سوسة ذات 9 جانفي 2011

الأحداث مازالت لحد الساعة هاذي في منطقة حي الرياض وين تم حظر التجول و تفريغ القهاوي م الناس و تفريكهم بالماتراك...
برشا كلام على ولد ضربو البوب بالكرتوش تبقينا مازال مش رسمي...
دار الشباب حي الرياض تحرقت من قبل المتضاهرين و مازال الشي على قدام

زبلة الآف آم

م الحوايج إلي ساعات يلزمك تطرح على نفسك أسئله قلما و ندر باش تلقالها إجابه كيف تلقى ناس تكسرلك

كرايمك "كأحسن ما يكون" كيف ما يقول توتو...

من بين ها الأشياء "المسهول" ع الريداكسيون في السيت متاع الموزاييك آف آم (هاو قالو بنّة الآف آم)

السيد هاذا و لو أنو ديما يتحف فينا بطقاطق تبكّي أكثر من أنها تضحّك هاو مثال مزال سخون

 

تنجمو تنزلو ع التصويره مرتين باش تشوفو مليح التصويره

الصبر و اكاهاو

تونس ثلاثية الابعاد

شد انتباهي اليوم تصويره هبطت في صفحة الفايسبوك متاع الزميل بيڨ تراپ بوي و لحقيقه أوحالي بفانطازيا و سرحت معاها فحبيت نواصل فيها لهنا في ما يسمى بالبلوڨ "السخسي" متاعي....
يقول الخبر و انو فما مرا امريكيه (السيده الفاضله جنيفر) مشات مع صحابها لصالة سينما في نيو يورك باش تجرب تقنية الثري دي او ما يسمى بالتقنية ثلاثية الابعاد عاد تقول السيده الفاضله و انها تفرجت في فيلم من النوعية المحبذه عند الكثير من الشباب إلي ما لقاش للزواج سبيلا...
امشي يا زمان و ايجا يا زمان و يتعدى شهر و للا جنيفر بدات تحس في بعض "التقلقات" إلى ان قامت بتحليل تبين فيه و أنها حبلى...
ملاحظه على جنب: راجلها كيف ما تقولو انتوما يخدم في الجيش الامريكي(ادامه الله ذخرا لمصالح امريكيا الپتروليه في العراق) منذ مده
المشكله مش في انو السيده الفاضله حبلت اما الاتعس و انو ولدها كيف ولدتو طلع وصيف !!!
عاد تقول جنيفر و انو الحمل متاعها جا نتيجة مشاهدتها للفيلم الإباحي على طريقة الثري دي خاصة و انو الممثل الرئيسي كان وصيف...

لهنا تلقاو رابط لتصويره متاع المقال لمن استطاع إلى الانڤليزيه سبيلا

في الحقيقه ما نحبش ندخل في صحة ها العمليه متاع "النسخه الرقميه" للسيده مريم العذراء اما حبيت نواصل (و كيف ما حكيت م الاول) في حديث خونا البيڨ إلي نحييوه بالمناسبه و إلي باش نقر فيها ضمنيا و للضروره البلوڤسفاريه و انو كلام مادام جنيفر صحيح...

فمثلا نتصور و انو تونس ضبعه مثلا تولي تتبث في نطاق الثري دي (ان شاء الله بعد عمر طويل) و يبداو "يحشيو فيه علينا" في الاخبار في تونس جنة حقوق الانسان و تونس بلاد الحريات و دولة القانون و المؤسسات و هات من هاك الكلام القوي....
عاد قلت ع الاقل نولي انجم نفهم و نحس بالعنايه الموصوله و النظره الشموليه (خاطر تو في دو ديمونسيون ما قاعد نشوف كان في النطره الشموليه و كان عندك حاجه يفكوهالك)
نولي هوما يقولو حرية رأي و انا نطلع في حوار مع وزير (نظهر بالوقت شبيك لحكايه متاع تكنولوجيا حينيه) و نقلو انا هاني ناجح دخل والديّا نكمل نقرى ماستار باش ما نمشيش لفاك باش نقدم مطلب يخرجلي جلف يقلي بالحرف الواحد: "تحب تقرى ماستار ؟؟ برا جيبلي الوزير و ايجا اتاو نقبلك ما فماش مشكل..." (للأمانه صارت مع احدى الصديقات لحكايه هاذي) هاذا مثال في القرايه

