معمل فارينه جديد يضاف إلى المجتمع المدوّنوتي

ايا صباح الخير
مدة 3 و إلاّ 4 ايام لتالي اكتشفت مصنع جديد متاع هاك الفارينه التونسيه 100% او ما يعبّر عنه بلهجة المشرق بالطحين العربي الطبيعي...
في الحقيقه ها النوع متاع الفارينه او نرمال خلينا نقولوها متاع الطحين خاطينا خاطر التونسي الصحيح عمرو ما كان طحان غير هاوينو فمّه برشه ممّن تسّوللهم انفسهم الرخيصه باش يعملو تصفيقتين فمّاش ما يدبّرو عضيّم يمشمشوه(اما مع بن خرا و اتباعه كان فمّا حاجه تنجم تعوّل منها راهي الوعود و امشط شعرك اتاو نرجعلك و ملفك مازال ما حضرش اما كان شديت صحيح معاهم فمّا الطوابق التحت ارضيّه ف شارع الحبيب بورڨيبه تولّي تعملّّك اپال وقتها...)
ايا قلت عاد و انا كي العاده نبربش طحت بمدوّنه متاع وحيّد ما شاء الله مسمّي المدّنه متاعو تونسي و افتخر (من قوّة العام يا بوڨلب !!!) شخصيا نتمنى لو كان جا يقرى ف التدوينه هاذي باش نقلّو انّو التوانسه ما يتشرفوش بمثل ها الحشرات إلّي كيفك عاد كمّلت نتبّع و نتفرّج في ها المسرحيّه نلقى الرّاجل لا محاله اسم على مسمّى تو باش تقولو شبيه الهشوش بدا يهز و يصبط لا ابدا
الراجل اسمو نوفل المصري(ايه نعم نوفل بما يحمله الإسم من معاني في الموروث التونسي ههههه)
اما المصري نسبة للتصرفيڨ (سخسيّا كان نصرفڨ على حد كيف ها الجميّعه اتاو يديّا يشكيو بيّا لعمّك بنكي مون !!! ههههههه)
عاد دخلت باش نشوف الپروفيل الكامل متاع صحيّبنا: قالّك متخرّج م الاكادميّه السياسيه متاع التجمع الدستوري الديمقراتي (بالتاء) و منسّق جهوي للحوار مع الشباب انا ما نعرفش اناهو الشباب إلي تحاورو معاه لين وليت نشك في انّي ننتمي لسلك الشيّاب !! عمري ما ريت قالّك حوار مع الشباب في الوتلا و مؤتمرات علاه توا الشباب إلي قاعد يقاسي تي ساعات تهزو و تنفضو ما تخرجش منو الفين فرنك باش يجيك لوتيل ؟؟
تي ماك انتي امشيلو و اسمعو !!(اذا كان حبيت تسمعو بالرسمي مش متاع تفرجو عليّا راني باهي ....)
نكملو عاد مع ها المدونه الفريده من نوعها الحاصل عينيك يوجعوك م العبارات الشعشاعه كيما "القياده الحكيمه" و الاّ "الديبلوماسيه الوقائيه" و نزيدكم زاده "المفاهيم الجديدة في الخطاب السياسي للتحول" ابّب ابّب !!
لحقيقه ما فهمتش منين خارج ها العفّاط و شنوّه ها الكلام الاجوف !!!
م الإخر نحب نستدعاكم تعملو تكحيله على المدونه متاع صحيّبنا جوست باش الواحد ينحّي على قلبو خمجه كيف ما قالت الزميله بنت عايله
انزل لهنا و شوف العجايب
ايا بخاطركم و هاني نستنّى في تعاليقكم

