غلطة مطبعية و برشا غلطات اخرين

من اول الشهر لاحظنا ضجّه اعلاميّه كبيره حتى قبل عرض مسرحية غلطه مطبعيه(فوت دو فراپ) و إلي بدات حسب ما نتفكر بالفايس بوك...
في التدوينه هاذي حبيت ننقل الشي إلي ريتو و إلي سمعتو و من بعد باش نعلق عليه من وجهة نظر شخصيه بحته:
نبداو قبل كل شي بالحويجات إلي ريتها ايجابيه
اولا فكرة انو الممثل و المخرج يتعاملو مع شركة انتاج فني باهيه خاصة كيف ما نعرفو الناس الكل و انو من شبه المستحيل و انو واحد برك ينجم ينتج مسرحيه او حتى فيلم!!
ففكرة انو حسام الساحلي يتعامل مع الكازار پرودوكسيون باهيه خاصة كيف نعرفو الطرق "الذكيه" نوعا ما إلي تستعملها البواته هاذي ابدى م الحملات الدعائيه و الاشهاريه م الفايس بوك للشوارع للمحطات الاذاعيه للصحف الخ الخ .... الشي هاذا و المؤكّد و انو لا عاطف بن حسين و لا حسام الساحلي و لا حتى جمال مداني قادر باش يعملو حتى لو كان تجمعو مع بعضهم!!
و الكازار عندها م الناس إلي صراحة تكونت عندهم خبره باهيه ف التنظيم و طريقة العمل كيف محمد كريم العمري و ايمن الجوادي و غيرهم
الحاجه الثانيه و إلي شدت انتباهي الكاستينڨ إلي خدم عليه حسام الساحلي و إلي نتصورو جا متأثر برشا بالنجاح الباهر و المنقطع النظير في شخصه هو قبل كل شي و في عاطف بن حسين و في جمال مداني زاده خاصة بعد نجاحهم الكبير في مسلسل مكتوب في الزوز اجزاء متاعو معناها الناس حتى من قبل ما تتعرض المسرحيه لاول مره كان عندهم استعداد باش يتفرجو في عرض جديد لنجوم كانو اقنعوهم على امتداد شهرين من رمضان اي انو الكاستينڨ او اختيار الممثلين كان عندو دور باش يجيب الناس....
نتعداو تو لنقاط الاستفهام:
اول حاجه و نتصور الحاجه هاذي برشا ما يعرفوهاش انو جمال مداني ما كانش هو إلي باش يمثل في غلطه مطبعيه و انما كان م المفترض انو الممثل فتحي المسلماني هو إلي كان باش يقدم العرض مع عاطف بن حسين خاصة و انو بدى يبرّڢ و وصل زاده باش يعمل السپوت متاع المسرحيه(بالظبط صور 3 سپوت) فجأة و دون سابق اعلام و في ظرف جمعتين نلقاو جمال مداني دخل ف معمعة المسرحيه وقت اول عرض مازال عليه تقريبا جمعه فاستغرابي لزوز حوايج لهنا: فاش قام ها التبديل؟؟؟ و زعمه ما يأثّرش هاذا على تقمص "مونڨيڨي" للدور ف المسرحيه؟؟؟
نواصل، و لهنا نحب نعرف شكون لاهي باسوام التساكر متاع الدخول!! سمعت و انو اول عرض تباعت فيه التساكر ب 15 و 20 دينار قلت انا بالكشي على خاطر العرض لول و يحبو نوعية المتفرجين تكون محدده قلنا ميسالش.... ما راعني كان و في العرض الثاني و الثالث و الرابع و إلي بعدهم نفس السوم!!! زعمه ب 15 و 20 دينار نحبو نعديو مسرحيه و الحال شتاء و الناس احوالها كازّه شويه ؟؟؟
حاجه اخرى ف النطاق هاذا كيف الواحد يحب يخرج بمسرحيتو م العاصمه و يدخل بيها للجمهوريه ما نتصورش و انو احسن مكان باش يعرض فيه هو وتيل 4 نجوم ( والاسوام كي العاده 15 و 20) كيف ما صار في سوسه وقت تعدات في سوس پالاص نهار 17 ديسمبر ف ناخذو نفس المثال سوسه و الي نعرفو و انو المسرح البلدي مازال كيف عاود حل و ما عندوش حتى 9 شهور و نعرفو و انو تعاود تجهز بكلو م الإضاءه للكراسي للمسرح الخ.. فمن باب اولى و احرى انو المسرحيه تتعرض في فضاء مخصص مش في قاعة مؤتمرات....

بدينا نقربو من نهار 8 ديسمبر و كيف ما كل عام لازم المكس يخدم على روحو... عاد هاوينو اليوم الثمنيه متاع الصباح لا يزي الواحد فايتتو الكار رصاتلي نجري و نجرّي باش نخلط ع التيدي... ايا يا ربي العمال عليك جيت باش نحط ساقي في الفاك نلقى حضبه و ڨول قدام الباب قعدت نلوج انا شنيه الحكايه قلت بالكشي رافل على الجماعه المڨربطه ياخي نلقى زويز عثمثميه واحد فيهم من جماعة الاداره و حاطين طاوله و "صنيديق" قال اشنوه 2626!!!! ايه اش بيه هايل ياسر معناها ما ندخل إلا ما نخلص؟؟؟ هاو هايل لا و زيد شكون ياخو عليا "الصدقه" خليفه!!!(بون بالنسبه للي ما يعرفش خليفه سي خليفه هاذا هاوينو تقول انتي الشاوش متاع الاداره نهار السبت يتشحت في واحد يقرى معانا على مياة فرنك) دونك افهم انتي راهي الفلوس بآآآآآآزززززززززززز ماشيه للناس إلي يستحقوها... عاد هاوينو قلت ميسالش خلينا نعملو عركه انا مكرز مكرز!! تميت داخل و تمنيت حد يبربشني خليني نعطيه شربو ع الصباح تعديت ما على بالي بحد نشوف ف الناس تغزرلي اما بصحتهم ما كلمونيش!! ايه تو إلي متى باش نبقاو نمسكيو على بعضنا و باش نقعدو نعطيو ف الفلوس بالسيف ؟؟؟ و لوقتاش باش يقعد المستوج هاذا باش يقعد كل عام يتعاود؟؟؟ زعمه مش وقيّت باش ها الجميعه يوقفو الضرب باسم التضامن و باسم غيرو و غيرو

اقتراح للمراجعه و النظر

نحب نهني قبل كل شي اختنا فاطمه بمناسبة خروجها و كيف ما سمعنا و انو معنوياتها مرتفعه وهاذا في حد ذاتو شي يفرّح اما نتصور و انو عملية اعتقالها في الجمعه لخرانيه تمثل في حد ذاتها مسؤوليه لمجتمع التدوين و المدونين إلي كيف ما اشرت في تدوينات سابقه و انو ها الشريحه مؤثره ياسر ف تونس و في العالم ككل...
عاد شخصيا حبيت نطلب من فاطمه(ان شاء الله تقرى ها الكلام او ع الاقل يوصللها) باش ها الحادثه إلي صارتلها تكونلها حافز باش تكمل على قدام مش باش ترجعها لتالي...
من جهه اخرى نتمنى لو كان واحد م الزملاء(سفيان شورابي مثلا) يقوم بانترڢيو مع فاطمه كيف ما عمل مع عدنان الحاجي ع الاقل باش نفهمو بعض الحيثيات الدقيقه منها مباشرة وباش نفهمو زاده شنيه وضعيتها بالظبط في الوقت الحالي(معناها سيبوها و فما قضيه في الثنيه و إلا ما فما شي و ما لقاو عليها حتى تهمه)
اسئله لحقيقه خامرتني م البارح م إلي سمعت الخبر المفرح...
في انتظار تفاعل بقية الزملاء و فطومه زاده ان شاء الله نهاركم زين

ماعادش فيها حديث يلزم نتعداو للتنفيذ

برشا ناس تأسّفت او بالاحرى تألّمت كيف سمعت بحكاية الزميله ارابيكا و إلي شخصيا ما سمعت كان البارح بحكم بعدي نسبيّا ع التي ان بلوڨ في المده لخرانيه...
شخصيا وجعتني شويه لكن من بعد فرحت موش من منطلق شماته او تشفي كيف ما يعملو برشا رقّاصه و إلي الساحه التدوينيه التونسيه براء منهم اما على خاطر اذا كان فاطمه اليوم موقوفه راهو على خاطر حاجتين واضحين وضوح الشمس و إلي هوما:
*اولا السلطه قاعده اتابع ف الشي إلي يحصل في المدونات التونسيه(بالطبيعه ما ننكروش فضل الصبابه في الشي هاذا...)
*الحاجه الثانيه و إلي هي انو السلطه بالوجه إلي قاعده توري فيه من ترويع و ايقاف و تسكير مدونات يعكس و انها خايفه اي نعم خايفه خاطر معلوم و انو صوت الحق ما يسكتش و مافما حتى شي ينجم يسكتو...
حاجه اخرى بالله: نحب نعدد انجازات السلطه في المده لخرانيه على اصعده مختلفه:
تسكير مدونة الزميل كلاندستينو، إيقاف الصحفي توفيق بن بريك، ايقاف الصوت الحر زهير مخلوف على خلفية تصويرو لروپورتاج ع المنطقه الصناعيه في نابل(تقول عليه التصاور إلي صورهم جايبهم من دارو ماهومش موجودين!!!)، ايقاف الزميله فاطمه الرياحي او ارابيكا كيف ما عرفت في الوسط التدويني....
من شيره اخرى تم إطلاق سراح نشطاء الحوض المنجمي على غرار عدنان الحاجي و غيرو...
فسياسة الدوله ولات ناس تخرج و ناس اخرى تشد بلايصهم هاوينو باش السجون ما تقعدش فارغه!!!
نحب نظم صوتي لاصوات الناس إلي تغير على بلادها و حتى لو كان نعتونا بالتخوين احنا معاك يا فاطمه و مع كل تونسي مظلوم في كل شبر من تونس و لو اختلفنا في الإيديوليجيات و طريقة التفكير اما على خاطر العوج و الظلم إلي في تونس ما ينجمش يستمر خاطر فما شكون مازال ضميرو حي....
كلمه اخيره نحب نشكر الزملاء المدونين و نستسمحهم باش نستعمل بعض من تصاورهم و نحب نستغل ها الفرصه زاده باش كل واحد فينا يبدى يخمم كيفاش باش نتعداو للتنفيذ خاطر نتصور ما عادش مجال للحديث برك يلزم نتعداو للتنفيذ و في اقرب الاجال زاده...
ربي معاك يا فاطمه و نحنا بكلنا فاطمه

ردي على محاولة الاختراق الفاشله

كنت تعرضت لزوز محاولات فاشله متاع پيراتاج للكونت فايسبوك متاعي و إلي على اثرها كان بعض الناس يطمعو باش يوقفوني عند حدي ها المحاولات الزوز كانو في ظرف ال3 ايام إلي فاتو اما الحمد الله الواحد هاوينو يفهملها شويه و يعرف وين يحط ساقيه...
عاد بالمناسبه هاذي نحب نحيي الاستاذ عمار ابقاه الله ذخرا لتونسنا العزيزه و نهديلو كيف ما نهدي للتوانسه إلي يقراولي في التدوينات متاعي (حتى لو كان هوما شويه يشرفوني ياسر و مرحبا بيهم)
نخليكم مالا مع تحفة اليوم