في الرياضه عندك مثلا كيف يطل عليا توتو لعبيدي في ماتش بطلعتو البهيّه و يبدى جمهور لفريقي و المكشخه يتسابو و هو يقلي روح رياضيه عاليه نولي منين نسمع في فاحش القول نولي نسمع في جمهور الترجي يقول: "الكلنا توانسه و شنيه الكوره نعملو في جو احنا !!! الساحلي ؟؟؟ سيد الناس هاك الراجل خونا و حبيبنا !!! لا نخطفولو و لا يخطفلنا ملاعبيه...." هاوينو نحس روحي قال الراجل "في بحبوحة من العيش" و تولي زاده ها المرايات السحريه متاع التروا ديمونسيون رفيقة دربي على الدوام و ما عادش نشوف شكون في بلاد التضامن و التآخي تونس ما عادش نشوف ناس تبات فمها منتن تالمون عندها قداش ما كلات شي و تولي الحبوسات فارغه من سجناء الفكر و الصحافه على غرار الفاهم بوكدوس و غيرهم

من شيره اخرى نولي نلبس المرايات العجيبه بما أني باش نولي نشوف الدنيا الكل ثلاثية الابعاد و نعمل دوره في القهاوي إلي باش نلقاهم تقريبا الكل فارغين. بالطبيعه بحكم و أنو الشباب التونسي الكل يخدم و ما عندوش مشكلة متاع بطاله و هات من هاك الكلام الماسط و الغير معقول إلي يتناقلو فيه وسائل الإعلام الاجنبيه خاطر تونس جنّه و فيها بريكاجي كيف ما يقولو و الشي إلي عندنا ما يكسابو حد !!!
و نواصل عاد جولتي في الشارع و هاوينو كيف نعمل طله ع الكياسات عمري لا نلقى فيه حفر و تالمون نظيفه نولي نشوف فيها وجهي و انا هكاك نتعدى ندخل لوتيل يفرح بيا إلي في الباب و يقلي تفضل خويا لعزيز و اون مام تون يتعدى واحد توريست يجي باش يسألو يقلو ما نعرفش !!!

ملا تونس هاذي كيفاش ولات اون تروا ديمونسيون !!!!
اما هاوينو نصيحه من خوكم ردو بالكم تنحيو المرايات سينون باش تشبعو شلابق و كفوف و باش تسمعو قمة التفنن في الالفاظ إلي ممنوعه حتى لمن هم دون 90 سنة
ملاحظه اخيره: التدوينه هاذي جات هكاك ع الطاير و ما خممتش فيها برشا اما اوحاتلي ب"أشيات" جاو فيبالي حبيت نتقاسمها مع صحابي

عندما يصبح الامل الرياضي بحمام سوسه النجم الرياضي بحمام سوسه

بون صحيح مازلت كيف قمت و بما اني يقعد عندي ديما هاك الحنين لإذاعة تونس الدولية (الآر تي سي إي) و إلي تو ولات تتبث حتى ع الساتليت دونك ما عادش محصوره في تونس برك و إنما حتى في اوروپا ينجمو يسمعوها (و لو شخصيا ما نتصورهاش) عاد هاوينو حطيت نسمع شويه خاطر ديما نقول ها الإذاعه تبقى محافظه على جانب من المصداقية...
ايا يا سيدي يا بن سيدك تو مدة نص ساعه لتالي معناها مع 13:30 كيف ما هو معروف فما اخبار ناطقه بلوغة موليار برا هاوينو نسمعو آش عندنا ما نعملو ايا جات اخبار السپور و لهنا مشى في بالي إلي انا مازلت راقد!!! المذيعه تخبّر على ماتش حمام سوسه و صفاقس إلي هي مقابله متقدمه باش تتلعب اليوم في حمام سوسه مع 14:30 لحقيقه لهنا تكونسيت خاطر خوكم الماتش تفرجت فيه البارح في الستاد زاده !! و ربحت فيه حمام سوسه واحد بشي و بالاماره إلي مركى البونتو محمد امين العويشاوي (ولد الصحافي ابراهيم العويشاوي)!!
قلت بالكشي اخبار البارح هاذي ؟؟ قعدت نتصنت ياخي المذيعه تخبر كيفاش سي سمير لعبيدي مشى اليوم الفجر يستقبل في عناصر منتخب كرة اليد!! تي شنيه لحكايه زاده !!! يا وخياني مخي وقف !! بعععععععععععععع ماينه وفى لحديث !!!
تي لا ما وفاش هو لا محاله تي هاو تسجيل و سايسو رواحكم م الدم الفاسد و السكر و التاي و كل الامراض المستعصيه الاخرى