الكذب المفلّق تضرب الكوز يقعد الزيت معلّق

ايا على سلامتكم
لحقيقه نحب كيف العاده نشكركم ع التفاعل مع التدوينه لخرانيه اما الله غالب مازال فمه شكون ما فهمنيش (لا محاله قاعد يقرى هو تو في التدوينه هاذي ههههه)
ايا ما يعننيناش
البارح و كيف ما سمعنا الناس الكل احتفلت بلادنا باليوم الوطني للجمعيات و كي العاده سي وخينا حط قدامو كيما في كل مناسبه كمشه من هاك الجماعه إلي كل دقيقه و 46 ثانيه يقومو يصفقو و بدا اش قلك اش قتلك يخطب عليهم ...
لحقيقه ماو تتقال خطبه تركب 66 كيف سيرتو كيف يبدى يجبد فيها صحري و بحري: يقول القايل هو يوم الجمعيات اش دخل الإنتخابات و اش دخل بلڨاسم الشابي و اش دخل الشيخ بن عاشور ؟؟
و الله كيف تجبد الشباب انقولو تتعدّى مع عصره قارص اما يطيح يجبد ع المرا في تونس و على القيروان عاصمه ثقافيه الشي هاذا نسميه كلام مجبود م الحيط هكاك لا إحّم لا دستور !!!
تي برّا مش مشكل الضرب يا بوڨلب في الاوسمه و الدروع و الجوائز إلي قال شنوه كرموه بيهم و نبداو عاد:
* درع الشبكه العالميه للتنميه و البيئه منين جاتنا البيئه الله اعلم (م الإخر إلي يفهمنا كيفاش ها الحكايه عندو كرهبه تخدم بالڨازوز)
*درع إتحاد المحامين العرب: قالك لمساهمة تونس الفعاله في النهوض بمهنه المحاماة ايه مالا تمشيش تقول إلي صارت مشاكل بين وزارة العدل و نقابة المحامين في تونس و الإعتصام إلي صار في قصر العداله في تونس العاصمه الخ الخ الخ ...
*اما هاذي و إلي قالتلهم اسكتو: درع الفيدراليه المتوسطيه لجمعيات الانترنات قالك مساهمه فعاله لتطوير القطاع في تونس اما للي نساو نحب نذكر برك كيفاش الراپيدشار سكّر 3 شهور و الفايسبوك تصنصر تقريبا نفس المده و رجعو من بعد الزوز و تسكيرة اليوتيوب و الدايليموشين و هات من سيتات الڢيديوات ... هاذا بالطبيعه كان ما نحبوش نحكيو ع المدونات إلي قاعده تتسكر كل يوم لين ولّى المسكر اكثر من محلول !!!
دونك مجمل القول البارح و انا واقف في المحطه نستنى في الكار و نسمع في الراديون من تليفوني شخت ضحك و الناس تتفرج عليا يحسايبوني مهبول اما يرحمك يا پاپا في هاك الكلمه إلي كنت تقولهالي و انا صغير: الكذب المفلّق تضرب الكوز يقعد الزيت معلّق !!!
ايا انستو