المتڨربطات

طلعت في الكار كي العبد المليح و خذيت بلاصتي في مجموعة الخمسه كراسي إلي في اخر الكار (ما نعرفش علاش هاك البلاصه عندها سحر خاص بالنسبه لشخصي كيف ما عندها سحر خاص عند برشا ناس) و من عادتي ديما كيف نطلع في الكار اني نقعد بجنب الشباك باش نسلي روحي شويه بالاشياء إلي تنجم تصير البره من ها الحصن المواصلاتي الجليل...
عاد انا هكاك و حسيت بشكون جا و قعد بجنبي... شدني الفضول باش نكتشف شكونو الشخص إلي نالني الشرف و قعدت بحذاه تلفت بطريقه روتينيه بطيئه نلقاها طفله متحجبه ف ال25 إلى 28 من عمرها....
في الحقيقه الشي إلي صار من بعد كنت متوقعو لسببين و هوما انو اولا مش اول مره يصيرلي ها الموقف و ثانيا لاني نعرف مثل ها الايديولوجيات...
هاوينو الكار تمشي و ناس تركب و ناس تهبط عاد فرغت بلاصه بجنب الانسه إلي مجاورتني تعمل هكا و تزحف للبلاصه إلي فرغت باش تخلي بلاصه بيني انا و هي ... الحكايه مازالت ما وفاتش حد لهنا
طلع راجل كبير تقول انتي في اواسط الستينات من عمرو يعني شاف م الدنيا الوان و اشكال مش كي حالاتي مازلت نتفرج!!
عاد الراجل او الحاج ان صح التعبير اقرب بلاصه لقاها فارغه قعد فيها باش يرتح بدنو إلي تعبتو السنين في البلاصه إلي خلاتها الانسه متاع بكري...
اقل من عشره ثواني تعدات و الانسه هزت روحها و قامت حولت لبلاصه اخرى باش تقعد وحدها حفاظا منها "على شرفها" !!! رجعت تلفت للشباك و انا نتبسم تالمون حفضت مثل ها السلوكات!!!
عاد إلي حبيت نقولو و انو و ان كنت انا في قرارة نفسي نرفض الحجاب كفكره إلا اني ما نجيش و نقول هاو نينجا هاو ما نعرفش شنوه اي بمعنى كل حد حر في روحو شنوه يلبس اما نبقى انا عند وجهة النظر متاعي...
اما ما يزيد احتقاري لاغلبية البنات إلي عملو ها الاختيار هاذا هو الايديولوجيه و طريقة التفكير إلي يتبناوها انو الذكر كان يلقى راهو حزامو يخدم على طول و انو ما يغزر للانثى إلا على اساس انهي ماكينه متاع جنس يجب استغلالها بالطبيعه الكلام هاذا نقولو و انو في اغلب الاوقات لانو تجربتي البسيطه ضهرتلي برشا ها الانموذج متاع المتحجبات إلي كيف تغزرلها تبدى تسب فيك و تقول هاذاكا راهو يتشهى فيا (رغم انهي تبدى في وجهها و العياذ بالله) اما اش تحب تعمل !!! ديما النيه الباهيه هي إلي تمشي في تونس...
حادثه من الاف الحوادث إلي قد تصير قدام بعض الشباب إلي مخو محلول شويه و يحب يفسر شنوه قاعد يصير وراه...
عاد السنا و احنا مازلنا كي رجعنا للجامعه شاءت الصدف باش 80% م البنات إلي يقراو معايا "مڨربطين" كيف ما نسميهم انا الحقيقه حاولت اني نبدل الڨروپ اما الله غالب ما سهلش ربي مش على حاجه جوست باش نتجنب بعض الحوادث كيف ما إلي صارت و كتبتها الفوق و زاده باش نتجنب المنطق العادم متاعهم و ما نعرفش زعمه هاذي خاصيه من خاصياتهم و إلا الصدف تلعب دورها مره اخرى و ما تجمعني كان بمودال واحد (تقريبا) متاع بنات "مڨربطه" الله اعلم !!
على كل الواحد لازم يتاقلم مع كل الاوضاع رغم انو اغلبها يكسر الراس

تدوينه بلا عنوان

عندي قرابة 4 سوايع و انا نحب نحط ها التدوينه هاذي ما لقيتلهاش عنوان عاد قلت برّا نحطها و اتاو الزملاء و الزميلات يعاونوني على العنوان....
نستنّى في تعاليقكم و اراءكم...

Trafic en haute mer sélectionné dans TV et Info JT magazine

و هاذي الڢيديو الكامله المسجله في بيرو سقراط زمانو

http://www.facebook.com/video/video.php?v=1152574927605

تعقيبا على ما قاله زياد طارق بن يوسف

قلت باش نعقّب على ما كتب سي زياد طارق بن يوسف في احدى تدويناتو إلي هو عطى رايو في حاجه كتبتها انا من قبل و كانت تتعلق بيه هو بوجه او بآخر...
عاد قبل كل شي بداها سي زياد و قال "بلغني": ايه اش بيه !! ميسالش ما يضحك عليك حد راهو كيف تقول راك انتي ريتها اما كانك شادد صحيح في قالولك مش مشكل الله لا يقطعهم من امة محمد ...
اول حاجه جبدت عليها انتي يا سي زياد قلت ياخي لازم الملحد ما يحب كان الملحد ؟؟؟ :كلام حلو و منطقي و معقول ياسر ياسر اما سامحني انا ما قتلكش تحبها قتلك تتبنى افكارها خاصة المتعلقه بنظرتها هي و تفسيرها الشخصي (إلي يعجبني ياسر) لبعض ما يعتبرو الكثير من المسلّمات في الإسلام....
بمعنى كيفاش انتي تتفق مع افكار انتي ماكش مستعرف بالساس متاعها فقولك بالإلحاد ينفي انك تعترف بالإسلام هاذي حاجه باش نكونو واضحين فيها
الحاجه الثانيه في ما يتعلّق بجمعية حقوق المومسات (!!) انتي قلت انك مش انتي إلي عملت الڨروپ هاذا (الشي إلي ماهوش صحيح خاطر وقت كان جديد ريت المسؤولين فيه) اما هاذا ما يعنيناش انتي افترضت انو هاذي اكذوبه ميسالش نصدقوك فيها (ريت كيفاش ناخذ بالخاطر انا هههه) اما الشي إلي ما تنجمش تقول فيه لا انك طحت تپارتاجي في الصفحه هاذيكي بمختلف الپروفيلات إلي عندك (خاصة إلي معمول باسم طفله و الاسم تبدل مرتين ع الفايسبوك خاطر فما جماعه عملو فيك و في الپروفيل هاذاكا كان مازلت ما عرفتوش الپروفيل اتاو نقلك عليه ما عنديش مشكل) و بالاماره قعدت تپارتاجي فيه مده باهيه بصفه يوميه دونك اذا كان تنكر تاسيس الڨروپ ع الاقل اخطاك م الديماغوجيا و كيف الناس تسكت مش معناها راهي اقتنعت بكلامك لا ابدا و لا محاله فما شكون جابلي مره كونڢيرساسيون ع الفايسبوك بينك انتي و اياه حتى لين انتي خذيت منعرج ف الحديث و وليت تحكي لغات حيه (هههه) و في الاخر قلت بعععع ماينه ما عاد عندك ما تجاوب و انا مستعد ننشر الشي هاذا بعد ما ناخو موافقة الزميل إلي حكى معاك ...
بالنسبه لحكاية المثليه الجنسيه ضحكني بالحق ردّك !!! معناها بنفس الطريقه نوليو نسيبو بيعان الدروڨ في تونس على خاطر فما جماعه تحب تعمل جو احنا اش دخلنا فيهم هكا ؟؟؟
بالنسبه للرد او الزوز ردود المكتوبين ع التدوينه متاعك صحيبك تعيس ياسر و ممكن الحاجه إلي انتي ما تعرفهاش و انو كل خوانجي بالمعنى المتطرّف للكلمه ما نستعرفش بيه و كيف نقابلهم ف الشارع نبدى نستعوذ تقولش عليا ريت شيطان !!
فإذا كان ماشي فيبالك إلي كل واحد ما "يحبش" الكلام إلي تقول فيه انتي و تحب تقنع بيه الناس هو خوانجي نقلك راك (كي العاده) ما جبتش فيها هاذي...
ف الاخر تعقيبي هاذا جا خفّافي راهو دايور هاك تنجم تشوف إلي اغلب الملاحظات إلي فيه تعلقت بالشكل اكثر م المضمون لسبب بسيط و هو الناس إلي يشوفو كلامك مش باش يقعدو يحللو ياسر (ان شاء الله تكون فهمتني ما نحبش نوضح اكثر)
اما على فكرة تضامنا مع الشعب الإيطالي: ف الحادث متاع طيارة تون انتار هاك العام الشعب الإيطالي تأسّف ع إلي ماتو ؟؟ و كيف ماتو جماعة الرديف تأسفو ؟؟ و كيف و كيف و كيف ......... برشا حوادث كان نبدى نسمي نخاف عليك م القلق يا متاع الصداقه يا حنيّن يا انتي (ههههههههههههههههها)
لا تيأس حاول مرّة اخرى...
ملاحظه: كل التعاليق مرحّب بيها من عند زياد او غيرو م الناس إلي تقرى ف التدوينه هاذي مرحبا بكل الاراء

!!!هاني رجعتلكم يا فحّامه

ايا قلنا السلام عليكم
و الله ما عرفتش باش باش نبدى !! تي لا علينا توا مديده باهيه ما كتبتش قرابة الشهرين و إلا ثلاثه ف المدونه متاعي و بصراحه كان اختيار شخصي على خاطر الفتره إلي قبل ما نقص فيها ع الكتيبه لاحظت و انو الصراعات كثرت بين الزملاء المدونين كيف قطوس الزبله و براستوس و غيرهم م العركات إلي نتصورها لليوم ما وفاتش خاطر من اخر مره كتبت ما دخلتش تقريبا لحتى مدونه دونك ما عنديش فكره على شنوه تكتب و شنوه صار المده هاذيكي الكل ...
عاد اليوم قلت وقيّت باش نرجع نكتب خاصة و اني عملت فترة راحه باهيه خاصة المده لخرانيه وقت ما مشيت عملت جميعه باهيه في الجنوب الشرقي التونسي ...
عاد هاوينو حبيت نعمل ها التدوينه هاذي قبل ما ندخل في صلب الموضوع و التدوينات إلي باش تتوالى ان شاء الله و باش يكون موضوع الاولى منها تعقيب على سي زياد طارق بن يوسف كرّم الله وجهه (ههههه) إلي اكتشفت بالصدفه و انو فاق بتدوينه كتبتها عليه عندي فوق الاربعه شهور(صحه النوم يا سي زياد...)
ايا مالا على سلامتي معاكم مره اخرى في التي ان بلوڨ (اهاوكا نرحب بروحي في محلي)
و ان شاء الله عيدكم مبروك و سنين دايمه

يا ڨطوس هاذي تفهمك كل شي

اهداء إلى كل متزبّر حكّتّو جنابو كيف حكاو عليه

اتكلّمو اشبيكم ساكتين؟؟؟

توّه مديده قرابة الثلاثه جمعات م الي هبط الفيلم الجديد متاع جاد المالح بعنوان "كوكو" عاد هاوينو انا عندي مدّه نستنّى في بعض الزملاء المدونين باش يكتبو و يفطقو مواهبهم و يدافعو بالحجج متاعهم على ما اصطلح تسميتو باللائكيّه في كافّة المجالات (و هاذا سواء في تونس او غير تونس) ...
و الملاحظ في الفيلم و انّو القصّه و السيناريو جات تافهه إلى اقصى الحدود إلى حد و انّو بقيت نلوّج فاش يحب يحكي بخلاف موضوع البار متسفا اي بمعنى و انّو جا باش يحكي و يعمل دعايه لطقوس يهوديّه بحته الشي إلي ما يحبذوهش (على ما قاعد نقرالهم) الزملاء معتنقي اللائكيّه ...
عاد حبّيت نسأل بعض الاسئله الغير بريئه و منها:
زعمه بالحق هوما يدافعو ع اللائكيّه و ينبذو التخونيج مهما كانت الديانه ؟؟؟
زعمه كان جا الفيلم يتناول موضوع العيد الكبير عند المسلمين باش يقعدو ساكتين ؟؟؟(الإجابه هاذي موجوده و شفنا برشا ردود فعل في هاذا الصدد...)
زعمه هوما ينبذو في التخونيج بانواعو و إلاّ ينبذو في الإسلام ؟؟؟
زعمه علاش ها الصمت في ها الموضوع ؟؟؟
تي اتكلّمو عاد اشبيكم ساكتين

!!!

