السلام عليكم
قبل ما نحكي في موضوع اليوم فمه شويه ملاحظات ريتها و المتعلقه بالتدوينه لخرانيّه متاع ناقصات عقل و دين:
اول حاجه فوجئت بصراحه بالجدل الواسع إلي احدثتو التدوينه هاذي في البلوڨسفار و النقاش و الجدال الواسع النطاق إلي صار في برشا مدونات كيف مدونة الزميل العايش م المرسى و الزميل قصه اون لاين و الزميل الغول و غيرهم و غيرهم اما بصراحه إلي ما عجبنيش هوما بعض التعاليق إلي لا تغني و لا تسمن من جوع على غرار بعض التعاليق إلي تكتبت عند العايش ردود متاع فروخ ماهو كان عندك رأي اعطيه سينون سكّر جلغتك !!! بون لاحظت زاده انو فما ناس تقبل النقاش و عندها صدر رحب باش يقبلو النقاش في مثل ها المواضيع و تبقى هاذا الهدف الاول و الاخير لا محاله
نجيو اليوم لتدوينة اليوم:
مدة 4 و إلا 5 ايام تفرجت على فيلم تنسب انّو تونسي عاد و انا نقرا ف الپريزونتاسيون نلقى فيلم فرونكوتونسي قلت يا هشوش كيفاش ها الفيلم ما تعرفوش برا تيليشارجيه و تحيا الزوز ميڨا إلي عندك
الفيلم كان تصح الترجمه متاعو اسمو غناية العروسه او غناية العرايس
نبدى قبل كل شي بالعام المخرجه اسمها كارين البو و حسب ما لوجت فهمت و انهي مخرجه و ممثله يهوديه تصورت انهي تونسية الاصل كيف غاليه لاكروا او ما شابه لاكن فوجئت بعكس ذلك مواطنه فرنساويه ملخص الفيلم انو في تونس العاصمه سنه 42 كان فما زوز بنات جيران و اصحاب وحده يهوديه و وحده مسلمه و كيفاش كانت الجاليه اليهوديه كانت منفوره م المسلمين ف الوقت هاذاكا و بعدو زاده و مكروهه و كيفاش نور (الطفله المسلمه) مورست عليها ضغوطات باش ما عادش تكلم صاحبتها مريم (الطفله اليهوديه) اي كاينو الفيلم ولّى نوعا ما نسخه عربيه "متونسه" لفيلم روبرتو بينيني "لاڢي اي بال" ...
من بين ما تناول الفيلم زاده قضية العرس و المغامرات الجنسيه للبنيات هاذم قبل العرس
اداء الشخصيات خاصة مريم نور و تيتي في ما يخص اللهجه او اللوغه التونسيه (هكه اصح) كان مايع ياسر و ضاهرين يتكلمو بالسيف دونك فما مشكل ف الكاستينڨ اما ممكن كنت نعذر المخرجه في خصوص النقطه هاذي بحكم انو فما مشاهد من شبه المستحيل انو ممثلين توانسه يمثلوهم مثلا فمه 3 مقاطع طوال نسبيا تمثلو في الحمام بما في ذلك العرا المنجر عليه و حفلة تنقيه متاع عروسه (مع ابراز *** الطفله مريم و هوما ينقيولها فيه) بصراحه مشهد كيما هاذا ما ريتو كان في ها الفيلم و كان تتفرجو في الفيلم ممكن اتاو تتأكدو إلي بصراحه تصورت انو خرجو بيه م الجرأه للإباحيه اون كالك سورت
الحاجه الثانيه ماشي فيبالي كيف باش تمثل بطفله عريانه يلزم ع الاقل عمرها يكون 18 سنه (وهاذا إلي ما توفرش في البنيه اولامپ بورڢال بحكم انو عمرها 16 وقت التصوير) هاذا ما يمنعش انو البنيات سخسيا عجبوني (فيزيكمون مزيانات)

نجيو تو للمحور الرئيسي في الفيلم و هو ازدراء المسلمين التوانسه لليهود التوانسه
بون كيف نسمع حاجه كيف ما هكه في فيلم نقول المخرجه تونسيه إلي هو موش صحيح على حد علمي هاذا من جيهه
من جيهه اخرى شكون قاللها إلي ها الوضعيه توجدت في تونس ؟؟ كانك على قبل فما برشا يهود الناس الكل حبتهم و باش يبقاو يحبوهم كيما الشيخ العفريت و راوول جورنو و جورج عده و غيرهم و كان تحب تحكي ع الحاضر انجم نقدملها شهاده من عندي بحكم عشت في حومة باب بحر في سوسه و بالنسبه للي ما يعرفهاش فما برشا يهود توانسه و يتغششو كيف ما تقوللهمش توانسه نتفكر مثلا تربيت مع ميكو و پاسكال و غيرهم و ما كانش ها الريق ياكل و نتفكر زاده تاتا مريم الله يرحمها كيفاش كانت تهزنا للسينما و تفرح بينا برشا كيف نجيوها بحذا ميكو و العكس بالعكس ...
دونك ها الميضوع إلي جايبتو مادام البو (وإلي هي بيدها مثلت دور تيتي) ظاهر لابس شورت (ما عندوش الحق يدخل للإداره و للجامع زاده ههههههه) نحب نعرف جوست شنيه مرجعياتها باش تستصدر مثل ها الاحكام على حكايه لا عاشتها و لا تعرفها شنيه
ياخي منين جانا كره اليهود احنا ؟؟ اخطانا من حكاية فلسطين ياخي اليهود الكل صهيونيين ؟؟ ممكن فمه شكون يخمم هكا اما انا مانيش نحكي ع المرضى المتأثرين بشوية رڨّاصه شيوخ متاع تلافز ...
نحب نقول زاده انو في ها الحاله هاذي تنتفي صفه فيلم تونسي (لا مخرج لا پروديكسيون) باستثناء المكان و 3 و إلا هوما 4 ممثلين توانسه بالحساب
بصراحه ما فهمتش كيفاش هاذا فيلم تونسي و كان فمه شكون فهم يفهمني بربي !!
الفيلم تنجمو تتيليشارجيوه من هنا بالنسبه للي مازال ما شافوش و كي العاده نستنّى تعاليقكم حول مسألة ازدراء الاديان في تونس و الفيلم زاده ...
سلام عليكم