إلي عندو اي شك في الحكايه انجم نبعثلو النشره إلي تعدات كامله

شنيه الحكايه؟ الجزء الثاني

حكينا في التدوينه إلي فاتت على بوادر الحمله على قناة نسمه و بدينا مع حكاية مسلسل بيت صدام (بالنسبه للي ما شافش التدوينه نزله ظريفه لهنا).
عاد هاوينو كيف ما قلنا و انو فما ناس قعدو واقفين في الدوره للقناة هاذي و بدى عاد الهزان و النفضان متاع برشا ناس تبارك الله عليهم وقت جا سيلڢيو بيرلسكوني لتونس و كيفاش كان ضيف في برنامج ناس نسمه(بالاماره الحلقه تعدات في رمضان) عاد هاوينو الناس في عوض يحكيو على كيفاش نسمه كان عندها سبق من نوعو و انهي اول مره تقدم رئيس دوله في مساحه حواريه بعيده ع الخطابات السياسيه و كيفاش زاده اول مره يقدمو رئيس دوله (او ما يعادله بما انو برلسكوني رئيس وزراء) و هو يحكي بلغه غير لوغتو. ابسط حاجه و انو قناة نسمه عداتلنا سياسي يحكي موش كي بعض المراحيم إلي ما تشوفو في التصاور كان و هو يتمتم ما غير صوت لين تولي تشك بإلي هو بكوش !!!
قلت عاد في عوض الناس هاذم ياخذو الميضوع من الناحيه إلي كنت نذكر فيها، خذاووه كيف ما راجت و عبرت كيف ما حبت ها العباره "الاستقواء بالاجنبي" يا وخياني منين يستنبطو فيهم ها الجمل متاع اللوح هاذم !!! قول انتي ياخي برلسكوني جايبينو باش يتدخللنا في امور البلاد ياخي ؟؟ تي ماهو جا يعمل في طله على تونس قالولو ايا تجي ؟؟ قاللهم ما فيها باس ولات استقواء بالاجنبي !! يا سيدي ميسالش خليها استقواء بالاجنبي مادام "الداخلي" مطفي العريبه الكل و ما تشوفو كان في الاخبار...
لحقيقه تعدات حكاية برلسكوني بشوشره اقل بياسر من شوشرة مسلسل صدام و ذلك لسببين ساهلين لا محاله:
اولهم و انو التوانسه في الوقت هاذاكا كانو لاهين في كروشهم و ما فماش برشا ناس تبعت نسمه و خاصة برنامج ناس نسمه خاطر كان يجي مع وقت المسلسلات إلي تتعدى في حنبعل و تونس سبعه
و السبب الثاني و هو انو حكاية الاستقواء ببرلسكوني جات مبشوله ياسر (دايور فما برشا توانسه ما يسمعوش بيه سمع)...
نجيو تو لحكاية سؤال الحلقه إلي الناس قريب يطيحو فيه الارواح و هو: هل انت مع او ضد العلاقات قبل الزواج؟؟
لهنا و هاذا شي ما يخفاش ع التوانسه و انو الانسان البسيط و خلينا بشويه تفاؤل نقولو و انو 60% ع الاقل ديما تخديم المخ يمشي للبلاصه المزيانه...
تو زعمه كيف يجيك واحد يقلك راني عملت علاقه آش معناها ؟؟ تعرف على وحده ؟؟ تي ماو بالعربي رقد معاها فما نبداوش نفلمو ع الناس و شوف كيفاش يغلطو في الراي العام و هاو بانت حقيقة قناة نسمه إلى غيرو م الشعارات إلي كسرولنا بيها البطاطا ...
بالنسبه للسؤال في حد ذاتو: الناس الكل تعرف و انو ها "الاشيات هاذي" (كيف ما يقول ابيّك الراجل) موجوده و الصغير يفهمها قبل الكبير ياخي علاش موضوع كيف يتلمو يحكيو عليه جماعه في قهوه ميسالش و كيف يتطرح قدام الناس الكل في التلفزه يولي عيب و احشم و ما يجيش ؟؟ يا اخي فيبالنا تعديناها ها المرحله تو موش كيف قبل !! قبل الشي هاذا ما كانش تو ما توعيش و ما تحسسشي الناس تمشي فيها بالبلاء إلي كل نهار طالعلك من شيره...
حاجه اخرى بالله: ياخي نسمه جات قتلك برا عيث فيها فساد و ما تفلت شي ؟؟ تي هو سؤال و تطرح انت مع و إلا ضد ؟؟ ما فيها شي الحكايه