!!!شعاري في الحياة الوطن قبل كل اعتبار

بكري شويه و انا عند الحجام بعد ما كملت حجامتي و نستنّى في الوالد مدّيت يديّ لجريده م الجرايد ع الزهر طلعت جريدة اخبار الجمهوريه متاع الجمعه إلي فاتت ...
عاد هاوينو انا نورق في الجريده خاطر نعرف انو جرايد تونس ما فيهم ما يتقرى بخلاف الحكيم الروحاني فلان بن علان يداوي بالقرآن و هات من هاك اللاوي ...
عاد شد انتباهي حوار صحفي اجراه سعيد نويره مع الوزير الاسبق محمد مزالي عاد هاو حبيت نشرّككم في قراية ها الدرر النفيسه لهنا
عاد مما يلفت الانتباه انو م الاسئله إلي اطرحت عليه: "بماذا تردّ على الاتهامات والاشاعات التي وجهت إليك مسبقا؟
عندما كنت من أعضاء الحكومة كنت أتميز ببعض الشعبية إذ كنت أمثل تونس في القمم الآسيوية والعربية وكانت لي علاقات جيّدة مع قادة الدول ووزرائها وسفرائها مثل الرئيس السينيغالي السابق عبدو ضيوف والرئيس المصري حسني مبارك اللذين تربطني بهما علاقات متينة، ولهذه الاسباب حاول المتكالبون على السلطة تحطيمي أخلاقيا لا سياسيا وأقولها علانية لو كتبت لي حياة جديدة لأعدت الكرة لأني لم أفعل سوى ما يمليه عليّ الضمير وقيمي ليست مستمدة من رئيس الدولة لأني خلافا لعديد الوزراء كانت لي أبعاد أخرى استمدها من مجلة الفكر ومن محاضراتي ومن الرياضة."
عاد لهنا الواحد يعاود يقرى و يثبّت و يستنتج و انّو الزمان ما غيّر شي في السيد الوزير حيث انو من قديم الزمان تعرف بانو ينجّم يقنعك بالاكحل إلي هو ابيض على غرار ما ذكرو في السؤال إلي فات تو زعمه 12 مليون تونسي يعرفو و متيقنين و انو سي مزالي ڨدم ڨرعه و فصع لبلاد ڢولتير تو هو جاي يقول ما غلطش و كان يرجع تو وزير يعاود اش عمل !! لهنا نقول كان يحب يتمنيك علينا راهو التوانسه 'تلنصاو' و معادش ياكل معاهم ها الكلام ثم كيف هو ما غلطش و افتراضا نقولو ما غلطش اش هرّبو لفرانسا ؟؟؟
عاد من بعد يواصل و يقول:
"أكثر ما آلمك بعد إقالتك؟
الاضطهاد وبالخصوص اضطهاد أبنائي الابرياء (يسكت بعض الوقت) كنت أتوقع أن تقع اقالتي لكن لم أتوقع أن أدفع ثمنا باهظا جدا.."
اما ثمن يا حبيبي ؟؟ وليداتك ماهم خلطو عليك و امورك و امورهم ف الجبن و انتي يا صاحبي متبزّع انتي و اياهم في فرانسا و شيخات على ظهر شعب يا ما قاسى منّك و من غيرك اما ثمن و اما عذاب يا معلّم ؟؟؟ اما كان تحب الشعب يهبط يهتف باسمك في الشارع وقتها نقولك كونش تحساب روحك في الجنّه و ممكن غادي يا ذنوبي كان يعملوها ...
لهنا زاده سؤال نحب نسأل الصحافي قداش قعد يستنبط فيه و ملاّ سؤال و عليه الكلام زاده تبارك الله:
"ما سر هذه الحيوية، هل هي الجري اليومي أم هي الشهية للأطباق اللذيذة التي لا تحرم نفسك منها مثل الكسكسي بالعصبان؟ (يضحك).. أنا أمارس الرياضة كما قلت ولكن كيف عرفتم حكاية الكسكسي بالعصبان.. هذا صحيح.. أنا أحب الكسكسي بالحوت أيضا وخاصة عندما أدعى إلى أكله في مدينة طبلبة، كانت أختي رحمها اللّه «مدللتني» في الأكل.."
في الإخر سألو سؤال اجابتو خير م الحوار بكلّو نتصوّر:
"ما هو شعارك في الحياة؟
كان لي شعار أيام كنت مديرا للشباب والرياضة خاصة أثناء ممارسة الألعاب الرياضية وهو «الخدمة في اللعب لا» أما شعاري في الحياة فهو «الوطن قبل كل اعتبار»..
حقيقة معناها الناس الكل تعرف و انو سي محمد مزالي كان ما يلعبش في الخدمه و كان و هاذا الاهم الوطن ديما مسبقو على روحو و عايلتو و كيفاش كان عاطي من جهدو و صحتو في سبيل الوطن و كيفاش كان ما يمدّش يديه لفلوس الشعب و كيفاش ما كانتش عندو الدمغجه خاصة كيف كان يلقي محاضراتو بتلكوينة حرف الراء المميزه عندو ...
في الإخر نحب نقول و انو لازمني نقول و انو كل ما قلتو الفوق يبقى ديما بتحفّض على خاطر ينجّم يكون الحوار هاذا ما صارش اصلا (مثلا ما ريناش تصويره جديده لمحمد مزالي مرافقه المقال) اما اهاوكا عرفنا شكون في تونس ينجّم ياخو پاسپور احمر ...

وين ماشين؟؟؟

اليوم روّحت للدّار و حلّيت الپي سي ايا و انا نعمل في طلّه ع الفايسبوك نلقى ڢيديو متاع طارق المكّي مازال قال الاخر من بحرو عاد حبيتكم تعملو طلّه معايا ...

قبل ما نبداو نحكيو نحب نقول و انّي لا من اتباع طارق المكّي (إلي ينجّم يكون يقرى في التدوينه هاذي لا محاله...) و لاني زاده من اتباع عمّك بن علي (إلي عندو عمّار يقرى في بلاصتو في التدوينه هاذي..ههههه)
خاطر الواحد ما ينجمش يشوف الغلط و يقول صحيح كونش اذا كان يخدم في معمل الفارينه ...لا علينا
عاد لقيت و انو ها الڢيديو هاذي مقسومه لزوز عناصر:
*حكاية السيد الاول و كيفاش كلا ما طاب للزّلاّط من لحم بشري و هاذي نتصوّر الناس الكل تعرفها و مش حاجه جديده اما تعليق ظريف بركه نحب نقولو و هو اذا كان هو كان يستنّى باش يعلّقولو نيشان م الصنف الرابع فنقلّو يا عشيري راك غالط في البلاد ... لحقيقه انا ما نشوفش خير م الانونيما في العالم الإفتراضي و هاذا موضوع اخر اش علينا فيه ... اما بيني و بينكم يتسمّاو "استرجلو" معاه كيف ما فشخوشي في عقر داره هام فرحو بيه و هزّوه لمعمل إلّي يقلّك !!!
*الحكايه الثانيه المتعلقه بالنسيب المتخونج زعمه زعمه: اول حاجه تساؤل طرحتو بيني و بين روحو و كيف ما قالّي سي طارق المكي و انو عندو ريزو متاع تقصي حكايات العايله المالكه و كيف ما يقول هو ريزو صحيح و قوي زاده اما نسى و انو الريزو القوي هاذا ظهر تاعب من وجهة نظري السخسيّه لسبب بسيط ياسر و انّو الحكايه هاذي ڨديمه (مش قديمه) حيث انو حيثيّات لحكايتنا هاذي يرجع لجانفي و فيفري الي فاتو و نسى باش يقول زاده و انو الضحيه كريم بن براهيم عداولو قضيه و تحكم فيها ب6 شهور عدّى منهم 4 و سامحوه في الباقي بحيث انو الحسبه تطلع و يكون خرج من نهار 17 جوان بمعنى و انو عندو قريب الشهر معنتها نفهمو بكل بساطه و انو كريم اتصل بطارق المكي و حدثو ع الهدره الكل بعد زيارتو لدار خالتو ...
اما لحكايه من اساسها تضحك هي بصراحه الراجل حالل اذاعه اسلاميه و ناوي على بانكه اسلاميه زاده في الإخر يطلع يرحم عمّي !!! دونك لهنا نفهم بالڨدى كيفاش سي نسيبو إلي خاري علينا (حاشاكم) مسيبو يرتع فيها كيف ما يحب خاطر المعروف و انو ريحة الخوانجيه في تونس ما ادّبش
حويجه اخرى ممكن نساها طارق المكي في الديسكور متاعو هاذا (و لهنا غمزه للريزو متاعو ههههه) زعمه ما سمعش بمرت كنتوله كيفاش تسهر في الكاليپسو و الڢودكا خدامه (هاوينو بالاماره سهرت نهار السبت غادي منين لبست روبه حمرا و تقطعت من تالي و حزموها بفولاره باش ما يكحّل عليها حد في المقصوره الفوقانيّه إلي ع اليسار)
الحاصل في انتظار تعاليقكم بانواعها زعمه واحد يحب يعمل انتفاضه سياسيه زعمه بمثل ها الاخبار إلي لا تغني و لا تسمن من جوع باش تقوم ها الانتفاضه ؟؟ رغم انو المبدأ باهي و معاه على طول الخط اما كاينو خذا منحى متاع صحف الپاپارازي

اذا الشعب اراد الحياه فلا بد ان يستجيب القدر و لا بد للحجب ان يندثر و لا بد لعمّار ان ينتحر

يا عمّار ال404 باشي الپيجو ماعادش تخرجهم هاوينو عندك الإيسيزو و إلا كان تحب تنفّع الجماعه هاويني دار الفورد و كانك ع التوانسه سايي وصلو لسن الرشد و حتى كيف سيادتك تسكر صفحه م الصفحات يحيا الپروكسي تتحل ماكش سدّيتها في وجوهنا اما الناس الكل تعرف و انتي تعرف إلي ساعة النصر قربت و المقص ولّى حافي عكس المدونين إلي عمال على قدّام و عمال يولّيو ماضين و امضى من مقصك المخزّز...
اذا الشعب اراد الحياه فلا بد ان يستجيب القدر و لا بد للحجب ان يندثر و لا بد لعمّار ان ينتحر ...

خواطر حول الإلحاد: زياد طارق بن يوسف نموذجا

توّا مدّة قرابة 6 شهور و انا نتبّع في الزميل زياد طارق بن يوسف سواء في الفايسبوك او في المدونه متاعو (بون لا محاله مش كان هو برك نتبّع فيه ..) عاد خوكم بصراحه حرت حبّيت نشوف شنيّه المرجعيّات متاعو نلقى وخينا من جماعة القصيمي و وفاء سلطان و نوال السعداوي (على فكره انا من اشد القراء للكاتبه الاخيره) لحد لهنا نفهمو و انو سي زياد انتهج سلك الالحاد لكن "بخلفيات اسلاميه" كيف ما هو يحب يسمّيها و لو انّي بيني و بين روحي ساعات نبقى نضحك و نقول و انّو في عام 2009 فما شكون مازال يشك في وجود خالق !! لكن هاذا بالطبيعه ما ينقّصشي في احترامي للاشخاص و خاصة اراءهم و افكارهم ...
عاد من شيره اخرى نشوفو و انّو زياد يتبنّى في كثير من الاحيان اراء الدكتوره الفه يوسف و يدعوها باش ترجع تزاول نشاطها الفايسبوكي و ان شاء الله ترجع !!
لهنا نشوف شويه تناقض كيفاش ملحد يتابع في نشاط مفكره لا طالما ارتبطت اراءها بمسائل تخص الدين !!! يقول قايل بسذجة السؤال تو انتي كي ماكش مؤمن بحد لواش تلوج عليها تكتب و لا تقعد عدى ان تكون المسأله مسأله حرية تعبير
عاد هاوينو اليوم دخلت ع الفايسبوك فمّاش ما انّبّر شويّه و نقيّد الاحوال نلقى خونا زياد عامل ڨروپ مسمّيه "الجمعية العالمية للدفاع عن المومسات" و نلقى زاده "لمثليه الجنسيه لواط ام حريه شخصي..." عاد صراحة تسائلت: كان زياد هاكا حد نيتو راهو يولّي مصنّف في خانة خالف تعرف اما اذا كان يستبله فينا فحكايه ما تجيش !!! شنوّه محلاك معنّق راجل بلحيتو و شلاغمو و عامل معاه علاقه جنسيّه و تقولي رومنسيّه ملاّ رومنسيّه !! (هاوكا ما غير ما ندوروها مرجعيّات دينيّه باش ما يردني حد خوانجي)
بالنسبه لحكاية المومسات المعروف و انهم منبوذين في العالم اجمع موش كان في المجتمعات العربيّه لعدّة ضوابط منها الاخلاقيّه و منها الإجتماعيّه و ابسط دليل و انو ها المومسات يعتبرو انفسهم (في الغالب) غالطين و يتفهمو كيفاش يتم ها النبذ هاذا عاد الواحد في 2009 باش يجيب فيها عيرود و فحل باش يجي يغيّر العرف و العاده و الاخلاق ؟؟؟ زياد بالطبيعه حر في روحو و كيفاش يفكّر اما يلزمو ( و لهنا نعطي في رأيي البسيط مانيش داخل في الراجل) ما يخلّيش الفانطازيا متاعو تخرج عن اللّزوم بدون موجب
على كل من خلال ها التدوينه هاذي و كيف ما حكينا على مظاهر الانغلاق الديني و الرجعيّه و غيرو حبّيت نقول و انّو اذا الواحد باش يكون علماني او حتّى لا ديني موش بالضروره باش يختلف في افكارو كلّيّا مع من لم يتبنى وجهة نظر متاعو اي بمعنى ما غير ما الواحد يولّي يقلب في كل شي رأسا على عقب متخلصين من كل الظوابط الاخلاقيه و الاجتماعيه و السياسيه على غرار جمعيّة الصداقه التونسيّه الإسرائيليّه ياخي مني نعرفوهم احنا ؟؟ و شنيّه مجالات التعاون مع البلاد هاذا دون غيرو ؟؟
وقتها نولّيو نقولو و انّو ولّينا نستهدفو و نستفزّو في ايديولوجيا معيّنه و طرح مشكل نحن في غنى عنّو
اخيرا تحيّه إلى كل الملحدين و اللادينيين لانّي اؤمن بانّو ها الناس معبّين في مخاخهم و البلوڨسفير معبّي بيه ديجا

