حويجه ليكس ع الإخر

ما فهمتش ها الريداكتور الناعس هاذا متاع الموزاييك وقتاش باش يفيقو بيه و يجيبوه على لوحه !!! راهو عمل العار!!!
إلي ما فهم شي ينزل ع التصويره باش تكبر

خواطر تونسي يدفع في دم قلبو في فاتورة الضو

هوما لا محاله كليمتين خفاف نظاف و ما غير ما نطولوها خاطر التونسي مش زكيم...
سمعنا ها الايامات حكاية الجزيره و كيفاش تتشرط على القنوات التوانسه في بيعان ماتشوات الكوپ دافريك و كيفاش طلبت 13 مليار باش تبيع 10 ماتشوات...
لهنا فما ملاحظتين الواحد لازم يسوقهم:
اول حاجه كيف ما يقول المصري:اذا عندك حاجه عند الكلب قلو يا سيدي
اشمعناها: اذا انتي كحكومه و تلفزه تونسيه(نحكي خاصة على حنبغل) نازله ع القناة الام(الجزيره الاخباريه) بالسب و الشتم صباحا مساء و كل احد ما يلزمكش تستنى باش بنت القناة باش تقلك مرحبا بيك ايجا نبيعلك و زيد انتي كيف رفضت الجزيره قعدت تستنى ف اقتراح آخر من عندك ياخي انتي دورت تقول تعدي ف امتحان و دوبلت...
الحاجه الثانيه سمعنا الجمعه إلي فاتت و انو تونس ضهر عندنا مال قارون و إلا درا شنيه لحكايه باش نشريو طياره ب390 مليار عاد من باب "تتليف و تدغيف" الشعب التونسي اشري يا حكومه خلي الناس تخطاك شويه إلي كبيدتهم تشوات بدفعان ف تساكر الضو باش يتفرجو على حاره عفاطه كل نهار طالعينلنا ف التلفزه باش يقدمو الرداءه في اسوء حالاتها...
نتصور إلي نجم يشري طياره ب390 مليار ما كسبتهاش فرانسا(باش ما نقولوش حاجه اخرى) و يمشي يعدي نوال ف الباهاماس ما تكيدوش 10 مليارات و حديثنا قياس...
ايا انستو

غلطة مطبعية و برشا غلطات اخرين

من اول الشهر لاحظنا ضجّه اعلاميّه كبيره حتى قبل عرض مسرحية غلطه مطبعيه(فوت دو فراپ) و إلي بدات حسب ما نتفكر بالفايس بوك...
في التدوينه هاذي حبيت ننقل الشي إلي ريتو و إلي سمعتو و من بعد باش نعلق عليه من وجهة نظر شخصيه بحته:
نبداو قبل كل شي بالحويجات إلي ريتها ايجابيه
اولا فكرة انو الممثل و المخرج يتعاملو مع شركة انتاج فني باهيه خاصة كيف ما نعرفو الناس الكل و انو من شبه المستحيل و انو واحد برك ينجم ينتج مسرحيه او حتى فيلم!!
ففكرة انو حسام الساحلي يتعامل مع الكازار پرودوكسيون باهيه خاصة كيف نعرفو الطرق "الذكيه" نوعا ما إلي تستعملها البواته هاذي ابدى م الحملات الدعائيه و الاشهاريه م الفايس بوك للشوارع للمحطات الاذاعيه للصحف الخ الخ .... الشي هاذا و المؤكّد و انو لا عاطف بن حسين و لا حسام الساحلي و لا حتى جمال مداني قادر باش يعملو حتى لو كان تجمعو مع بعضهم!!
و الكازار عندها م الناس إلي صراحة تكونت عندهم خبره باهيه ف التنظيم و طريقة العمل كيف محمد كريم العمري و ايمن الجوادي و غيرهم
الحاجه الثانيه و إلي شدت انتباهي الكاستينڨ إلي خدم عليه حسام الساحلي و إلي نتصورو جا متأثر برشا بالنجاح الباهر و المنقطع النظير في شخصه هو قبل كل شي و في عاطف بن حسين و في جمال مداني زاده خاصة بعد نجاحهم الكبير في مسلسل مكتوب في الزوز اجزاء متاعو معناها الناس حتى من قبل ما تتعرض المسرحيه لاول مره كان عندهم استعداد باش يتفرجو في عرض جديد لنجوم كانو اقنعوهم على امتداد شهرين من رمضان اي انو الكاستينڨ او اختيار الممثلين كان عندو دور باش يجيب الناس....
نتعداو تو لنقاط الاستفهام:
اول حاجه و نتصور الحاجه هاذي برشا ما يعرفوهاش انو جمال مداني ما كانش هو إلي باش يمثل في غلطه مطبعيه و انما كان م المفترض انو الممثل فتحي المسلماني هو إلي كان باش يقدم العرض مع عاطف بن حسين خاصة و انو بدى يبرّڢ و وصل زاده باش يعمل السپوت متاع المسرحيه(بالظبط صور 3 سپوت) فجأة و دون سابق اعلام و في ظرف جمعتين نلقاو جمال مداني دخل ف معمعة المسرحيه وقت اول عرض مازال عليه تقريبا جمعه فاستغرابي لزوز حوايج لهنا: فاش قام ها التبديل؟؟؟ و زعمه ما يأثّرش هاذا على تقمص "مونڨيڨي" للدور ف المسرحيه؟؟؟
نواصل، و لهنا نحب نعرف شكون لاهي باسوام التساكر متاع الدخول!! سمعت و انو اول عرض تباعت فيه التساكر ب 15 و 20 دينار قلت انا بالكشي على خاطر العرض لول و يحبو نوعية المتفرجين تكون محدده قلنا ميسالش.... ما راعني كان و في العرض الثاني و الثالث و الرابع و إلي بعدهم نفس السوم!!! زعمه ب 15 و 20 دينار نحبو نعديو مسرحيه و الحال شتاء و الناس احوالها كازّه شويه ؟؟؟
حاجه اخرى ف النطاق هاذا كيف الواحد يحب يخرج بمسرحيتو م العاصمه و يدخل بيها للجمهوريه ما نتصورش و انو احسن مكان باش يعرض فيه هو وتيل 4 نجوم ( والاسوام كي العاده 15 و 20) كيف ما صار في سوسه وقت تعدات في سوس پالاص نهار 17 ديسمبر ف ناخذو نفس المثال سوسه و الي نعرفو و انو المسرح البلدي مازال كيف عاود حل و ما عندوش حتى 9 شهور و نعرفو و انو تعاود تجهز بكلو م الإضاءه للكراسي للمسرح الخ.. فمن باب اولى و احرى انو المسرحيه تتعرض في فضاء مخصص مش في قاعة مؤتمرات....