نجيو تو لموضوع سوسن معالج: كيف ما قلت في احد تعاليقي ع التدوينه السابقه و انو العباره مش جديده بمعنى و انو عبارة "نص ميترو استيك في ڨلصونه" او في روايه اخرى بالڢيرسيون الجديده "نص ميترو استيك في كلصونو" وردت في قصيده ولات في الموروث الشعبي و كيف ما وردت في الاصل: بورڨيبه ربي يصونه نص ميترو استيك في ڨلصونه...
و في نفس القصيده: تحيا الكاف و إماليها و سيدي المتعمد ها بورڨيبه سيدي حني دني لينا بحر فيه الحوت و السردينه الخ الخ (هاذا مع تحياتنا لمنطقة الكاف و سكانها و كل شبر من تونسنا)
عاد الناس إلي تحكي ما تتقالش في تلفزه نعذرهم و نعطيهم الحق خاطر و الحق يقال فما ناس تبدى مع والديها القدر قد قد و اللعب لا. اما هاذا ما يمنعش زاده و انو صارت قبل في تلافز اخرى و انو كلمات زرفت و إلي هي في بعض المناطق كلمات خايبه ياسر و توحي بالجنس كيف كلمة "تتمنيك" إلي تعتبر كلمه قبيحه ياسر في الجنوب خاصة دونك حديثنا قياس نوليوش نعملو بث خاص لكل جهه باش ما فماش كلام يمكن تأويلو و هات من هاك اللاوي...
مختصر الحديث يعني و انو قد تكون سوسن معالج غلطت كيف استشهدت بالقصيده إلي حكينا عليها اما شخصيا ما نتصورش و انو كانت تقصد منها ايحاء جنسي جوست قالتها للجو (دايور الجمهور الحاضر شاخ عليها)
نجيو تو لحكايات بالرسمي معناها "الور لا" كسرولنا بيهم روسنا إلي هي حكايات قناة نسمه صهيونيه و تتلقى في تمويل اسرائيلي الخ الخ الخ ...
زعمه ها إلي يحكيو هكا عندهم دليل ملموس ع إلي يقولو فيه ؟؟ شاعرين برواحهم فاش قاعدين يقولو ؟؟
المشكل و انو فما برشا بهاليل قاعدين يصدقو اي حاجه قاعده تتكتب لا و اكثر من هكاك يوصل باش يولي يحاجج فيك و يردك انتي عميل و آش باش يسلكها عاد من هاك الكلام إلي ينفخ بعض الاعضاء...
لهنا نحب نستحضر كلمات كان قالهم بيڨ تراپ بوي و إلي صراحة تلخص الوضع الكل:"ممكن أن أتفهّم إنزعاج بعض "المحافظين" من برامج قناة نسمة، ولكن وصفها بالصهيونيّة فرد مرّة ظاهرلي مبالغ فيه شويّة باش ما نقولش حاجة أخرى، المرّة الجاية إلّي باش يحلّ كعبة دلاّع يلقاها ماسطة باش يعمللنا جروب على فايسبوك ويدعو للقضاء على الدلاّع الصهيوني.. ما هذا يا هؤلاء؟"
يا وخياني ها الجماعه إلي هبط عليهم التخونيج على حين غرّه هاذم آش كسرولي كرايمي آي آي آي ناس ولات تخاف حتى من رواحها شنوه ها الخنار !!!
تو بعد زوز تدوينات في الموضوع هاذا وصلنا لبيت القصيد و إلي هو: اي حد و اي هيكل عمرو ما تخلق باش يعجب الناس الكل قد يجلب بعض الناس و قد يتغشش عليه بعض الناس و يرفضوه و هاذا معقول بل اكثر من هكاك نقول و انو هاذا صحي و كيف ما يقول الفرنساوي: الاختلاف يخلق الثراء...
اما هاذي باش تجي تبدى تؤلّب في رأي عام على موضوع ما فهاذا من السخف بمكان معناها سيادتك وليت ولد كذا ع الناس باش تقوللهم تفرجو على هاذا و اخطاكم من هاذا ؟؟ عاد هاو ولات نوعيه جديده م الصنصره هاذي تي علاش نلومو على عمار ؟؟ آشنوه مشكلك انتي ما عجبكش إلي قاعد تتفرج فيه؟؟ هاو عندك حلين: اقعد دور لين تلقى حاجه تعجبك سينون إلي صنع التيليكوموند تفكرك بفلسه حلوه ياسر هاويني غالبا ما تكون ملونه بالاحمر