الحق معاهم مش معاك

السلام عليكم
بكري قاعد نتعشّى مع دارنا عاد هاوينو نتفرجو على "الهجّاله" كيف ما يقول عم خميّس الخياطي
عاد هاوينو حاطّين هاك البرنامج متاع شركة الظلف متاع خونا سامي الفهري (عفوا بلحسن الطرابلسي) تي هاوينو جايبين امال علوان الممثله قال شنوّه شرات دار من عند باعث عقاري و السيد إلّي باعلهم ما عملش التهيئه متاع الحي إلي بنى فيه ...
عاد هاوينو جينا ف ڨلب الميضوع كيف ما سمعنا البارح و استمتعنا حقيقة بمقال الزميل زياد الهاني (إلّي بالمناسبه اليوم الصباح عم عمّار شمّعلو المحل) عاد خونا زياد كتب على فضيحة بريكوراما و كيفاش الارض إلّي تبنى عليها ها المشروع الضخم و إلي دشنو عمّك توفيق مالوش وزير التزهيز و الإسكان (هو بالرسمي مالوش اي دعوه)...
الملفت للإنتباه ف العمليه انو سي زياد الهاني كيف حكى ما حكاش ف الريح بل حكى و قدّم مستندات و وثائق من قوانين و اوامر منشوره في الجورت و ربّما هاذاكا علاش سي عمّار عفس ع المدونه متاعو بال404 متاعو و بالمناسبه نحب نقدم اعجابي الشديد للمدونه متاع سي زياد الهاني و كيفاش جات منظمه تقول انتي فار و ... مخيّط (تعرفوها ما غير ما نمسخو افّامنا لا ينعتونا بالعنف البلوغسفيري)
عاد نرجع لبرنامج الحق معاك و نقول انّو كيف ما حكيتها انا و الشايب هاك النهار ياخي هاو اليوم جات كف و غرزه "ابليس ينهى ع المنكر" توّا هوما البرّ خلاوه "بالتزاوزات" متاعهم ف البلاد (نحكي ع الطرابلسيّه راهو) جات في ها الباعث العقّاري المزمّر !!! تي ماهو خفّو انتوما ع العباد و من بعد احكي على غيرك مش انتي عامل نفس المخالفه و جاي تعيّط يا ناس هاو فمّا شكون مخالف الڨانون ..
ف الإخر نحب نقول و انّو من المنتظر زاده انّو المدوّنه متاعي باش يلعب بيها مقص عمّار اما كان قعدت هانا مازلنا انّبرو (لا محاله حتّى كان باش تتسكّر باش نبقى نكتب و إلّي يحب يقرى الپروكسيات ما تتقطعش م البلاد) من جيهه اخرى نحب ندعو الزملاء لتسليط الضو على حكاية بريكوراما عبر التن بلوڨ و يبقى ديما النقاش الهادف هو السّمه المميّزه للتدوين و كيف ما قال احد الزملاء انا ادوّن اذن انا موجود ...
انّستو

سي امبارك ولد اُمّه

صباح الخير
لاحظت الايامات هاذي و خاصة بعد مشية سي مبارك ولد اُمّه لمصر و جولتو في الشرق الاوسط ردود فعل متباينه بين إلي فرح و بين إلي استغرب و بين إلي قعد يضحك (كيفي انا)
عاد حبيت نرجع بروحي شويه لتالي وقت سي وخينا تنصب رئيس في امريكيا و الناس في تونس و ف العالم العربي فرحانه و ناقصهم كان تفريق المبروك !!
عاد وقتها إلي انجي نحكي معاه يقلّي تي شبيك يا هشوش راهو هاذا إلي باش يحرر العرب و المسلمين م اليهود !!!
بالطبيعه ف قرارة نفسي كنت نضحك اما اهاوكا ساعات كيف نلقى حد يستاهل نولي نحكي معاه:
اول حاجه و رغم انّي مانيش كبير برشا ف العمر التجربه اثبتت انّو الحريّه تتفك فكّان ما تتعطاش (بالله كان فمّا واحد يعرف حكايه تعطات فيها الحريه و إلا الاستقلال ينوّرني)
هاذايا من شيره
من شيره اخرى المعروف و انّو الرئيس ف بلاد طونطون سام ما عندو فاش يحكم (تي هو شعرو إلي فوق راسو يحجّموهولو كيف ما هوما يحبّو) بالطبيعه هوما نتصوّركم تعرفوهم و هوما المؤسّسات الوطنيّه و الصّناعيّه إلّي غالبا ما ادّورها جهات صهيونيّه
عاد هاوينو كيف نحكي مع جماعه هكّا بما فيهم واحد من انڨولا يقرى معانا يقولولي لا راك غالط و ضايع فيها نقول انا ان شاء الله نطلع غالط رغم يقيني بصحّة كلامي اما هاوينو ديما نحب نفكّر "عشّاق" سي امبارك بحل الازمه العربيّه/الإسرائيليّه و حلول السلام إلي صارت ف شهر ديسمبر إلي فات و كيفاش خواتنا الاسرائيليين بناو الديار للفلسطينيين و عطاوهم كراهم و فرحو بيهم كيف ما يلزم ...
عاد نحب نزيد نواصل ف سرد المواقف إلي اتخذها صحيبنا في المسائل العالميه وكيفاش حل مشكلة ايران و كوريا و الكرّافه متاع الصومال ...
انا لهنا مانيش نعطي في وجهة نظر اما نعاود ف حوايج صارو باش ها الجميْعه إلّي كل يوم مكسرينلي راسي بسي امبارك مشى سي امبارك فعل يفكّو عليّا شويه و ينقصو م الحس و البكاء ع الاطلال في ما يخص القضيّه الفلسطينيّه إلي شخصياّ ما تعنيناش خاطر كان تونس صارت فيها حوايج من هاذا القبيل راهو بنو كثبان و العالم العربي الكل (ممكن باستثناء الدزاير قلت ممكن !!) شمتو فينا كان ما مشاوش يكلاطيو معاهم
مجمل القول و إلي انا مقتنع بيه انّو حكاية هاو فلان اتاو يحرّرنا و يعاوننا و سياسة عاونوني ضحجتني ياسر من نوفمبر و انتي جاي
هيا هات اش عندكم من تعاليق بالنسبه للي يحب يتفاعل
انّستو

فيلم غنّاية العرايس: فيلم تونسي و إلاّ يحبّو يتونسوه بالسّيف ؟؟

السلام عليكم
قبل ما نحكي في موضوع اليوم فمه شويه ملاحظات ريتها و المتعلقه بالتدوينه لخرانيّه متاع ناقصات عقل و دين:
اول حاجه فوجئت بصراحه بالجدل الواسع إلي احدثتو التدوينه هاذي في البلوڨسفار و النقاش و الجدال الواسع النطاق إلي صار في برشا مدونات كيف مدونة الزميل العايش م المرسى و الزميل قصه اون لاين و الزميل الغول و غيرهم و غيرهم اما بصراحه إلي ما عجبنيش هوما بعض التعاليق إلي لا تغني و لا تسمن من جوع على غرار بعض التعاليق إلي تكتبت عند العايش ردود متاع فروخ ماهو كان عندك رأي اعطيه سينون سكّر جلغتك !!! بون لاحظت زاده انو فما ناس تقبل النقاش و عندها صدر رحب باش يقبلو النقاش في مثل ها المواضيع و تبقى هاذا الهدف الاول و الاخير لا محاله
نجيو اليوم لتدوينة اليوم:
مدة 4 و إلا 5 ايام تفرجت على فيلم تنسب انّو تونسي عاد و انا نقرا ف الپريزونتاسيون نلقى فيلم فرونكوتونسي قلت يا هشوش كيفاش ها الفيلم ما تعرفوش برا تيليشارجيه و تحيا الزوز ميڨا إلي عندك
الفيلم كان تصح الترجمه متاعو اسمو غناية العروسه او غناية العرايس
نبدى قبل كل شي بالعام المخرجه اسمها كارين البو و حسب ما لوجت فهمت و انهي مخرجه و ممثله يهوديه تصورت انهي تونسية الاصل كيف غاليه لاكروا او ما شابه لاكن فوجئت بعكس ذلك مواطنه فرنساويه ملخص الفيلم انو في تونس العاصمه سنه 42 كان فما زوز بنات جيران و اصحاب وحده يهوديه و وحده مسلمه و كيفاش كانت الجاليه اليهوديه كانت منفوره م المسلمين ف الوقت هاذاكا و بعدو زاده و مكروهه و كيفاش نور (الطفله المسلمه) مورست عليها ضغوطات باش ما عادش تكلم صاحبتها مريم (الطفله اليهوديه) اي كاينو الفيلم ولّى نوعا ما نسخه عربيه "متونسه" لفيلم روبرتو بينيني "لاڢي اي بال" ...
من بين ما تناول الفيلم زاده قضية العرس و المغامرات الجنسيه للبنيات هاذم قبل العرس
اداء الشخصيات خاصة مريم نور و تيتي في ما يخص اللهجه او اللوغه التونسيه (هكه اصح) كان مايع ياسر و ضاهرين يتكلمو بالسيف دونك فما مشكل ف الكاستينڨ اما ممكن كنت نعذر المخرجه في خصوص النقطه هاذي بحكم انو فما مشاهد من شبه المستحيل انو ممثلين توانسه يمثلوهم مثلا فمه 3 مقاطع طوال نسبيا تمثلو في الحمام بما في ذلك العرا المنجر عليه و حفلة تنقيه متاع عروسه (مع ابراز *** الطفله مريم و هوما ينقيولها فيه) بصراحه مشهد كيما هاذا ما ريتو كان في ها الفيلم و كان تتفرجو في الفيلم ممكن اتاو تتأكدو إلي بصراحه تصورت انو خرجو بيه م الجرأه للإباحيه اون كالك سورت
الحاجه الثانيه ماشي فيبالي كيف باش تمثل بطفله عريانه يلزم ع الاقل عمرها يكون 18 سنه (وهاذا إلي ما توفرش في البنيه اولامپ بورڢال بحكم انو عمرها 16 وقت التصوير) هاذا ما يمنعش انو البنيات سخسيا عجبوني (فيزيكمون مزيانات)

نجيو تو للمحور الرئيسي في الفيلم و هو ازدراء المسلمين التوانسه لليهود التوانسه
بون كيف نسمع حاجه كيف ما هكه في فيلم نقول المخرجه تونسيه إلي هو موش صحيح على حد علمي هاذا من جيهه
من جيهه اخرى شكون قاللها إلي ها الوضعيه توجدت في تونس ؟؟ كانك على قبل فما برشا يهود الناس الكل حبتهم و باش يبقاو يحبوهم كيما الشيخ العفريت و راوول جورنو و جورج عده و غيرهم و كان تحب تحكي ع الحاضر انجم نقدملها شهاده من عندي بحكم عشت في حومة باب بحر في سوسه و بالنسبه للي ما يعرفهاش فما برشا يهود توانسه و يتغششو كيف ما تقوللهمش توانسه نتفكر مثلا تربيت مع ميكو و پاسكال و غيرهم و ما كانش ها الريق ياكل و نتفكر زاده تاتا مريم الله يرحمها كيفاش كانت تهزنا للسينما و تفرح بينا برشا كيف نجيوها بحذا ميكو و العكس بالعكس ...
دونك ها الميضوع إلي جايبتو مادام البو (وإلي هي بيدها مثلت دور تيتي) ظاهر لابس شورت (ما عندوش الحق يدخل للإداره و للجامع زاده ههههههه) نحب نعرف جوست شنيه مرجعياتها باش تستصدر مثل ها الاحكام على حكايه لا عاشتها و لا تعرفها شنيه
ياخي منين جانا كره اليهود احنا ؟؟ اخطانا من حكاية فلسطين ياخي اليهود الكل صهيونيين ؟؟ ممكن فمه شكون يخمم هكا اما انا مانيش نحكي ع المرضى المتأثرين بشوية رڨّاصه شيوخ متاع تلافز ...
نحب نقول زاده انو في ها الحاله هاذي تنتفي صفه فيلم تونسي (لا مخرج لا پروديكسيون) باستثناء المكان و 3 و إلا هوما 4 ممثلين توانسه بالحساب
بصراحه ما فهمتش كيفاش هاذا فيلم تونسي و كان فمه شكون فهم يفهمني بربي !!
الفيلم تنجمو تتيليشارجيوه من هنا بالنسبه للي مازال ما شافوش و كي العاده نستنّى تعاليقكم حول مسألة ازدراء الاديان في تونس و الفيلم زاده ...
سلام عليكم