ايا ع السلامه
قبل ما نبدى نحب نشكركم ع التفاعل معايا بخصوص التدوينتين لخرانين و خاصة تدوينة يبكي الهشوش ع الظروف إلي ضحكت البعض و خوفت او فجعت البعض الاخر كان نجمنا نقولو ... لذا حبيت نزيد نوضح انو في المدونه متاعي ما نكتب كان افكاري المقتنع بيها إلي صحيح في بعض الاوقات فيها شويه هبله اما كيف ما ديما نقول كان ما جاتش فمه الهبله (و مش الهبال) راهو ما فماش ابتكار في الدنيا
من شيره اخرى نحب نأكّد انّو الافكار إلي نقولها ما تلزم كان شخصي المنحط اما اذا فمه شكون منكم تبنّاها تبقى بالطبيعه حريتو ...
ايا ندخلو في صلب الميضوع:
اليوم حبيت نحكي على ظاهرة الفايسبوك و التونسي و بعض لحويجات إلي برشا م الاصدقاء ما يردوش بالهم منها
من ذلك(قداش تفكرني ها العباره بمستوى الكثير م الزملاء في مواضيع الإنشاء في الليسي ههه!!) انو برشا خاصة م الذكور و إلي واقفتلهم في ضهرهم انهم عاملين من ها الفايسبوك وسيله لتفريغ قال الراجل طرف الليبيدو الزايده ياسر باش يشوف شويه بنيّات هاوينو يشلل فيهم عينيه و كان جات حويجه اخرى متاع سبت عشيه و إلاّ حاجه كيما هكاكه ما فيها باس (سامحوني ع المفردات اما حبيت ننقل الصوره كيما هيا بنفس المفردات الي يستعملوها الناس هاذم)
عاد قلت انو فمه برشا ما يردوش بالهم انو في اغلب الاوقات ها البنيات هاذم ما يكونوش فعلا هوما إلي في التصاور اما يكونو من جماعة الآتي إي ربي يكثر منهم الناس و الغايه معروفه بالطبيعه هي انو باش يحصرو جل الشباب التونسي و فين يكمن مركز اهتماماتهم زاده تفسيد الڨروپات الخاصه ...
من شيره اخرى من خلال متابعتي اليوميه لها الشبكه العالميه لاحظت بااااااااارشا انحطاط في مستوى برشا محاورات من قبيل م الحزام لوطا و كيف ما باش تشوفو في التصاور (سامحوني لبنات إلي يقراو ف التدوينه اما شي يلزمو يتشاف حسب رأيي) عاد هاوينو بشويه طرق ملتويه نجمت نجيب بعض التصاور متاع هويات مزيفه و إلي نڨزو عليها الذكوره ب كلام مصلي ع النبي يقطر بالعسل
لا محاله انا وضحت انو ساعات كيف تغزر للپروفيل تفهم انو ما فيه حتى بعلاقه ببعضو فمثلا اش دخل جامعة حلوان في مصر بالمنتخب التونسي ؟؟ و هات من هاك اللاّوي ...
نبداو بالتصويره لولا

تفرج الطفله تبارك الله عليها زين و عين تقول عمرها 30 محطوطه من عام 92 اما القوه الكل في انهي تقرا في الجامعه دونك بشويه لوجيك و ما غير ما يترما الواحد باش يكحّل عليها ينجم يفهم انو فيها واو لحكايه ...
بالنسبه ل التصويره الثانيه بصراحه نحشم انا كيف نشوف وحدي حاجه كيف هكه !!
بدون تعليق

التصويره الثالثه ميساجات متبادله بين طفل و طفله و تلاحظو مستوى الحوار الرفيع (كان التصيره صغيره كليكي عليها اتاو تكبر)


التصويره لخرانيه متاع تدوينة اليوم حطيتها باش نوري كيفاش التونسي الشاب انتفات منّو المرجعيّه تفرج من اية الكرسي للجنس في تونس من تصويرة مصحف قرآن لتصويرة كوپل في پوزوسيون 69 شي يقابل بعضو ياااااااااسر


في الإخر نحب نسمع آرائكم كيف العاده اما ماذابيا نقراهم تحت التدوينه باش هكاكه الناس الكل تنجم تشارك في التفاعل مع التدوينه
يا حبذا زاده نسمع شنوه فهمتو و خاصة شنوه ما فهمتوش
ايا في وديعة ربي