بدينا نقربو من نهار 8 ديسمبر و كيف ما كل عام لازم المكس يخدم على روحو... عاد هاوينو اليوم الثمنيه متاع الصباح لا يزي الواحد فايتتو الكار رصاتلي نجري و نجرّي باش نخلط ع التيدي... ايا يا ربي العمال عليك جيت باش نحط ساقي في الفاك نلقى حضبه و ڨول قدام الباب قعدت نلوج انا شنيه الحكايه قلت بالكشي رافل على الجماعه المڨربطه ياخي نلقى زويز عثمثميه واحد فيهم من جماعة الاداره و حاطين طاوله و "صنيديق" قال اشنوه 2626!!!! ايه اش بيه هايل ياسر معناها ما ندخل إلا ما نخلص؟؟؟ هاو هايل لا و زيد شكون ياخو عليا "الصدقه" خليفه!!!(بون بالنسبه للي ما يعرفش خليفه سي خليفه هاذا هاوينو تقول انتي الشاوش متاع الاداره نهار السبت يتشحت في واحد يقرى معانا على مياة فرنك) دونك افهم انتي راهي الفلوس بآآآآآآزززززززززززز ماشيه للناس إلي يستحقوها... عاد هاوينو قلت ميسالش خلينا نعملو عركه انا مكرز مكرز!! تميت داخل و تمنيت حد يبربشني خليني نعطيه شربو ع الصباح تعديت ما على بالي بحد نشوف ف الناس تغزرلي اما بصحتهم ما كلمونيش!! ايه تو إلي متى باش نبقاو نمسكيو على بعضنا و باش نقعدو نعطيو ف الفلوس بالسيف ؟؟؟ و لوقتاش باش يقعد المستوج هاذا باش يقعد كل عام يتعاود؟؟؟ زعمه مش وقيّت باش ها الجميعه يوقفو الضرب باسم التضامن و باسم غيرو و غيرو