ناقصات عقل و دين

ايا السلام عليكم
قبل ما نبدا نحكي حبيت نعتذر ع الإنقطاع الداخل في نطاقنا عن الكتابه و ذلك لسبب بسيط و هو انيّ كنت نعدّي في امتحاناتي هاذاكا علاش عندي مديده ما كتبت شي اما بقدرة ربّي هاو الصيفيّه طويله و اتاو نفديوها ... هههههه
ايا مالا كيف ما قريتو ف العنوان باش نتطرّق في تدوينة ها الصباح لعبارة "ناقصات عقل و دين" إلّي بصراحه كثر استعمالها ها النهارين لسبب و لغر سبب حتّى طيّحت ف السوكسي متاعها على عبارة ساديپون متاع لمين النهدي ...
لحد لهنا الواحد ينجّم يقول وينو المشكل ممكن نمشي معاك اما كيف باش توظّف العباره او بالاحرى الحديث في مكان مش بلاصتو لهنا يتقال المشكل
في الحقيقه م الاول ما كنتش عندي فكره كبيره ع الحديث هاذا و حتّى لوقت ما تعمّدت باش ما نلوّجش عليه و حبيت نسمع برك بعض الاراء متاع شويه ناس في خصوص ها الميضوع و بقيت نسأل في شويه شباب باش نسمع كل واحد و اش جادت علينا القريحه متاعو اما بصراحه اقوى تفسير سمعتو من عند زميل يقرى معايا لحقيقه كي فسرلي قلت يا هو بوهالي يا انا زفّر عليّا التران و ما عادش انّجم ناكل معاهم الخبز ها المفسّرين الصحاح هاذم !!!
عاد يفسّر الزميل ناقصات عقل و دين و يقول: الانثى كيف تجيها العاده الشهريه مخها يضعف و عقلها ينقص عاد ما عادش تنجّم تخمّم مليح !! تلفّتلو انا (و بالاماره قاعده بيناتنا طفله) قتلو كي العاده باسلوبي الاستفزازي و الله غالب ها الخاصيه ما باتش تخطاني و قتلو: تقول انتي معناها الحكايه كي الريزو متاع التيليكوم مره تخمم و امورها ف النوار و مره الريزو طايح؟؟
كي العاده و كيما مستانس زميلي هاذا بالذات يجاوبني:ديما مستّك و ما تفهمش ؟؟
الله غالب هاذاكا حد فهمي كان جيت طياره و مخ راني فالح ف قرايتي اما الله غالب الستوكيّه موهبه ربّي ما يعطيهاش للّي يجي يختار عبادو ليها...
عاد فتّكم بالحديث غزرت بجنبي للطفله إلي بيناتنا(نورمالمون قرات ها التدوينه هاذي و راهي شابعه ضحك هي تو) حبيت نشوف شنيه ردّة فعلها نلقى الطفله مبهّمه ما فهمت والو قلتلها اقتنعت؟؟ سكتت تلفتت وقتها لصحيبنا و قتلو واضح يا عشيري امورك ڢالابل ...
دونك إلي نحب نقولو و انو فمه برشا ناس يبداو يتجلطمو على حوايج ما يعرفوهاش و يبدى يجبد فيها صحري و بحري تقول وشوشولو في وذنو و قالولو انده راهو ما كيفك حد المشكله مش في انو يعطي رايو و اش خص !!! اما هو يقلّك منّي تڨرع و انا الصحيح و انتي متخلّف(!!!)
ايا امشي يا زمان و ايجا يا زمان فضيت شويه قلت خلينا نشوفوها شنيّه ها الهدره متاع ها الحديث سيرتو بعد ما شفت آلاف م الجماعه إلي تبدى تهزّ و تسبط في مسائل الدّين و لهنا نذكر الزميل عيّاش م المرسى و كيفاش يبدى يبعبص و يشم ف المدوّنه متاعو رغم انّو يعجبني في نقدو لظواهر التعصّب في تونس و نحترمو في كتاباتو اما يضحّكني في مثل ها الميضوعات ...
ايا لا علينا عاد قلتلكم هزّيت تاليفون الام اس ان و طلبت صديقي إلياس و هو ف الحقيقه شخص متديّن اما مش من هاك النّوع المربّط اما يحب الحوار و تلقى معاه راحتك باش تناقش بعض المسائل الدينيه و جبدتلو ع الهدره نلقاه زاده ما يبعدش عليّا برشا في الفكره و وضحلي ف نفس الوقت انو ما عندوش الإجابه الضافيه هاذا إلي بيك هاو نحلوها مع بعضنا لحكايه سألني الحديث منقول على شكون ايا جبدت من هنا حطيت من غادي طلع من عند البخاري حلو ياسر !! شنوه ها الحديث هاذا بالظبط ؟؟؟
لحظه ما تعلّقش هاو جايك:

‏ ‏حدثنا ‏ ‏سعيد بن أبي مريم ‏ ‏قال أخبرنا ‏ ‏محمد بن جعفر ‏ ‏قال أخبرني ‏ ‏زيد هو ابن أسلم ‏ ‏عن ‏ ‏عياض بن عبد الله ‏ ‏عن ‏ ‏أبي سعيد الخدري ‏ ‏قال ‏
خرج رسول الله ‏ ‏صلى الله عليه وسلم ‏ ‏في أضحى أو فطر إلى المصلى فمر على النساء فقال يا معشر النساء ‏ ‏تصدقن فإني ‏ ‏أريتكن ‏ ‏أكثر أهل النار فقلن وبم يا رسول الله قال تكثرن ‏ ‏اللعن ‏ ‏وتكفرن ‏ ‏العشير ‏ ‏ما رأيت من ناقصات عقل ودين أذهب ‏ ‏للب ‏ ‏الرجل الحازم من إحداكن قلن وما نقصان ديننا وعقلنا يا رسول الله قال أليس شهادة المرأة مثل نصف شهادة الرجل قلن بلى قال فذلك من نقصان عقلها أليس إذا حاضت لم تصل ولم تصم قلن بلى قال فذلك من نقصان دينها ‏

******
ايا اش قولك يا معلّم ؟؟
في الحقيقه هو الحديث هاذا ممكن يتفهم على اساس انّو محقرانيّه اما هو لا ...
ايه علاش شهاده المرا بشطر ؟؟
عاد هاذي امور قالها خالقك باش تعرف خير منّو ؟؟
لا و نعم بالله ممكن زعمه على خاطر المرا عندها نزعة الامومه و تسخف ؟؟
ممكن ياسر !!!
******************
ايا كملت حديثي مع الياس و من بعد بقيت بيني و بين روحي توّا علاش كل مرّه طالعلنا واحد بطلعه في هاو ناقصات عقل و دين في هاو عوره في ما نعرفش شنوهوقت إلي حديث كيف ما هكّه تقال في سياق و كونتاكست معيّن ؟؟؟
لحقيقه لوّجت لوّجت لين بيّلت لوّحت لوريناتور تحت الفرش و تكبّيت رڨدت و كيف ما قالو ناس بكري الفاهم شاقي !!!
اما هاو باش نخليكم تو مع تحفة القرن 22 وجدي غنيم تفرجو ع العاااااااااااار تقول هو ماخو راجل مش ماخو مرا !!!
ايا نخليكم ونستنّى تعاليقكم

‏

... اذا ما كنتش مع مش معناها راني ضد

صباح الخير
توا مدّه قاعد نشوف في برشا زملاء ع البلوڨسفار و ع الفايسبوك يحاربو في (اذا كان صح التعبير) ها الضاهره متاع الحجاب و هات من هاك اللاّوي...
عاد لهنا جوست حبيت نوضّح حويجات:
صحيح انّو ها الضاهره جايه م الحيط معنتها جابها سي اية الله الخميني ربي يهديه و خلينا نرجعو للتاريخ شويه: قبل 81 و 80 من سنوات القرن الماضي ما كانتش ها الحكايه متاع قرّط راسك و اخرج او في ما بعد حكاية النقاب دونك لهنا نحب نقول زعمه إلي سبقو المسلمين قبل ها المده هاذي الكل ما فاقوش بإلي الحجاب فرض اذا اعتبرنا انّو فرض ؟؟
زعمه القرآن قعد يستنّى في عفّاط كيما الخميني باش يخرج منّو إلّي الحجاب فرض ؟؟
برشا تو باش يقولولي ياخي ما قريتش الايه في سورة النور ؟؟ لا يا ساده قريتها و اقتنعت زاده اما باش اقتنعت: اقتنعت بأنّو الايه توجهت للرسول صلعم و للنساء متاعو بمعنى اخر كان جات موجهه للنساء الكل راهي جات صريحه زعمه ربي باش يحشم منهم؟؟
حاجه اخرى قبل في عهد الرسول كانت الجواري هوما إلي يلبسو الحجاب و إلاّ المحرمه و إلاّ سمّيها انتي اش تحب باش يفرقو بيناتهم و بين النساء الاحرار لخرين ....
في الحقيقه موش هاذا موضوع تدوينتي اليوم اما الصندي إلي نحب نوصلو هو الساده المدونين او اي شخص اخر إلي ما دخلتش لمخو ها الحكايه متاع الحجاب اذا كان هو ما اقتنعش بها الفكره موش لازم يحاول بشتّى الطرق يا باش يتهكّم يا باش يحارب يا باش يسب يا يا يا ........
انتي ماك اقتنعت بفكرتك و عندك الحجج متاعك ماغير ما تجي في الفضاء ات الحواريه المسيبه و تستغل سوا ديزون ها الحريه و تبدى تجبد فيها صحري و بحري و تسب و لا تخلي و لا تبقي جنب للمتحجبات باش يتّكاو عليه برشا باش يقولو شنيه ها الاشكال هاذي اما جوست نحب نقول و انو اذ كان تحب رايك يحترم سيب الناس تعتقد إلي تحب اذا كان تغطي راسها و الا تعريه خاصة اذا نسمعو و انو فمه شرائح اجتماعيه تشعر براحه نفسيه مع خالقها كي تلبس الشي هاذاكا ...
في الحقيقه و تجربتي الشخصيه اثبتت انو ها المتحجبات (باش مانقولوش الكلهم) 70% منهم يا إما فاهمين بالغلط وإلاّ عاملينو ماسك لحقيقه تعرّضت لبرشا مضايقات منها اني مره متعدي قدام وحده متحجبه و هي تثبت فاش تثبت ؟؟ تثبت في مابين فخاذي و سامحوني في الكلمه ...
بعد ما فتها قعدت نثبت في روحي زعمه باب الڨراج محلول ؟؟ لا الامور الكل لاباس مالا فاش كانت تثبت الطفله ؟؟ الى يوم الناس هاذا مازلت ما نعرفش !!
حاجه اخرى نعرف زوز قراو معايا متحجبات لسبب بسيط و انهم عندهم برشا شعر زايد يا إما ف الساقين يا إما في اليدين دونك تتحجب باش تتلافى ها المشكل (بربي إلي يقراو معايا ما يحشمونيش باش نقوللهم شكون)
فمه زاده شكون تحجبت في وقت ما باش تخدم على روحها يا اما خدامة حزام او خدم اخرى زاده كيما بيعان الزطله(صايره راهي الحكايه و عندي فيها مثال)
بون فمه زاده شكون تلقاها متحجبه و حدها حد روحها للسبب هاذا نرجع و نقول اذا كنت مانيش مع فموش بالضروره نكون ضد اي كيف ما قالت الدكتوره الفه يوسف (شخصيا نحترمها ياسر هاك المرا) كل واحد يلبس الشي إلي يعتقد انو يقربو من خالقو لا اكثر و لا اقل ما غير لا انتي غالط و لا هاو انا برك عندي الصحيح
تحياتي و بالطبيعه ارائي ما تهم كان شخصي المنحط

معمل فارينه جديد يضاف إلى المجتمع المدوّنوتي

ايا صباح الخير
مدة 3 و إلاّ 4 ايام لتالي اكتشفت مصنع جديد متاع هاك الفارينه التونسيه 100% او ما يعبّر عنه بلهجة المشرق بالطحين العربي الطبيعي...
في الحقيقه ها النوع متاع الفارينه او نرمال خلينا نقولوها متاع الطحين خاطينا خاطر التونسي الصحيح عمرو ما كان طحان غير هاوينو فمّه برشه ممّن تسّوللهم انفسهم الرخيصه باش يعملو تصفيقتين فمّاش ما يدبّرو عضيّم يمشمشوه(اما مع بن خرا و اتباعه كان فمّا حاجه تنجم تعوّل منها راهي الوعود و امشط شعرك اتاو نرجعلك و ملفك مازال ما حضرش اما كان شديت صحيح معاهم فمّا الطوابق التحت ارضيّه ف شارع الحبيب بورڨيبه تولّي تعملّّك اپال وقتها...)
ايا قلت عاد و انا كي العاده نبربش طحت بمدوّنه متاع وحيّد ما شاء الله مسمّي المدّنه متاعو تونسي و افتخر (من قوّة العام يا بوڨلب !!!) شخصيا نتمنى لو كان جا يقرى ف التدوينه هاذي باش نقلّو انّو التوانسه ما يتشرفوش بمثل ها الحشرات إلّي كيفك عاد كمّلت نتبّع و نتفرّج في ها المسرحيّه نلقى الرّاجل لا محاله اسم على مسمّى تو باش تقولو شبيه الهشوش بدا يهز و يصبط لا ابدا
الراجل اسمو نوفل المصري(ايه نعم نوفل بما يحمله الإسم من معاني في الموروث التونسي ههههه)
اما المصري نسبة للتصرفيڨ (سخسيّا كان نصرفڨ على حد كيف ها الجميّعه اتاو يديّا يشكيو بيّا لعمّك بنكي مون !!! ههههههه)
عاد دخلت باش نشوف الپروفيل الكامل متاع صحيّبنا: قالّك متخرّج م الاكادميّه السياسيه متاع التجمع الدستوري الديمقراتي (بالتاء) و منسّق جهوي للحوار مع الشباب انا ما نعرفش اناهو الشباب إلي تحاورو معاه لين وليت نشك في انّي ننتمي لسلك الشيّاب !! عمري ما ريت قالّك حوار مع الشباب في الوتلا و مؤتمرات علاه توا الشباب إلي قاعد يقاسي تي ساعات تهزو و تنفضو ما تخرجش منو الفين فرنك باش يجيك لوتيل ؟؟
تي ماك انتي امشيلو و اسمعو !!(اذا كان حبيت تسمعو بالرسمي مش متاع تفرجو عليّا راني باهي ....)
نكملو عاد مع ها المدونه الفريده من نوعها الحاصل عينيك يوجعوك م العبارات الشعشاعه كيما "القياده الحكيمه" و الاّ "الديبلوماسيه الوقائيه" و نزيدكم زاده "المفاهيم الجديدة في الخطاب السياسي للتحول" ابّب ابّب !!
لحقيقه ما فهمتش منين خارج ها العفّاط و شنوّه ها الكلام الاجوف !!!
م الإخر نحب نستدعاكم تعملو تكحيله على المدونه متاع صحيّبنا جوست باش الواحد ينحّي على قلبو خمجه كيف ما قالت الزميله بنت عايله
انزل لهنا و شوف العجايب
ايا بخاطركم و هاني نستنّى في تعاليقكم