ثقافة فردة الصباط عند الشباب التونسي

صباح الخير
اليوم نحب نحكي على بعض المضايقات بين ظفرين كان انّجمو نقولو انّها مضايقات
لحقيقه نحب نبدى بحادثه ظريفه صارتلي هاوينو انا نحكي مع واحد من معارفي ايا مجبود حديث قتلو باش نمشي للكونسار متاع انور براهم نهار السبت إلي باش يتعمل في وتيل البارشيلو
لحد لهنا كل شي معقول اما إلي خلاني قال الراجل مستكونسي كيف قالي "تو مغروم بالافلام و فهمناها مغروم بالمسرحيات التونسيه و فهمناها اما مغروم بانور براهم هاذي ما تدخلش للمخ !!!"
و الله ريتها غريبه لحكايه إلي قالهالي لكن بعد تنجم تقول اني نجمت نقرّب علاش قال هكاكه
صحيح انا سپورتيف و نمارس في نشاط رياضي و صحيح ف الانفورماتيك يديا ما تركحش و صحيح انو مغروم بالسينما و انواع متاع موسيقى مش معروفه ياسر اما وين الإشكال ؟؟
يا سيدي في تونس ستانسنا انو الواحد كانو سپورتيف ما يتلها كان بدومانو تقول عليه ما يشوف في دنيتو كان الرياضه إلي يمارس فيها (خذيت سپوتيف كمثال و بالقياس تنجم تركب على اي امثله اخرى)
لحقيقه انا ما ندّعيش انّي حكيم زماني اما سبحان الله جيت هكاكه نحب الحاجه الفينو و المزيانه سيرتو كيف تبدى مخدومه بإحساس كبير كيما انور براهم و ياني و انيڨما كيني جي و غيرهم
دونك تالمون الناس ستانست بپروتوتيپ متاع شخصيات و تركيبه غير متوازنه و مختلّه (في التركيب) لدرجة انو ها الپروتوتيپ ولاّ هو الاساس و إلّي يجي غير هاذا هو "الموش نرمال" و ساعات مهبول (كيف ما تقالتلي)
في الحقيقه انا ما يهمنيش الناس اش تحكي اما إلي يهمني انا باش مقتنع و شنوه إلّي نراه على خاطرني نأمّن بانّو الواحد مناّ كان ما تكونش شخصيتو مركبه من ناحية تعدد الميولات صعيب ياسر كان باش يعمل حاجه في حياتو ...
يا سيدي لواه نمشيو لبعيد ساعات و انا نبدى واقف مع زملائي في الانستيتو إلي نقرا فيها يتجبد موضوع م المواضيع و تواتي باش نعطي رايي و نستشهد بالكاتب الفلاني في الكتاب العلاّني مع مرور الوقت و في اغلب الحالات تي حتى كان نجبد اسم كاتب و الاّ كتاب م الحيط ما يفيق بيّا حد تالمون الجينيراسيون إلي توجدت انا فيها ما عادش الناس تقرا فيها كتب !!!
لا و الاغرب من هاذا يجي يقلي "تو هاكا حد نيتك تقرا في الكتب ؟؟ مازالت الناس متاع كتب؟؟ تي شبيك تڨول عليك خارج م اليونان القديمه !!!(هههههههههههههه)"
اش تحب تحكي معاه براس امّك !!!
وفمّا ناس اخرى تولي تغزرلك على اساس انك متثقف و "طيب" و هاذا زاده لكستريميتي لخرى و و و ...
بغض النظر على الإيديولوجيات (ستّار عليك !!! هههه) المذكوره الفوق مش معنتها ما عادش فمه ناس تقرى الكتب و إلاّّّّ تمشي للسينما لا بالعكس فمه اما انا نراهم ولاّو لحقيقه قلّه و لحديث ولاّ يدور على شاكلة: "شفت كوثر الباردي كيفاش نقصت في صدرها ؟؟ ريت الروبه إلي عملت بيها نجوى كرم لكليپ لخراني متاعها ؟؟ ريت الجوار الفلتاني بشكون عرّس ؟؟" و هلمّ كركر و إلاّ حتى جرّا و إلاّ رفعا كان تحب
دونك اش دخل سمايا فيهم انا ينقّصو و إلاّ يزيدو يلبسو و إلاّ يعرسو ؟؟ ياخي شبيهم ماهمش عباد ما عندهمش الحق في شويه انتيميتي ؟؟؟
في الإخر نحب نقول انو ها المدونه هاذي و الافكار إلي فيها مش بالضروره انهي تكون صحيحه فهي تعبّر عن رأي شخصي قد يكون ذاتي في بعض الاحيان و قد يكون موضوعي في بعض الاحيان و هي تعبر عن رأيي السخسي (قال الراجل) و لا تلزم احدا غيري
بون لعشيه نمشي لتونس و الليله نحضر حفلة انور براهم و بقدرة ربي اتاو نحكيو فيها الحفله
ربي معاكم

