنى له، لاننا لانتحدث هنا عن اناس اسوياء، نحن نتحدث عن منحرفين، باتم معنى الكلمة، وهاانك نفسك وصفتهم بالملحدين غير الصحاح
هؤلاء كما ترى بنفسك، يدعون لكل الموبقات من زنا وسكر وشذوذ ومحاربة القيم والدعوة للتبشير المسيحي والتطبيع مع اسرائيل وغيرها
يعني لم يبق شيئ من المضرات لم يتبناه هؤلاء، بل ويعتزون بذلك
فماذا ستناقش معهم
وانا اوافقك ان دوافع هؤلاء هي نفسية اكثر تعكس تدبدبا وتشوشا، وهل كان المنحرفون الا متبذبين ومشوشين
على كل يعطيك الصحة
يعطيك الصحه خويا
اما كيف حكيت ع الحوار مانيش نحكي ع المسأله الإيمانيه و العقائديه نحكي على افكارهم في مجالات اخرى كالسياسه و الثقافه و غيرها خاطر معلوم و انو المسأله الإيمانيه هي ممكن المسأله الوحيده إلي ممكن مؤمن و ملحد ما ينجموش يتفقو عليها الى ان يرث الله الارض و من عليها ...
على كل تحليلك مزيان في المجمل
شكرا على التفاعل
إرسال تعليق