الكذب المفلّق تضرب الكوز يقعد الزيت معلّق

ايا على سلامتكم
لحقيقه نحب كيف العاده نشكركم ع التفاعل مع التدوينه لخرانيه اما الله غالب مازال فمه شكون ما فهمنيش (لا محاله قاعد يقرى هو تو في التدوينه هاذي ههههه)
ايا ما يعننيناش
البارح و كيف ما سمعنا الناس الكل احتفلت بلادنا باليوم الوطني للجمعيات و كي العاده سي وخينا حط قدامو كيما في كل مناسبه كمشه من هاك الجماعه إلي كل دقيقه و 46 ثانيه يقومو يصفقو و بدا اش قلك اش قتلك يخطب عليهم ...
لحقيقه ماو تتقال خطبه تركب 66 كيف سيرتو كيف يبدى يجبد فيها صحري و بحري: يقول القايل هو يوم الجمعيات اش دخل الإنتخابات و اش دخل بلڨاسم الشابي و اش دخل الشيخ بن عاشور ؟؟
و الله كيف تجبد الشباب انقولو تتعدّى مع عصره قارص اما يطيح يجبد ع المرا في تونس و على القيروان عاصمه ثقافيه الشي هاذا نسميه كلام مجبود م الحيط هكاك لا إحّم لا دستور !!!
تي برّا مش مشكل الضرب يا بوڨلب في الاوسمه و الدروع و الجوائز إلي قال شنوه كرموه بيهم و نبداو عاد:
* درع الشبكه العالميه للتنميه و البيئه منين جاتنا البيئه الله اعلم (م الإخر إلي يفهمنا كيفاش ها الحكايه عندو كرهبه تخدم بالڨازوز)
*درع إتحاد المحامين العرب: قالك لمساهمة تونس الفعاله في النهوض بمهنه المحاماة ايه مالا تمشيش تقول إلي صارت مشاكل بين وزارة العدل و نقابة المحامين في تونس و الإعتصام إلي صار في قصر العداله في تونس العاصمه الخ الخ الخ ...
*اما هاذي و إلي قالتلهم اسكتو: درع الفيدراليه المتوسطيه لجمعيات الانترنات قالك مساهمه فعاله لتطوير القطاع في تونس اما للي نساو نحب نذكر برك كيفاش الراپيدشار سكّر 3 شهور و الفايسبوك تصنصر تقريبا نفس المده و رجعو من بعد الزوز و تسكيرة اليوتيوب و الدايليموشين و هات من سيتات الڢيديوات ... هاذا بالطبيعه كان ما نحبوش نحكيو ع المدونات إلي قاعده تتسكر كل يوم لين ولّى المسكر اكثر من محلول !!!
دونك مجمل القول البارح و انا واقف في المحطه نستنى في الكار و نسمع في الراديون من تليفوني شخت ضحك و الناس تتفرج عليا يحسايبوني مهبول اما يرحمك يا پاپا في هاك الكلمه إلي كنت تقولهالي و انا صغير: الكذب المفلّق تضرب الكوز يقعد الزيت معلّق !!!
ايا انستو

ايا ع السلامه
قبل ما نبدى نحب نشكركم ع التفاعل معايا بخصوص التدوينتين لخرانين و خاصة تدوينة يبكي الهشوش ع الظروف إلي ضحكت البعض و خوفت او فجعت البعض الاخر كان نجمنا نقولو ... لذا حبيت نزيد نوضح انو في المدونه متاعي ما نكتب كان افكاري المقتنع بيها إلي صحيح في بعض الاوقات فيها شويه هبله اما كيف ما ديما نقول كان ما جاتش فمه الهبله (و مش الهبال) راهو ما فماش ابتكار في الدنيا
من شيره اخرى نحب نأكّد انّو الافكار إلي نقولها ما تلزم كان شخصي المنحط اما اذا فمه شكون منكم تبنّاها تبقى بالطبيعه حريتو ...
ايا ندخلو في صلب الميضوع:
اليوم حبيت نحكي على ظاهرة الفايسبوك و التونسي و بعض لحويجات إلي برشا م الاصدقاء ما يردوش بالهم منها
من ذلك(قداش تفكرني ها العباره بمستوى الكثير م الزملاء في مواضيع الإنشاء في الليسي ههه!!) انو برشا خاصة م الذكور و إلي واقفتلهم في ضهرهم انهم عاملين من ها الفايسبوك وسيله لتفريغ قال الراجل طرف الليبيدو الزايده ياسر باش يشوف شويه بنيّات هاوينو يشلل فيهم عينيه و كان جات حويجه اخرى متاع سبت عشيه و إلاّ حاجه كيما هكاكه ما فيها باس (سامحوني ع المفردات اما حبيت ننقل الصوره كيما هيا بنفس المفردات الي يستعملوها الناس هاذم)
عاد قلت انو فمه برشا ما يردوش بالهم انو في اغلب الاوقات ها البنيات هاذم ما يكونوش فعلا هوما إلي في التصاور اما يكونو من جماعة الآتي إي ربي يكثر منهم الناس و الغايه معروفه بالطبيعه هي انو باش يحصرو جل الشباب التونسي و فين يكمن مركز اهتماماتهم زاده تفسيد الڨروپات الخاصه ...
من شيره اخرى من خلال متابعتي اليوميه لها الشبكه العالميه لاحظت بااااااااارشا انحطاط في مستوى برشا محاورات من قبيل م الحزام لوطا و كيف ما باش تشوفو في التصاور (سامحوني لبنات إلي يقراو ف التدوينه اما شي يلزمو يتشاف حسب رأيي) عاد هاوينو بشويه طرق ملتويه نجمت نجيب بعض التصاور متاع هويات مزيفه و إلي نڨزو عليها الذكوره ب كلام مصلي ع النبي يقطر بالعسل
لا محاله انا وضحت انو ساعات كيف تغزر للپروفيل تفهم انو ما فيه حتى بعلاقه ببعضو فمثلا اش دخل جامعة حلوان في مصر بالمنتخب التونسي ؟؟ و هات من هاك اللاّوي ...
نبداو بالتصويره لولا

تفرج الطفله تبارك الله عليها زين و عين تقول عمرها 30 محطوطه من عام 92 اما القوه الكل في انهي تقرا في الجامعه دونك بشويه لوجيك و ما غير ما يترما الواحد باش يكحّل عليها ينجم يفهم انو فيها واو لحكايه ...
بالنسبه ل التصويره الثانيه بصراحه نحشم انا كيف نشوف وحدي حاجه كيف هكه !!
بدون تعليق

التصويره الثالثه ميساجات متبادله بين طفل و طفله و تلاحظو مستوى الحوار الرفيع (كان التصيره صغيره كليكي عليها اتاو تكبر)


التصويره لخرانيه متاع تدوينة اليوم حطيتها باش نوري كيفاش التونسي الشاب انتفات منّو المرجعيّه تفرج من اية الكرسي للجنس في تونس من تصويرة مصحف قرآن لتصويرة كوپل في پوزوسيون 69 شي يقابل بعضو ياااااااااسر


في الإخر نحب نسمع آرائكم كيف العاده اما ماذابيا نقراهم تحت التدوينه باش هكاكه الناس الكل تنجم تشارك في التفاعل مع التدوينه
يا حبذا زاده نسمع شنوه فهمتو و خاصة شنوه ما فهمتوش
ايا في وديعة ربي

ثقافة فردة الصباط عند الشباب التونسي

صباح الخير
اليوم نحب نحكي على بعض المضايقات بين ظفرين كان انّجمو نقولو انّها مضايقات
لحقيقه نحب نبدى بحادثه ظريفه صارتلي هاوينو انا نحكي مع واحد من معارفي ايا مجبود حديث قتلو باش نمشي للكونسار متاع انور براهم نهار السبت إلي باش يتعمل في وتيل البارشيلو
لحد لهنا كل شي معقول اما إلي خلاني قال الراجل مستكونسي كيف قالي "تو مغروم بالافلام و فهمناها مغروم بالمسرحيات التونسيه و فهمناها اما مغروم بانور براهم هاذي ما تدخلش للمخ !!!"
و الله ريتها غريبه لحكايه إلي قالهالي لكن بعد تنجم تقول اني نجمت نقرّب علاش قال هكاكه
صحيح انا سپورتيف و نمارس في نشاط رياضي و صحيح ف الانفورماتيك يديا ما تركحش و صحيح انو مغروم بالسينما و انواع متاع موسيقى مش معروفه ياسر اما وين الإشكال ؟؟
يا سيدي في تونس ستانسنا انو الواحد كانو سپورتيف ما يتلها كان بدومانو تقول عليه ما يشوف في دنيتو كان الرياضه إلي يمارس فيها (خذيت سپوتيف كمثال و بالقياس تنجم تركب على اي امثله اخرى)
لحقيقه انا ما ندّعيش انّي حكيم زماني اما سبحان الله جيت هكاكه نحب الحاجه الفينو و المزيانه سيرتو كيف تبدى مخدومه بإحساس كبير كيما انور براهم و ياني و انيڨما كيني جي و غيرهم
دونك تالمون الناس ستانست بپروتوتيپ متاع شخصيات و تركيبه غير متوازنه و مختلّه (في التركيب) لدرجة انو ها الپروتوتيپ ولاّ هو الاساس و إلّي يجي غير هاذا هو "الموش نرمال" و ساعات مهبول (كيف ما تقالتلي)
في الحقيقه انا ما يهمنيش الناس اش تحكي اما إلي يهمني انا باش مقتنع و شنوه إلّي نراه على خاطرني نأمّن بانّو الواحد مناّ كان ما تكونش شخصيتو مركبه من ناحية تعدد الميولات صعيب ياسر كان باش يعمل حاجه في حياتو ...
يا سيدي لواه نمشيو لبعيد ساعات و انا نبدى واقف مع زملائي في الانستيتو إلي نقرا فيها يتجبد موضوع م المواضيع و تواتي باش نعطي رايي و نستشهد بالكاتب الفلاني في الكتاب العلاّني مع مرور الوقت و في اغلب الحالات تي حتى كان نجبد اسم كاتب و الاّ كتاب م الحيط ما يفيق بيّا حد تالمون الجينيراسيون إلي توجدت انا فيها ما عادش الناس تقرا فيها كتب !!!
لا و الاغرب من هاذا يجي يقلي "تو هاكا حد نيتك تقرا في الكتب ؟؟ مازالت الناس متاع كتب؟؟ تي شبيك تڨول عليك خارج م اليونان القديمه !!!(هههههههههههههه)"
اش تحب تحكي معاه براس امّك !!!
وفمّا ناس اخرى تولي تغزرلك على اساس انك متثقف و "طيب" و هاذا زاده لكستريميتي لخرى و و و ...
بغض النظر على الإيديولوجيات (ستّار عليك !!! هههه) المذكوره الفوق مش معنتها ما عادش فمه ناس تقرى الكتب و إلاّّّّ تمشي للسينما لا بالعكس فمه اما انا نراهم ولاّو لحقيقه قلّه و لحديث ولاّ يدور على شاكلة: "شفت كوثر الباردي كيفاش نقصت في صدرها ؟؟ ريت الروبه إلي عملت بيها نجوى كرم لكليپ لخراني متاعها ؟؟ ريت الجوار الفلتاني بشكون عرّس ؟؟" و هلمّ كركر و إلاّ حتى جرّا و إلاّ رفعا كان تحب
دونك اش دخل سمايا فيهم انا ينقّصو و إلاّ يزيدو يلبسو و إلاّ يعرسو ؟؟ ياخي شبيهم ماهمش عباد ما عندهمش الحق في شويه انتيميتي ؟؟؟
في الإخر نحب نقول انو ها المدونه هاذي و الافكار إلي فيها مش بالضروره انهي تكون صحيحه فهي تعبّر عن رأي شخصي قد يكون ذاتي في بعض الاحيان و قد يكون موضوعي في بعض الاحيان و هي تعبر عن رأيي السخسي (قال الراجل) و لا تلزم احدا غيري
بون لعشيه نمشي لتونس و الليله نحضر حفلة انور براهم و بقدرة ربي اتاو نحكيو فيها الحفله
ربي معاكم