!!! يبكي الهشوش ع العلوش

ايا على سلامتكم
البارح و كيما تعرف الناس الكل كان نهار 6 افريل...
ايا قمت كيما كل نهار اثنين مع حكاية التسعه غير ربع باش نمشي نقرى
ايا و انا نغسل في وجهي ثبتت نلقى إلي عينيا لونهم اخضر و بالنسبه للي ما يعرفنيش مليح عينيا مارون و ساعات يعطيو ع الاخضر و يخضارو كي يبدى عندي احساس مفرط يا إما بالفرحه و إلا بالغس و إلا بالحزن ايا ثبتت كيما قلت في عينيا و قلت يا ربي تستر و تعدي ها النهار سلامات !!!
ايا خرجت م الدويره و و قفت "ماشي في بالي" باش ناخو الكار ايا اتاو تجي اتاو تجي ما جاتش...
قلت ماعليناش نمشي نتمشى شويه اتاو ناخو الكار متاع الحومه لخرى ايا بديت نتمشى و ريحة الكت ما فماش و هو لا محاله الدنيا فارغه تقول نهار احد !!! لحقيقه جاتني غريبه شويه ها االهدره كيفاش الدنيا فارغه و ما فماش كيران ...
ايا و انا واقف في المحطه متاع كار الحومه لخرى جات طفله قرات معايا قبل سلمنا على بعضنا و قلتلها يا خي شبيها الكار بطات؟؟
تلفتت و قتلي "ياخي ما فيبالكش؟؟" قلتلها انشاء الله خير ؟؟
قاتلي ماهو هاك إلي ما يتسمى مشى للمستير
ايه ماو لاباس اش هز سماه للمستير ؟؟
ماهو اليوم ذكرى وفاة المجاهد الاكبر !!!
آآآآه صحيح نسيتها جمله لحكايه !!!!
ايه و اش دخّل الكار في هاذا الكل ؟؟
ماهو هزو الكيران للمستير باش يلمو فيهم الصرفاڨه و الصرفاڨات !!!
ايه وجلّين بيهم (ههههههههههه)
ايا يا سيدي شميتها ڨارصه لقفت روحي و خذيت لواج و انا اش باش نحكيلكم لا خليتلو جنب يتّكا عليه و بيني و بين روحي نخمم اش انجم نعمل كان ما نخلطش على الصيونص !!!
الحاصل خلطت و عروڨاتي شرتلّه و إلي بيه الفايده دخلت للكلاس
وقتها عرفت علاش لون عينيّا صبح اخضر !!! (ممكن ياسر يقولو منين جايبها ها الحكايه اما راهو بالرسمي تصيرلي م إلي انا صغير!! بون الناس إلي قراب مني و يقراو توا ممكن يقولو صحيح)
تي هيا ما يعنيناش كملت قريت و جا وقت المرواح هيا مشيت للمحطه كي الرجّال ماشي في نيتي باش نلقى كار و انروّح حاشاكم نلقى .... (ايا سيّب علينا منها) هاني نستنى و برّا لا كيفاش تبقى هي البلاد بلا كيران ؟؟ حتى انت قداش تهز و تسبط يا هشوش !!!
ايا درجين ربع ساعه نص ساعه ساعه غير ربع و اخيرا جات ست الحسن و الكمال و هي اش باش نحكيلكم فااااااااااارغه تمشيوش تقولو فيها التلامذه إلي خرجو نص النهار و إلا حاجه لا بل الكل (وقتها ماضي ساعه و نص) ستر ربي ما جيتش تلميذ و إلا راني !!!!!!!
ايا خلطت للدار و الدنيا سخونه تشوي و انا لابس الكلّي في الاكحل تقول متشمت في روحي في ها النهار الكلب !!
عرضتني امي هيا ايجا افطر عيش ولدي؟؟
اش من فطور بالله !!!
هو يلم الناس باش يصفقولو في المستير و يزغردولو في وضنيه و انا يتعدى عليا نهار كلب
تي شبيك يا وليدي ما فهمت منك شي ؟؟ علاشكون تحكي ؟؟
على سي بن خرا !!! لا يزي زعّك الراجل من بلاصتو و كي مات روّح بيه في طياره بالشماته اسمها 7 نوفمبر و زيد تو ماشي سوا ديزون يحيي في ذكراه !!!
والله دنيا !! هاذا إلي يقلك يقتل الراجل و يمشي في زنازتو !!
و الناس بالله إلي ماشين يعيطو" يحيا يحيا" ما يخدموش ؟؟ ما عندهم ما يعملو ؟؟ و الاقوى م الكل تقولش جايبينهم م الساحل ع الاقل !! لا هاو باجه هاو الكاف هاو القروان ها ڨفصه !! (الولايات إلي ذكرتهم نحبهم برشه و كي قلتهم مش محقرانيه و إلا حاجه اخرى ابدا) و هذا الكل باش يقولو كلمتين لسي بن خرا و هو تقول ما يعرفش إلي الناس فدّت من فوڨيرتو و ما عادش يطيقو كان إلي عندو مصلحه !!
تي إلي بيه الفايده الزنازه حاميه و الميت كلب (مانيش نحكي على حبيب الامه!!)جاي من طرف الدنيا باش يرمي بوكي نوار و يروح !!! قمة قلة الحياء معنتها !!!
إلي بيه الفايده و إلي حبيت نعديه عبر ها المدونه مش اني باش ندخل في سيادة الرئيس (حفظه الله و ابقاه ذخرا لنا !!! ههه) اما جوست حبيت نورّي كيفاش على جال واحد برك تتعطل 7 و إلا 8 ولايات خاصة بعد ما سمعت إلي بارشا جامعات قالو للطلبه "براو روحو الزين في المستير" مالنا و مالو في المستير و إلا في ضبوط الڨرده !!! ما نقراش ع روحي ؟؟
في الاخر نحب نشكركم كيفاش تحملتو و قريت للاخر ها المدونه و كيما صبرتو معايا ربي يعطينا و يعطيكم القوه باش نصبرو على حوايج اخرى انا كان ما كتبتش ها المدونه اليوم راهو درا اش صار فيا و ممكن ياسر راني متت بالغلبه !!!
يحيا بن علي 2014 و تفووووووووووه عليا كان نجي عبد
!!!!!!!!!!!!!!!