المقامة الجربوعية في هجاء أزلام الصهيونية

وصلتني البارح في الليل امخر رساله متاع المسمى "جربوع بالبيفيدوس المنعش" (حلوه التسميه و لو يلزمها برشا خيال باش تستنبطها) عاد خونا جربوع بالبيفيدوس المنعش بعثلنا مقامه على طريقة بديع الزمان الهمذاني عنونها "المقامة الجربوعية في هجاء أزلام الصهيونية" وطلب مني امكانية نشرها في المدونه متاعي و صراحة راهو ما عندي حتى مشكل باش ننشر نصوص للي يحب على شرط انو النص ما يتجاوزش حدود اللياقه إلي هي تبقى في الإخر مقياس نسبي...
دونك حبيت نشكر جربوع افندي بالبيفيدوس المنعش و هاذا نص المقامه كاملا:
كان يا مكان وسالف العصور والآوان، كان فمّا بلاد من البلدان، فيها سلطان ذكر وشعب جبان. وكان زادا فما كيان، تزرع ك السرطان في جسم الإنسان. كيان جابو المحتل ورحبوا به العربان الغربان.هآلكيان يعمل في عمايل يحشم منها الشيطان، يذبح في النساء والصغار ذبحان وما يروي عطشو كان دم العزّل رجال ونسوان، يتلذذ بالقتل والسحل وجريان الدم وديان.
هالكيان دمّر الديار وجرّف الأراضي وحاصر بني الإنسان. سرق الماء والأرض واحتلّ البلدان. جيشو متجبْر متوحّش كالحيوان. جيش وكيان في العالم مكروهين، من الأحرار والصادقين، والناس اللي تعرف العدالة وتحكم بالبراهين، إلاّ في بلاد العربان فإنهم غير ملومين، كل وين يحلّ ركبهم بيهم مرحّبين، وليلهم الراس موطّين راكعين خاشعين حكّام ومواطنين.
وخصوصا في بلاد السلطان، وين نادى الوزرة وحرّش الغزرة وقال حياتي ومالي لبني صهيون وأمن وأمان الكيان. جرات حاشية السلطان تطلب في الرضا والغفران، وتبوس في يد بني صهيون، تعقد في الإجتماعات السرّية وتستدعى في مجرمي الكيان للإجتماعات الأممية ووزراء الكيان لزيارة بلاد الحنّة والرمان ومواطني الكيان لزيارة المعابد وتقديم القربان تحت حماية جند السلطان وبفلوس الشعب الجربان.