!!! يبكي الهشوش ع العلوش

ايا على سلامتكم
البارح و كيما تعرف الناس الكل كان نهار 6 افريل...
ايا قمت كيما كل نهار اثنين مع حكاية التسعه غير ربع باش نمشي نقرى
ايا و انا نغسل في وجهي ثبتت نلقى إلي عينيا لونهم اخضر و بالنسبه للي ما يعرفنيش مليح عينيا مارون و ساعات يعطيو ع الاخضر و يخضارو كي يبدى عندي احساس مفرط يا إما بالفرحه و إلا بالغس و إلا بالحزن ايا ثبتت كيما قلت في عينيا و قلت يا ربي تستر و تعدي ها النهار سلامات !!!
ايا خرجت م الدويره و و قفت "ماشي في بالي" باش ناخو الكار ايا اتاو تجي اتاو تجي ما جاتش...
قلت ماعليناش نمشي نتمشى شويه اتاو ناخو الكار متاع الحومه لخرى ايا بديت نتمشى و ريحة الكت ما فماش و هو لا محاله الدنيا فارغه تقول نهار احد !!! لحقيقه جاتني غريبه شويه ها االهدره كيفاش الدنيا فارغه و ما فماش كيران ...
ايا و انا واقف في المحطه متاع كار الحومه لخرى جات طفله قرات معايا قبل سلمنا على بعضنا و قلتلها يا خي شبيها الكار بطات؟؟
تلفتت و قتلي "ياخي ما فيبالكش؟؟" قلتلها انشاء الله خير ؟؟
قاتلي ماهو هاك إلي ما يتسمى مشى للمستير
ايه ماو لاباس اش هز سماه للمستير ؟؟
ماهو اليوم ذكرى وفاة المجاهد الاكبر !!!
آآآآه صحيح نسيتها جمله لحكايه !!!!
ايه و اش دخّل الكار في هاذا الكل ؟؟
ماهو هزو الكيران للمستير باش يلمو فيهم الصرفاڨه و الصرفاڨات !!!
ايه وجلّين بيهم (ههههههههههه)
ايا يا سيدي شميتها ڨارصه لقفت روحي و خذيت لواج و انا اش باش نحكيلكم لا خليتلو جنب يتّكا عليه و بيني و بين روحي نخمم اش انجم نعمل كان ما نخلطش على الصيونص !!!
الحاصل خلطت و عروڨاتي شرتلّه و إلي بيه الفايده دخلت للكلاس
وقتها عرفت علاش لون عينيّا صبح اخضر !!! (ممكن ياسر يقولو منين جايبها ها الحكايه اما راهو بالرسمي تصيرلي م إلي انا صغير!! بون الناس إلي قراب مني و يقراو توا ممكن يقولو صحيح)
تي هيا ما يعنيناش كملت قريت و جا وقت المرواح هيا مشيت للمحطه كي الرجّال ماشي في نيتي باش نلقى كار و انروّح حاشاكم نلقى .... (ايا سيّب علينا منها) هاني نستنى و برّا لا كيفاش تبقى هي البلاد بلا كيران ؟؟ حتى انت قداش تهز و تسبط يا هشوش !!!
ايا درجين ربع ساعه نص ساعه ساعه غير ربع و اخيرا جات ست الحسن و الكمال و هي اش باش نحكيلكم فااااااااااارغه تمشيوش تقولو فيها التلامذه إلي خرجو نص النهار و إلا حاجه لا بل الكل (وقتها ماضي ساعه و نص) ستر ربي ما جيتش تلميذ و إلا راني !!!!!!!
ايا خلطت للدار و الدنيا سخونه تشوي و انا لابس الكلّي في الاكحل تقول متشمت في روحي في ها النهار الكلب !!
عرضتني امي هيا ايجا افطر عيش ولدي؟؟
اش من فطور بالله !!!
هو يلم الناس باش يصفقولو في المستير و يزغردولو في وضنيه و انا يتعدى عليا نهار كلب
تي شبيك يا وليدي ما فهمت منك شي ؟؟ علاشكون تحكي ؟؟
على سي بن خرا !!! لا يزي زعّك الراجل من بلاصتو و كي مات روّح بيه في طياره بالشماته اسمها 7 نوفمبر و زيد تو ماشي سوا ديزون يحيي في ذكراه !!!
والله دنيا !! هاذا إلي يقلك يقتل الراجل و يمشي في زنازتو !!
و الناس بالله إلي ماشين يعيطو" يحيا يحيا" ما يخدموش ؟؟ ما عندهم ما يعملو ؟؟ و الاقوى م الكل تقولش جايبينهم م الساحل ع الاقل !! لا هاو باجه هاو الكاف هاو القروان ها ڨفصه !! (الولايات إلي ذكرتهم نحبهم برشه و كي قلتهم مش محقرانيه و إلا حاجه اخرى ابدا) و هذا الكل باش يقولو كلمتين لسي بن خرا و هو تقول ما يعرفش إلي الناس فدّت من فوڨيرتو و ما عادش يطيقو كان إلي عندو مصلحه !!
تي إلي بيه الفايده الزنازه حاميه و الميت كلب (مانيش نحكي على حبيب الامه!!)جاي من طرف الدنيا باش يرمي بوكي نوار و يروح !!! قمة قلة الحياء معنتها !!!
إلي بيه الفايده و إلي حبيت نعديه عبر ها المدونه مش اني باش ندخل في سيادة الرئيس (حفظه الله و ابقاه ذخرا لنا !!! ههه) اما جوست حبيت نورّي كيفاش على جال واحد برك تتعطل 7 و إلا 8 ولايات خاصة بعد ما سمعت إلي بارشا جامعات قالو للطلبه "براو روحو الزين في المستير" مالنا و مالو في المستير و إلا في ضبوط الڨرده !!! ما نقراش ع روحي ؟؟
في الاخر نحب نشكركم كيفاش تحملتو و قريت للاخر ها المدونه و كيما صبرتو معايا ربي يعطينا و يعطيكم القوه باش نصبرو على حوايج اخرى انا كان ما كتبتش ها المدونه اليوم راهو درا اش صار فيا و ممكن ياسر راني متت بالغلبه !!!
يحيا بن علي 2014 و تفووووووووووه عليا كان نجي عبد
!!!!!!!!!!!!!!!

حلال/حرام؟؟؟

ايا ع السلامة
الموضوع إلّي باش نحكي فيه اليوم عندي قرابة الاربعة ايام نحب نكتبو اما تالمون غششني پلو او موان كي ما يقولو لفرانسيس ما حبيتش نكتبو و انا متغشش خاطر فمه بعض لصحاب قالولي ما عادش تكتب و انتي متغشش باش ما يخرجش مقال كيما مقال بوتلّيس الّي موجود لوطا في بقية البلوڨ بون ملاحظة تقبلتها و درستها و ريت انو تنجم تكون في بلاصتها هاذاكا علاش خذيت بيها ...
نجيو لموضوعنا متاع المره هاذي:
و انا ندور ع الانترنات و بالضبط ع الفايسبوك استفزني مقال مقتطف من مجله م المجلات العربيه هاك الي تقول انتي متاع زوز صوردي
عاد في ها المقتطف فما كيما تقول انتي استشارات دينيه يطرحوها قرّاء المجله و يجاوب عليها فضيله شيخ فقيه ربي يحفضو (اما انشاء الله ما يحفضلوش الطريقه الي يفتي بيها...)
عاد قلت هاو نحط شويه مقاطع و نعلق عليهم و تزيدو تعلقو انتوما باش يصير كيما قال الراجل تلاقح و تبادل في وجهات النظر (ههههههههه):

س:فضيلة الشيخ، أنا شاب ملتزم، وجاءتني فرصة للسفرعلى متن طائرة تحلق فوق بلاد الكفار، وتحتها بيوت يشرب أهلها الخمر ويمارسون الفحشاء، فهل أنا في هذه الحلة مذنب؟
ج: عليك يابني أن تتحدث مع الكابتن طيار وتطلب منه أن يتجنب الطيران فوق بلاد الكفار، وإذا كان مُضطرا فعليه أن يحاول الطيران فوق تجمعات المسلمين وهذه طريقة سهلة، فمآذن المساجد مرتفعة، ويمكن أن تكون دليلا للطيران الشرعي الحلال.
===> بون سمعت ب لابال حلال في اللحم و شويه پرودويات اخرين اما حلال في الطيران هاذي هي الجديدة ماو يقلك قد ما تعيش و تتعلم اما عل الحساب الواحد لوروپ و الا امريكيا و الا غيرهم ماهوش معفسهم لين يموت !!!
*********************************
س: أنا مسلم تقي، وأحب السباحة لكنني أخشى أن أسبح في مكان
تكون قد سبحت فيه من قبل فتيات يرتدين المايوهات، فهل المياه التي أسبح فيها تكون نجسة لأنها اختلطت بعورات الفتيات؟
ج: عليك يا ولدي أن تكون متفهما للظروف، فإذا كانت المياه جارية فالسباحة فيها حلال، أما المياه الراكده التي تظن أن أجسادا عارية وبضّة وناعمة سبحت فيها من قبل، فالاقتراب منها حرام.
===> هاذي عجبتني صراحة !!! معناها الراجل ما عندوش عوره حسب كلام "سيدي الشيخ" و حتى كان عندو كي يهبط يعوم في الما عورتو تبقى شايحه (من قوّة العام !!!!)
*********************************
س: صديق لي يبلغ الثلاثين من عمره وقد أراد الزواج من فتاة قيل له بأنها في العشرين، فلما تزوجها اكتشف أنها في السابعة من عمرها، فهل يطلقها، أم يحتفظ بها حتى تحيض؟

ج: إذا كان قد رآها رؤي العين وظن أنها في العشرين ثم اكتشف أنها في السابعة من عمرها فالاثم يقع على ولي أمرها لأنه لم يجعلها ترتدي ملابس الأطفال، وإذا كانت منقبة، ودخل عليها فعليه أن يسأل أهل العلم.
====> هو لا محالة البنات الصغار يشبهو ياسر لبنات العشرين اما غير احنا في سبرنا العرب طلعنا هكاّ الله غالب تي هاو ربي حب هكا كي طفلة عمرها سبعه كي طفله عمرها عشرين .. اما سيدي الشيخ سكونهم اهل العلم؟؟؟
*********************************
س: أنا أعمل في رقابة المطبوعات، وأحيانا أقرأ رواية فيها حديث عن امرأة سافرت دون محرم، فهل أنا آثم وينبغي عليَّ ترك العمل؟
ج: عليك أن تتصل بكاتب الرواية، وتطلب منه تغيير الجملة إلى امرأة سافرت ومعها محرم، أو يضيف كلمة آثمة وتلعنها الملائكة، وإذا لم يستجب الكاتب فعليك أن تستقيل لأن أجرك حرام من هذا العمل المخالف للشرع!
===> اي اللاّزم لازم خويا العزيز لزما عليه هو الكاتب يكتب من اصلو ؟؟ كان يسمع كلامي اتاو الورق الي يكتب عليه يمشي يلف فيه الحمص المنفّخ و يبيع راهم يصورو فلوس كي التراب جماعة الحمص المنفّخ ....
***************************************
س: لي زميل في الجامعة غير مسلم، وقد استعرت منه كراسة المحاضرات وسقطت فوق سجادة الصلاة، فماذا أفعل لكي لا يغضب الله علىًّ ويدخلني نار جهنم؟
ج: لا إثم عليك إن شاء الله إذا سقطت كراسة محاضرات زميلك الكافر فوق الطرف الأيسر للسجادة، أما إذا سقطت في وسطها أو أيمنها فينبغي أن تغسلها سبع مرات، أما السجاد المصنوع بأيدي فتيات لا يرتدين القفاز فينبغي احراقه
===> رد بالك كان في اليسار ميسالش !!! عملا بقول سيد النبي كي قال يسّروا و لا تعسّروا (!!!) يد الطفلة تجي عريانه هي ؟؟؟ علاش ما قصوهالهاش جماعة الامر بالمعروف و النهي عن المنكر؟؟
***********************************
س: أنا امرأة صالحة، أقرأ كثيرا لكل الشيوخ، ولا تبتعد عيناي عن شيوخ الفضائيات، لكن لم يجب أحد عن سؤالي الذي أرقني كثيرا: هل يستطيع عفريت ذكر أن يجامعني في حضور زوجي دون أن يلفت انتباهه؟
ثم إنني واقعة في مشكلة محرجة وهي أن ابني الصغير يشبه العفاريت، ويجري مثلهم، ويختفي من غرفة إلى أخرى، ويصرخ كأنه منهم، فهل تظن، سيدنا الشيخ، أن عفريتا انزلق في فراشي، وحملت منه هذا الولد الشقي، خاصة أن جارة عجوزا تقول لي دائما:ج: إذا كان زوجك يغط في النوم ويصدر شخيرا ولا يشعر بأي حركة حوله فأغلب الظن أن ابنك من الجن وهو يحتاج إلى معاملة خاصة، ويجب أن لا تغضبيه حتى لا يستعين بأقرانه، ويسببون لك المتاعب.