اقتراح للمراجعه و النظر

نحب نهني قبل كل شي اختنا فاطمه بمناسبة خروجها و كيف ما سمعنا و انو معنوياتها مرتفعه وهاذا في حد ذاتو شي يفرّح اما نتصور و انو عملية اعتقالها في الجمعه لخرانيه تمثل في حد ذاتها مسؤوليه لمجتمع التدوين و المدونين إلي كيف ما اشرت في تدوينات سابقه و انو ها الشريحه مؤثره ياسر ف تونس و في العالم ككل...
عاد شخصيا حبيت نطلب من فاطمه(ان شاء الله تقرى ها الكلام او ع الاقل يوصللها) باش ها الحادثه إلي صارتلها تكونلها حافز باش تكمل على قدام مش باش ترجعها لتالي...
من جهه اخرى نتمنى لو كان واحد م الزملاء(سفيان شورابي مثلا) يقوم بانترڢيو مع فاطمه كيف ما عمل مع عدنان الحاجي ع الاقل باش نفهمو بعض الحيثيات الدقيقه منها مباشرة وباش نفهمو زاده شنيه وضعيتها بالظبط في الوقت الحالي(معناها سيبوها و فما قضيه في الثنيه و إلا ما فما شي و ما لقاو عليها حتى تهمه)
اسئله لحقيقه خامرتني م البارح م إلي سمعت الخبر المفرح...
في انتظار تفاعل بقية الزملاء و فطومه زاده ان شاء الله نهاركم زين

ماعادش فيها حديث يلزم نتعداو للتنفيذ

برشا ناس تأسّفت او بالاحرى تألّمت كيف سمعت بحكاية الزميله ارابيكا و إلي شخصيا ما سمعت كان البارح بحكم بعدي نسبيّا ع التي ان بلوڨ في المده لخرانيه...
شخصيا وجعتني شويه لكن من بعد فرحت موش من منطلق شماته او تشفي كيف ما يعملو برشا رقّاصه و إلي الساحه التدوينيه التونسيه براء منهم اما على خاطر اذا كان فاطمه اليوم موقوفه راهو على خاطر حاجتين واضحين وضوح الشمس و إلي هوما:
*اولا السلطه قاعده اتابع ف الشي إلي يحصل في المدونات التونسيه(بالطبيعه ما ننكروش فضل الصبابه في الشي هاذا...)
*الحاجه الثانيه و إلي هي انو السلطه بالوجه إلي قاعده توري فيه من ترويع و ايقاف و تسكير مدونات يعكس و انها خايفه اي نعم خايفه خاطر معلوم و انو صوت الحق ما يسكتش و مافما حتى شي ينجم يسكتو...
حاجه اخرى بالله: نحب نعدد انجازات السلطه في المده لخرانيه على اصعده مختلفه:
تسكير مدونة الزميل كلاندستينو، إيقاف الصحفي توفيق بن بريك، ايقاف الصوت الحر زهير مخلوف على خلفية تصويرو لروپورتاج ع المنطقه الصناعيه في نابل(تقول عليه التصاور إلي صورهم جايبهم من دارو ماهومش موجودين!!!)، ايقاف الزميله فاطمه الرياحي او ارابيكا كيف ما عرفت في الوسط التدويني....
من شيره اخرى تم إطلاق سراح نشطاء الحوض المنجمي على غرار عدنان الحاجي و غيرو...
فسياسة الدوله ولات ناس تخرج و ناس اخرى تشد بلايصهم هاوينو باش السجون ما تقعدش فارغه!!!
نحب نظم صوتي لاصوات الناس إلي تغير على بلادها و حتى لو كان نعتونا بالتخوين احنا معاك يا فاطمه و مع كل تونسي مظلوم في كل شبر من تونس و لو اختلفنا في الإيديوليجيات و طريقة التفكير اما على خاطر العوج و الظلم إلي في تونس ما ينجمش يستمر خاطر فما شكون مازال ضميرو حي....
كلمه اخيره نحب نشكر الزملاء المدونين و نستسمحهم باش نستعمل بعض من تصاورهم و نحب نستغل ها الفرصه زاده باش كل واحد فينا يبدى يخمم كيفاش باش نتعداو للتنفيذ خاطر نتصور ما عادش مجال للحديث برك يلزم نتعداو للتنفيذ و في اقرب الاجال زاده...
ربي معاك يا فاطمه و نحنا بكلنا فاطمه

ردي على محاولة الاختراق الفاشله

كنت تعرضت لزوز محاولات فاشله متاع پيراتاج للكونت فايسبوك متاعي و إلي على اثرها كان بعض الناس يطمعو باش يوقفوني عند حدي ها المحاولات الزوز كانو في ظرف ال3 ايام إلي فاتو اما الحمد الله الواحد هاوينو يفهملها شويه و يعرف وين يحط ساقيه...
عاد بالمناسبه هاذي نحب نحيي الاستاذ عمار ابقاه الله ذخرا لتونسنا العزيزه و نهديلو كيف ما نهدي للتوانسه إلي يقراولي في التدوينات متاعي (حتى لو كان هوما شويه يشرفوني ياسر و مرحبا بيهم)
نخليكم مالا مع تحفة اليوم