??شنيه الحكاية

الحكايه مش جديده و بما انو احنا في تونس استانسنا و انو كل حاجه جديده (ولو تكون باهيه و تصلح) لازم نعطيوها متاعها و نوكلوها ما اكل الطبل يوم العيد...
قلت مش جديده على خاطر و على حسب ما نتذكر بدات مع مسلسل "بيت صدام" نتفكرو الناس الكل الضجه إلي صارت وقتها ع القناة و قضايا في المحاكم و ناس عروقاتها شرتلّه لسبب وحيد "كيفاش تعديو مسلسل استهزأ باحد اعظم القياديين العرب؟؟" (لهنا هاو نحل قوس و نقول ما فهمتش تو ثبتولنا رواحكم صدام بطل و إلا ديكتاتور؟؟ مره يتذكرو آش عمل في الشيعه و كل حد سولتلو نفسو باش يقول لا... و مره كيفاش كان هو رمز الصمود وين قال للاماريكان لا حلال عليه حرام عليهم !!!)
نرجع عاد وين كنت قلت كانت ضجه كبيره ياسر حول بث المسلسل تقولش عليها نسمه هي إلي انتجت ها الاربعه حلقات!!!
من شيره اخرى سمعت برشا كلام حول انو المسلسل عطى فكره خايبه و مس العرب في برشا نقاط سلبيه فيا حبذا لو كان حد يوضحلي ها النقطه هاذي خاطر فيبالي السيناريو تكتب بالاعتماد على وثائق و شهادات متاع ناس واكبت "العايله المالكه" (بون العراقيه) في الحقبه هاذيكي و زيد انتاج البي بي سي ناس يعرفو آش يعملو !!!
فمعناها سمعت برشا كلمات طايشين استهزاء...تزييف حقائق...محاولة تغيير التاريخ... إلى غيرو من العبارات إلي نتصور جل الناس سمعوها.....
لهنا نحب نوقف و نسأل روحي كمواطن عربي(ما ينجمش ينحي خشمو من وجهو) زعمه وضعيتنا كعرب سياسيا و اقتصاديا و إلي تحب تسمي سمي زعمه وضعيتنا باهيه ؟؟؟ مشرفه ؟؟؟ شنوه محلنا م الاعراب في مصاف الشعوب و الدول؟؟ إذا كان باش نجاوب و نقول و انو سمعتنا "في الحضيض" يولي من البلاده(في معناها الفقهي) باش نقول و انو المسلسل اساء للعرب
و إذا كان باش نقول إلي احنا شعب عربي و باهي و هات من هاك الشعارات إلي تتقال في اخبار الثمنيه متاع الليل نوليو نقولو انو نكذبو على رواحنا و اي حد يدعي العكس هات يعطينا نشوفو...
فهاذايا باب و نسكروه متاع اساء للعرب.
نرجع تو للمسلسل إلي تصور منو 90% منو في تونس و نحب نأكد على النقطه هاذي بالذات.
ياخي زعمه الفنانين التوانسه إلي شدو الصف باش ياخذو "دويور" في المسلسل مش دور !! زعمه ما يفهموش ؟؟ هوما عرب من نوع خاص ؟؟ (للامانه احسن دور تعطى لفؤاد ليتيّم هاك الولد إلي يعمل في الشيطان في ناس نسمه للي يتبع ناس نسمه عطاوه دور وزير و ضهر في ما مجموعو دقيقتين على اربعه سوايع) ما نحكيوش عاد على منافس جاد المالح إلي نهار الكل و هو يبص علينا و الدور العزيز الغالي إلي عملو(م التجلطيم متاعو ولى يتجلطم على نصر الدين لين خرجلو اليوم ع الموزاييك و عطاه برجو)
ايه تو كي المسلسل تصور في تونس و مثلو فيه توانسه و لو ادوار بسيطه (وديما على افتراض انو المسلسل اساء للعرب) ماو فما رقابه في وزارة الثقافه و تصاريح و ڢيزا باش الناس تصور و إلا زعمه عمار وزارة الثقافه عندو فلسفه مغايره لعمار حبيبنا إلي نعرفوه ؟؟
زعمه الممثلين كيف قراو السيناريو عجبهم و بعد بطلو ؟؟
باختصار شديد التوانسه وقتاش ولّى المسلسل مش باهي عندهم: وقت عداتو نسمه في مرحله اولى و في مرحله ثانيه و هاذا جوهر الموضوع هو الممثل العالمي إلي قام بتجسيد دور صدام إلي هو إيڨال ناعور الإسرائيلي الجنسيه فكل الشوشره إلي تم إحداثها م الاول سببها ما كانش المسلسل في حد ذاتو و إنما الممثل هاذا بالذات و لهنا باش نسأل و نقول علاش التوانسه تشكاو م المسلسل كان في الصيف لخراني وقت هو المسلسل هبط في البي بي سي و ع الانترنات عندو اكثر من عامين؟؟ السبب كيف ما قلت و هو انو كيف ما نعرفو احنا التوانسه نموتو على بعضنا و نحبو بعضنا ديجا كان تلقى واحد يخدم راهو فما وراه عشره يمقصو فيه و يحطولو العصا في العجله و حديثنا قياس كيف تعمد بعض الصحفيين و منهم واحد (ظلفاوي هو تو) باش يتركزو على القضيه الفلسطينيه و الناس إلي عندهم حساسيه للموضوع هاذا علاش ؟؟ لتو نسأل و ما لقيتش جواب !!!
من غادي عاد بدات حكاية نسمه صهيونيه (لوغه جديده هاذي تشوف حد ما عندكش نفس النظره متاعو قلو يا صهيوني!!).
مسلسل الاستهداف هاذا متاع القناة الفتيّه هاذي تواصل كيف ما باش نشوفو في التدوينه الجايه و ملاحظه بسيطه بربي لو كان تسمحو خاصة للناس إلي اول مره تقرالي: انا تونسي و مسلم و حتى حد ما ينجم ينزع مني ها الحاجتين فبالله اخطاونا من لوغة يا عميل يا صهيوني و ما لف لف من الشقاشق اللفظية الجوفاء من هذا النحو...
نتقابلو في التدوينه الجايه ان شاء الله