حلال/حرام؟؟؟

ايا ع السلامة
الموضوع إلّي باش نحكي فيه اليوم عندي قرابة الاربعة ايام نحب نكتبو اما تالمون غششني پلو او موان كي ما يقولو لفرانسيس ما حبيتش نكتبو و انا متغشش خاطر فمه بعض لصحاب قالولي ما عادش تكتب و انتي متغشش باش ما يخرجش مقال كيما مقال بوتلّيس الّي موجود لوطا في بقية البلوڨ بون ملاحظة تقبلتها و درستها و ريت انو تنجم تكون في بلاصتها هاذاكا علاش خذيت بيها ...
نجيو لموضوعنا متاع المره هاذي:
و انا ندور ع الانترنات و بالضبط ع الفايسبوك استفزني مقال مقتطف من مجله م المجلات العربيه هاك الي تقول انتي متاع زوز صوردي
عاد في ها المقتطف فما كيما تقول انتي استشارات دينيه يطرحوها قرّاء المجله و يجاوب عليها فضيله شيخ فقيه ربي يحفضو (اما انشاء الله ما يحفضلوش الطريقه الي يفتي بيها...)
عاد قلت هاو نحط شويه مقاطع و نعلق عليهم و تزيدو تعلقو انتوما باش يصير كيما قال الراجل تلاقح و تبادل في وجهات النظر (ههههههههه):