أما إذا كان والده صالحا وطيبا فلا شك بأن ابنك العفريت من صلبه.
===> سيرتو ما تغشوش مكانش يجيب صحابو و صحابو يجيبو ولاد حومتهم و اش باش يحزها عاد وقتها !!!!
*******************************
س: أعرف شيخا يقول بأن المرأة التي تجلس قبالة التلفاز آثمة لأن المذيع يستطيع أن يراها وهي بملابس البيت، فهل هناك طريقة لتجنب الحرام في هذه الخلوة غير الشرعية؟
ج: عليها أن تتدثر جيدا، وأن تجلس بزاوية 45 درجة حتى لا يلمحها المذيع أو أي ذكر عبر التلفاز، ومن الأفضل شراء جهاز تلفاز بغير صورة تجنبا للوقوع في شرك الكفر البواح.
===>
!!!!!!!!!!!!!!!!!!!!
---------------------------------------------------------------------------------------------
ملخّص القول و إلّي نحب نقولو انّو الإنسان اذا كان باش يحصر روحو في حكاية حلال ولاّ حرام راهو مش باش يعمل حتّى شيء يا وخي ماو صفّي قلبك و نيتك مع ربّي و ما تعصيوش في المتعارف عليه و اذا كان فمّا حاجه هكّا و لاّ هكاّ حكّم عقلك انتي
صحيح فما شكون يفهم في الدين اكثر من غيرو اما الصوت الباطن متاع العبد و إلّي كان كل واحد يسمعو وقت اللاّزم تو تشوف كيفاش خاطر بصراحه ها الشيوخ الّي كل مره خارجينلنا من شيره راهم قمّه في التزفزيف و منهم القرضاوي هاذايا إلّي سبّنا احنا التوانسه و بعد جبناه ضيف معزّز مكرّم في القروان !!! والله شيء ما تفهم !!!
كي العاده نستنّى تفاعلاتكم و سامحوني الجماعه إلّي الموضوع هاذا ماهوش شربهم ...

... شطر محبة و شطر ورثة

كيف ما وعدتكم باش نزيد نحكيو ع السينما التونسية بمناسبة الفيفاج الي تنظمت في سوسة
فيلم اليوم هو فيلم شطر محبة للمخرجة كلثوم بُرناز و يمثل فيه يونس الفارحي و سناء كسوس و طفل اخر الحقيقة ما عرفتوش ...
الفيلم في تركيبو مش من النوع القوي بمعنى مش تالمون واقعي مثلا ما نتصورش كان فمة بو (عل الاقل في تونس!!!) ينجم يبقى مخبّي على ولادو اي معلومة على امهم المتوفية عندها برشا ... لا اسمها لا علاش و إلا كيفاش ماتت و لا حتى وقتاش !!!
الحقيقة و انا نتفرج في الفيلم ظهرتلي حكاية "لابسة شورت" ايا ما عليناش خاطر الفيلم يتناول ما هو اهم باش ما نقولوش ما اخطر ...
من اهم ما تناول الفيلم من مواضيع حكاية الورث بين الراجل و المرا و لهنا نحب نتسائل علاش السيدة كلثوم مخرجة الفيلم تحب تجتثّ المسألة تقول عليها ماهي موجودة كان في تونس !!!
لهنا نحب نوضح زوز وجهات نظر (عيشو زوز !!)
الوجه الاول و إلي متبنيه العلمانيين و الي مازالو مسلمين و مأمنين بربي(وهذا موضوع اخر وحدو انشاء الله نتناولو في مرة لاحقة في المدونة هاذي) عاد ها التيار يقول: للذكر مثل حظ الانثيين من منطلق انو جرات العادة في المجتمع الاسلامي العربي و لا حتى في العالم زادة انو الراجل هو الي يمسك بزمام الاسرة من حيث اخذ القرار و المصروف و هذا الاهم في حكايتنا هاذي عاد يقلك الانثى تاخو الشطر خاطر المناب متاعها باش تتمتع بيه وحدها مش كيف ما الراجل الي باش يصرفو على روحو و على عيلتو بما فيها مرتو ... بالفلاّڨي متاع المرا للمرا و متاع الراجل للعيلة الكل ...
و يكمل عاد يقلك بما انو الادوار تشكشكت و المرا ولات تخرج باش تخدم و زادة ولات تتحمل مسؤوليات عايلتها و في بعض الاحيان تاخو دور الراجل (لهنا نحكي بالمقارنة مع الوضع التقليدي ما تسرحوش برشا) يقلك عاد ما فيها باس كان المرا تولي تاخو هي و خوها شطّارة خصوصا و انو حاجياتها كثرت على قبل دونك باش تستحق اكثر للعط من هنا باش نلقاو رواحنا مقابلين التيار الثاني و الّي متبنّيه (ما نحبش نقولها خاطر مش صحيحة بالضبط) الإسلاميين و إلّي متمسكين بالقرآن و يقولو انو نص الاية واضح و لا يتطلب اجتهاد اي باش تنفذ و ادّور كيف ما يقول پاپا (اي نعم)
و من هنا باش تتخلق هاك المشاكل متاع اشبيكم تحللو في ما حرمه الله او العكس و فمة شكون قياسا بها المسألة متاع الميراث نفى حاجة اسمها اجتهاد جملة من قاموسو سينون باش يرد كل شيء حلال و الا كل شيء حرام ....
شخصيا ما انجم نتبنى حتى فكرة من ها الفكرتين لعدة اسباب منها اني مانيش مؤهل لمثل ها المسائل الفقهية و تنجم تقول اني زادة كيف نشوف كل فكرة وحدها نقول ها صحيح ...
عاد مخرجتنا في العمل السينمائي متاعنا موضوع الحديث تناولت المسألة من وجهة نظر وحدة و إلي هي بالطبيعة الراي الي ذكرتو انا م الاول و هنا نقطة ضعف في تناول الموضوع حسب رأي المتواضع بالطبيعة اي كاينّي هي بنت **** ياسر باش تقول هاو الصحيح عندي في وقت اني كانت تنجم تطرح الميضوع في شكل دعوة للتفكير مش في شكل حل جاهز و مش باش تجي تنبّر على المساواة بين الراجل و المرأة في الإسلام و تزيد تنبّر على بورڨيبة كيفاش نجم ينحي تعدد الزوجات و ما نجمش ينحي ها القانون هاذا ....
هكه كان فيلم اليوم و بربي ملاحظة ما ذبيّه كان تخليو تعاليقكم في المدونة و كان لزم تستدعاو اصحابكم باش يطّلعو على ها المقالة هاذي خلي كل حد يعطي رايو بالباهي و إلاّ بالخايب المهم خلّينا نتناقشو و كل واحد يعطي رايو عل الاقل في الفيرتيوال كي الواحد قدر عليه ربي ما دام ما نجمش يعطي رايو في الدنيا
!!!

ثلاثون

ايا بعد ما وفى بوتلّيس متاع سي نصر الدين السهيلي دخلو لوليدات الصغار و الحمد لله
ما دخلوش من قبل ولاّ راهي بحرت !! ايا بدا فيلم ثلاثون و كانت عندي فكرة كي الشعب التونسي عل الفيلم بحكم انو يتناول مرحلة تاريخية هامة من تاريخ تونس و هي فترة الثلاثينات وإلي تعتبر من ابرز فترات التاريخ (عل الاقل بالنسبة ليلي انا !!) لحقيقة الفيلم عجبني كف ما عجب برشه ناس تفرجو فيه من و خاصة من حيث النص و السيناريو الي تناول احداث تاريخية كيما تاسيس جامعة عموم العملة التونسيين و بالاخص المفكر التونسي الطاهر الحداد و إلي تمحور عليه الفيلم الكل بحكم انو كان هو السارد و راوي للاحداث من وجهة نظر متاعو
الموسيقى كيف العادة ما تنجم تكون كان حلوة من عند مصمم الحضرة و الي هو الفاضل الجزيري وإلي اتسمت بالطابع الصوفي المعتاد
و الشي الي لاحظتو في الفيلم التركيز خاصة على تيار تحرير المرأة بقيادة الطاهر الحداد في العصر هذاكا و الرفض المصاحب من طرف الاغلبية و خاصة الاسلاميين تي الحاصيلو تقولش عليك عايش بالفكر هذاكا لتو !! اي انو هاك الرجعية و التعصب هو هو ما تبدل منو شي و لا و الله ولّى اقوى تو بياااااسر !!!
من الاشياء الي عجبتني زاده شخصية الزعيم حبيب الامة ... و إلي كيف ما عرفناها ديما مرتكزة على سياستين ذكيتين و متكاملين فرد وقت و هوما سياسة المراحل و منطق الغاية تبرر الوسيلة و الي نعتبرها شخصيا ناجحة رغم الصعوبات الي ممكن تخلفها و بعض المخلفات الاخرى ...
شخصية علي الدوعاجي و الي قام بيها وليد النهدي نعتبرو نجح فيها بحكم انو زاد اكد تصرفات ها الكاتب التونسي من حياة المجون و السكر و العربدة و شخصيا زدت اكتشفت انو علي الدووعاجي كان عندو دور كبير و هام ياسر خاصة في الحركة السياسية في البلاد في هاك الزمان ...
اما الضلع الثالث لها المثلث العجيب و هو بلڨاسم الشابي و الي ادّاه ممثل فلسطيني و إلاّ هو اردني كان صدقني ربي فهو موطن الضعف في الفيلم بكلوّ ضاهر عيني عينك الراجل ما هوش تونسي و يتعصّر باش يخرج الكلام عاد قلت و انا نتفرج اش لزّك يا عم الفاضل جايب الڨاوري كيف هو ما يڨدوش و كيف ما قال الاخر تي كي ما تنجماش خليه في دبابيزه !!!
الجدير بالذكر و انو الفيلم الي تصرف عليه 3 مليارات كان مقياس في الملابس و التنسيق مع "فيڨوران" (الممثلين العابرين) و الي كانو متواجدين بكثرة على طول الفيلم حيث رجعنا بالذاكرة لهاك الايامات متاع الدمادم امثال علي الدوعاجي الطاهر الحداد محمد علي الحامي عبد العزيز العروي عبد الرزاق كرباكة و غيرهم من الجماعة الي نعرفوهم و الي ما نعرفوهمش ...
المفيد الفيلم حلو و عطى بسطة شافيه و ضافية على تونس في فترة الثلاثينات عاد قلت علاش سي الفاضل ما يزيدناش سيرتو للنا احنا الشباب متاع تو افلام اخرى على ها الشاكلة هاذي و يولي زادة اربعون و ستون و سبعون تي المهم ثمانون و تسعون لا خاطر شبعنا بيهم في التلافز خاطر وقتها تولي قاعد في شعبة ما عادش ف سينما و وقتها تولي تصفق من جنابك ما غير ما تشعر ...
ايا بخاطركم و هاني مازلت باش نكتب في السينما و في غير السينما زادا ...

!!! بوتلّيس

بحكم انّهي صلاعة و بحكم انّي مبعبص متاع افلام توانسة اغتنمت فرصة الفيفاج او ما يعبر عليه بالعربي ب المهرجان الدولي لسينما
الطفولة و الشباب و إلّي الى حد الآن ما فهمتش علاش ها التسمية المعفّطة بالقوي و اتاو تعرفو علاش تباعا ...
قلت عاد اغتنمت ها الفرصة باش نشوف افلام توانسة و غير توانسة غزرت الصباح لبرنامج اليوم نلقى فيلم ثلاثون و قبلو فمة فيلم حاشاكم بوتلّيس و هو فيلم عاملو هاك الولد نصر الدين السهيلي و إلي هو هاك الي مثل محرز ولاّ حروز كيف ما يناديلو خوه الشوكو في مسلسل مكتوب
ايا خلطت للبالاص امخر شوية قصيت تسيكرة ب 500 فرنك و طلعت الفوق نلقى كمشة مفرخة و طفل من جماعة التنظيم ما خلاهمش يدخلو بقيت واقف انا لين قلّي هو تفضل ادخل
ايا دخلت و قعدت و بديت نتفرج ... تي الحاصيلو كيف قعدت عرفت علاش الطفل ما خلاش هاك الزغزغ يدخلو يتفرجو الحكاية و ما فيها بالنسبة للّي ما تفرّجش في ها الكور ميتراج كيف ما يقولو يا ربي العمال عليك على خلوطي نلقى (في الفيلم بيان سور) شاب يعمل عمرو في ال23 سنة يرضع !! باش تقلّي فاش يرضع ؟؟ اي نعم يا ولدي يرضع في زوز بزازل حاشاكم عاد هاوينو كيف ما يقول لسان اللوح "بعد الفحص و التمحيص" البزازل طلعو بزازل امّو ... و طلع بو الولد ناكر فيه و هاو ضرب مرتو هاو اتهمها بإلّي هي هازّا ساقيها لراجل اخر !!!(كلام تابع السيناريو) و ادور ادور الاحداث و ترجع للولد و هو يعصر في بزازل امو و الحليب هابط يهرهر و هو تڨول يحلب في عجول !!! تي حتّى في الكذب ضهرنا ما نعرفوش نكذبو يا بوڨلب من قوة الحليب الي خارج !!!
الحقيقة الكور ميتراج رغم الي فيه كيف ما قال الراجل فيه ما يتمشمش اما يعتبر كارثة من كوارث السينما التونسية باش تقلي في العرا ؟؟ نقلك لا خاطر شفنا ما اقوى في العرا من عصفور السطح ل عرس الذيب و الذهبي الخ الخ ... الكارثة في انك تجي تلوج في ميضوع ما تلقى كان شعر المعيز و بربي كان فمة شكون يقرى في المدونة متاعي و تفرج في ها الفيلم المعفّط حسب رايي التاعب يقلي اش فهم من دين امها !!! خاطر خوكم يا ذنوبي كان فهمت حاجة !!
ايا هاو نكمل نكتبلكم على ثلاثون و هاني راجعلكم ...