س:فضيلة الشيخ، أنا شاب ملتزم، وجاءتني فرصة للسفرعلى متن طائرة تحلق فوق بلاد الكفار، وتحتها بيوت يشرب أهلها الخمر ويمارسون الفحشاء، فهل أنا في هذه الحلة مذنب؟
ج: عليك يابني أن تتحدث مع الكابتن طيار وتطلب منه أن يتجنب الطيران فوق بلاد الكفار، وإذا كان مُضطرا فعليه أن يحاول الطيران فوق تجمعات المسلمين وهذه طريقة سهلة، فمآذن المساجد مرتفعة، ويمكن أن تكون دليلا للطيران الشرعي الحلال.
===> بون سمعت ب لابال حلال في اللحم و شويه پرودويات اخرين اما حلال في الطيران هاذي هي الجديدة ماو يقلك قد ما تعيش و تتعلم اما عل الحساب الواحد لوروپ و الا امريكيا و الا غيرهم ماهوش معفسهم لين يموت !!!
*********************************
س: أنا مسلم تقي، وأحب السباحة لكنني أخشى أن أسبح في مكان
تكون قد سبحت فيه من قبل فتيات يرتدين المايوهات، فهل المياه التي أسبح فيها تكون نجسة لأنها اختلطت بعورات الفتيات؟
ج: عليك يا ولدي أن تكون متفهما للظروف، فإذا كانت المياه جارية فالسباحة فيها حلال، أما المياه الراكده التي تظن أن أجسادا عارية وبضّة وناعمة سبحت فيها من قبل، فالاقتراب منها حرام.
===> هاذي عجبتني صراحة !!! معناها الراجل ما عندوش عوره حسب كلام "سيدي الشيخ" و حتى كان عندو كي يهبط يعوم في الما عورتو تبقى شايحه (من قوّة العام !!!!)
*********************************
س: صديق لي يبلغ الثلاثين من عمره وقد أراد الزواج من فتاة قيل له بأنها في العشرين، فلما تزوجها اكتشف أنها في السابعة من عمرها، فهل يطلقها، أم يحتفظ بها حتى تحيض؟

ج: إذا كان قد رآها رؤي العين وظن أنها في العشرين ثم اكتشف أنها في السابعة من عمرها فالاثم يقع على ولي أمرها لأنه لم يجعلها ترتدي ملابس الأطفال، وإذا كانت منقبة، ودخل عليها فعليه أن يسأل أهل العلم.
====> هو لا محالة البنات الصغار يشبهو ياسر لبنات العشرين اما غير احنا في سبرنا العرب طلعنا هكاّ الله غالب تي هاو ربي حب هكا كي طفلة عمرها سبعه كي طفله عمرها عشرين .. اما سيدي الشيخ سكونهم اهل العلم؟؟؟
*********************************
س: أنا أعمل في رقابة المطبوعات، وأحيانا أقرأ رواية فيها حديث عن امرأة سافرت دون محرم، فهل أنا آثم وينبغي عليَّ ترك العمل؟
ج: عليك أن تتصل بكاتب الرواية، وتطلب منه تغيير الجملة إلى امرأة سافرت ومعها محرم، أو يضيف كلمة آثمة وتلعنها الملائكة، وإذا لم يستجب الكاتب فعليك أن تستقيل لأن أجرك حرام من هذا العمل المخالف للشرع!
===> اي اللاّزم لازم خويا العزيز لزما عليه هو الكاتب يكتب من اصلو ؟؟ كان يسمع كلامي اتاو الورق الي يكتب عليه يمشي يلف فيه الحمص المنفّخ و يبيع راهم يصورو فلوس كي التراب جماعة الحمص المنفّخ ....
***************************************
س: لي زميل في الجامعة غير مسلم، وقد استعرت منه كراسة المحاضرات وسقطت فوق سجادة الصلاة، فماذا أفعل لكي لا يغضب الله علىًّ ويدخلني نار جهنم؟
ج: لا إثم عليك إن شاء الله إذا سقطت كراسة محاضرات زميلك الكافر فوق الطرف الأيسر للسجادة، أما إذا سقطت في وسطها أو أيمنها فينبغي أن تغسلها سبع مرات، أما السجاد المصنوع بأيدي فتيات لا يرتدين القفاز فينبغي احراقه
===> رد بالك كان في اليسار ميسالش !!! عملا بقول سيد النبي كي قال يسّروا و لا تعسّروا (!!!) يد الطفلة تجي عريانه هي ؟؟؟ علاش ما قصوهالهاش جماعة الامر بالمعروف و النهي عن المنكر؟؟
***********************************
س: أنا امرأة صالحة، أقرأ كثيرا لكل الشيوخ، ولا تبتعد عيناي عن شيوخ الفضائيات، لكن لم يجب أحد عن سؤالي الذي أرقني كثيرا: هل يستطيع عفريت ذكر أن يجامعني في حضور زوجي دون أن يلفت انتباهه؟
ثم إنني واقعة في مشكلة محرجة وهي أن ابني الصغير يشبه العفاريت، ويجري مثلهم، ويختفي من غرفة إلى أخرى، ويصرخ كأنه منهم، فهل تظن، سيدنا الشيخ، أن عفريتا انزلق في فراشي، وحملت منه هذا الولد الشقي، خاصة أن جارة عجوزا تقول لي دائما:ج: إذا كان زوجك يغط في النوم ويصدر شخيرا ولا يشعر بأي حركة حوله فأغلب الظن أن ابنك من الجن وهو يحتاج إلى معاملة خاصة، ويجب أن لا تغضبيه حتى لا يستعين بأقرانه، ويسببون لك المتاعب.

أما إذا كان والده صالحا وطيبا فلا شك بأن ابنك العفريت من صلبه.
===> سيرتو ما تغشوش مكانش يجيب صحابو و صحابو يجيبو ولاد حومتهم و اش باش يحزها عاد وقتها !!!!
*******************************
س: أعرف شيخا يقول بأن المرأة التي تجلس قبالة التلفاز آثمة لأن المذيع يستطيع أن يراها وهي بملابس البيت، فهل هناك طريقة لتجنب الحرام في هذه الخلوة غير الشرعية؟
ج: عليها أن تتدثر جيدا، وأن تجلس بزاوية 45 درجة حتى لا يلمحها المذيع أو أي ذكر عبر التلفاز، ومن الأفضل شراء جهاز تلفاز بغير صورة تجنبا للوقوع في شرك الكفر البواح.
===>
!!!!!!!!!!!!!!!!!!!!
---------------------------------------------------------------------------------------------
ملخّص القول و إلّي نحب نقولو انّو الإنسان اذا كان باش يحصر روحو في حكاية حلال ولاّ حرام راهو مش باش يعمل حتّى شيء يا وخي ماو صفّي قلبك و نيتك مع ربّي و ما تعصيوش في المتعارف عليه و اذا كان فمّا حاجه هكّا و لاّ هكاّ حكّم عقلك انتي
صحيح فما شكون يفهم في الدين اكثر من غيرو اما الصوت الباطن متاع العبد و إلّي كان كل واحد يسمعو وقت اللاّزم تو تشوف كيفاش خاطر بصراحه ها الشيوخ الّي كل مره خارجينلنا من شيره راهم قمّه في التزفزيف و منهم القرضاوي هاذايا إلّي سبّنا احنا التوانسه و بعد جبناه ضيف معزّز مكرّم في القروان !!! والله شيء ما تفهم !!!
كي العاده نستنّى تفاعلاتكم و سامحوني الجماعه إلّي الموضوع هاذا ماهوش شربهم ...